د افغانستان د سوداګرۍ او پانګونې اتاق د امام ابو حنیفه (رح) دویم ملي او نړیوال نندارتون په ښه ډول معرفي کولو په موخه، د اتاق په مرکزي دفتر کې رسنیز کنفرانس جوړ او د یاد نندارتون د جوړولو څرنګوالي، د هېواد په اقتصادي رغښت کې د نندراتون رول، ګډون کوونکو سکتورونو او د نندارتون د مودې په اړه يې معلومات وړاندی کړل.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د امام ابوحنیفه رحمه الله د لومړي نندارتون په اړه چې تېر کال په لاره اچول شوی وو، د هر اړخیزو معلوماتو د وړاندې کولو په ترڅ کې له ټولو هغو کسانو چې د نندارتون په رسنیز پوښښ کې يې فعاله ونډه اخیستې وه، مننه وکړه.

ښاغلي مهمند د امام ابوحنیفه رحمه الله د دویم نندارتون په اړه خبرې وکړې او وې ویل "د امام ابوحنیفه رحمه الله ملي او نړیوال نندارتون به په نږدې راتلونکي کې د نورو سکتوري ادارو، اړوندو دولتي ادارو او د سوداګرۍ او صنايعو وزارت مشرتابه په همکارۍ د دویم ځل لپاره جوړ شي چي په یاد نندارتون کې به تر زرو زيات کورني او بهرني شرکتونو خپل توليدات نندارې ته کیږدي.

ښاغلي مهمند په هېواد کې سرتاسري امنیت شتون، د اداري فساد نه شتون او د کوکنارو د کښت نه شتون د پانګونې لپاره ښه فرصتونه وبلل او له ټولو کورنیو او بهرنیو سوداګرو او پانګوالو يې وغوښتل چې له یادو فرصتونو څخه په ګټې پورته کولو سره، په مختلفو برخو کې پانګونه وکړي.

ښاغلي خیرالدین مایل احمدي دغه نندارتون د تولیدونکي او مصرف کوونکي تر منځ د اړیکو د پل په توګه یاد کړ او د کورنیو توکو په وده او معرفي کې یې د دا ډول نندارتونونو رول مهم وباله. نوموړي د دغه نندارتون د جوړولو لپاره د افغانستان د سوداګرۍ او پانګونې اتاق د لازمو تیاریو ډاډ ورکړ.

ښاغلي خان جان الکوزي د دغه ډول ستر نندارتون د جوړیدو موخه د کورنیو صنایعو ملاتړ او د هیواد کورنیو تولیداتو ته بازار موندنه وبلله او د دغه ډول نندارتونونو جوړول یې د کورنیو توکو د ښه معرفي کولو په لاره کې مهم ګام وباله.
ده د هېواد له ټولو خلکو وغوښتل چې له کورنيو توليداتو څخه په استفادې د هېواد له صنعت څخه ملاتړ وکړي.

دوشنبه، غبرګولي ۲۹مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي سوداګریز مرستیال ښاغلي خیرالدین مایل احمدي، د مدیره پلاوي غړي ښاغلي خان جان الکوزي او د عامل پلاوي سرپرست رئیس ښاغلي میرویس هوتک د پاکستان سوداګریزې آتشې ښاغلي ډاکټر کوثر علي زیدي او د پاکستان هېواد یو شمیر سوداګرو سره لیدنه ترسره کړه.
 
ښاغلي مهمند د پاکستان سوداګریزې آتشې ته د ښه راغلاست په ترڅ کې د دواړو هېوادونو ترمنځ د سوداګرۍ او پانګونې مسایلو، د سوداګرۍ د فرصتونو او ننګونو او د افغانستان له لارې منځنۍ آسیا ته د پاکستان د ترانزیتي ستونزو په اړه خبرې وکړې او زیاته يې کړه "د کوکنارو د کښت مخنیوی، د اداري فساد د پام وړ کموالی او د ټولیز امنیت شتون په هېواد کې د سوداګرۍ او پانګونې بهیر د چټکتیا لپاره خورا اړین دي. هغه د پاکستان له سوداګرو وغوښتل چې په افغانستان کې په بېلابېلو برخو کې پانګونه وکړي. ښاغلي مهمند په کابل کې د پاکستان له خوا د ګډو روغتیايي او علمي مرکزونو پر جوړولو ټینګار وکړ.

ښاغلي مایل احمدي د امام ابوحنیفه رحمه الله په دویم ملي او نړیوال نندارتون کې د پاکستاني سوداګرو او پانګوالو پر ګډون ټینګار وکړ او له هغوی یې وغوښتل چې یاد نندارتون ته د خپلو توکو د لېږد په برخه کې عملي ګامونه پورته کړي او فعاله برخه واخلي.

ښاغلي خان جان الکوزي د ډبرو سکرو بیه ۳۰ ډالرو ته ټیټه اعلان کړه او د افغانستان له خاورې یې منځنۍ اسیا ته د پاکستان د ټرانزیټي سکټور په برخه کې د لازمو اسانتیاوو د رامنځته کولو په برخه کې د اتاق د هڅو ژمنه وکړه او له سوداګرو یې وغوښتل چې لا زیاتې هڅې وکړي او د دواړو هیوادونو ترمنځ د سوداګرۍ او پانګونې کچه لوړه کړي.

ډاکټر کوثر علي زيدي د ډبرو سکاره او د افغانستان ځينې طبيعي زېرمې د پاکستان اړتيا وګڼله او د ډبرو سکرو د بيو د راټيټېدو هرکلى يې وکړ او دا يې د دواړو هېوادونو د خلکو او حکومتونو په ګټه وګڼله.
نوموړي د دواړو هېوادونو ترمنځ د ګډ بازار د رامنځته کېدو او افغان سوداګرو ته د ویزې د لازمو اسانتیاوو د برابرولو اعلان وکړ او د امام ابو حنیفه (رح) په دویم ملي او نړیوال نندارتون کې يې د مناسبو غرفو غوښتنه وکړه او اتاق هم په دې برخه کې د همکارۍ ډاډ ورکړ.

یکشنبه، غبرګولي ۲۸مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړي ښاغلي جان جان الکوزي، د کابل سوداګرۍ او پانګونې اتاق مدیره پلاوي لومړي مرستیال ښاغلي احمد شاه حکیمي او د مرکزي اتاق عامل پلاوي سرپرست رئیس ښاغلي میرویس هوتک د قزاقستان نړیوال سوداګرۍ اتاق استازي ښاغلي آرمان یسینتویف او د غذايي امنیت اسلامي سازمان بشردوستانه مرستو اجرائیوي آمر ښاغلي ایمري یوکسیک سره لیدنه ترسره کړه.

ښاغلي مهمند د غذايي امنیت اسلامي سازمان مسوولینو ته د ښه راغلاست پرمهال د کرنې میکانیزه کیدل، بزګرانو ته د اصلاح شویو تخمونو ویش او د معیاري سړو خونو جوړول د هیواد د اقتصاد د ودې او پرمختګ لپاره مهم فاکتورونه وبلل او د غذايي امنیت اسلامي سازمان څخه یې په پورتنیو مواردو کې د همکارۍ غوښتنه وکړه.

ښاغلي مهمند د هېواد د کروندګرو ننګونو ته د حل لارې موندلو او همدارنګه په ښوونیزو مرکزونو کې د کرنې د زده کوونکو لپاره د معیاري زده کړو د رامنځته کولو په موخه، د غذايي امنیت اسلامي سازمان او د افغانستان د سوداګرۍ او پانګونې اتاق ترمنځ د ګډ کنفرانس پر جوړېدو ټینګار وکړ.

ښاغلي خان جان الکوزي د اسلامي هېوادونو ترمنځ د ګډون بازارونو رامنځته کول د سوداګرۍ د ودې او ښه والي او همدارنګه د دغو هېوادونو د سوداګرو او پانګوالو ترمنځ د اړیکو د پیاوړتیا لپاره یو مهم شاخص وباله او د افغانانو لپاره یې د سیمې او نړۍ هېوادونو د ویزو پر صادرولو ټینګار وکړ.

د غذايي امنیت اسلامي سازمان چارواکو د دغه سازمان د بشري مرستو په اړه مفصل معلومات وړاندې کړل او د هغه لوی کنفرانس په اړه یې معلومات ورکړل چې په پاکستان کې به د کرنې په برخه کې جوړیږي.
دوی د افغانستان د سوداګرۍ او پانګونې اتاق له مشرتابه وغوښتل چې په یاد کنفرانس کې ګډون وکړي او خپلې ننګونې، ستونزې او وړاندیزونه د کنفرانس له ګډونوالو او د کرنې له بنسټونو سره شریک کړي.

دوشنبه، غبرګولي ۲۹مه، ۱۴۰۲

د ښي لاس موټرونو واردوونکو او د لوړ تناژ موټر لرونکو د ټولګټو وزارت سرپرست ښاغلي محمد عیسی ثاني او د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند سره د دوه جلا ناستو په ترڅ کې، د ښي لاس موټرونو وارداتو ته عدم اجازې، د حکومت لخوا یادو موټرونو ته د سټیکر نه ویشلو، د ښي لاس موټرونو اړوند د طرزالعمل د بیا کتنې او د لوړ تناژ لیږدوونکو موټرونو برخه کې شته ستونزو په اړه يې خبرې اترې وکړې.

د ښي لاس موټرونو واردونکو په خپل وار سره خبرې وکړې او يادې ستونزې يې د اتاق مدیره  پلاوي له لومړي مرستيال سره مطرح کړې. دوی د افغانستان د سوداګرۍ او پانګونې اتاق له مشرتابه څخه وغوښتل چې د یوې معقولې حل لارې په موندلو کې له دوی سره بشپړه همکاري وکړي.

په ورته وخت کې د لوړ تناژ موټرونو خاوندانو د ټولګټو وزارت له خوا د لوړ تناژ موټرونو لپاره د ترتیب شوي طرزالعمل په اړه خبرې وکړې او ویې ویل " د ټولګټو وزارت د لوړ تناژ موټرونو لپاره معین وزن ټاکلې چې د هغه وزن څخه د ډیر وزن د لیږد اجازه نه لري. موږ د ټولګټو وزارت له سرپرست څخه غواړو چې د تعین شوي وزن سربیره موږ ته د ۱۰ ټنه ډیر وزن د انتقال اجازه راکړي."

ښاغلي مهمند وویل "د ترانسپورت سکتور د هېواد یو له مهمو او سترو سکتورونو څخه دی، چې په مستقیم او غیر مستقیم ډول يې لسګونه زره کسانو ته د کار زمینه برابره کړې ده."
نوموړي د يادو شويو ستونزو د تاييد په ترڅ کې د ټولګټو وزارت له سرپرست څخه وغوښتل، چې د لوړ تناژ وسايطو د طرزالعمل د بيا کتنې په برخه کې د يادو وسايطو د خاوندانو غوښتنو ته جدي پاملرنه وکړي.

ښاغلي محمد عیسی ثاني د لوړ تناژ موټرونو د خاوندانو د خبرو له اورېدو وروسته د یوې معقولې حل لارې د موندلو په موخه د یوې ګډې کمېټې د جوړولو اعلان وکړ او په دې برخه کې یې د ټولګټو وزارت د همکارۍ ډاډ ورکړ.

چهارشنبه، غبرګولي ۲۴مه، ۱۴۰۲

د افغانستان د سوداګرۍ او پانګونې اتاق مدیره پلاوي سوداګریز مرستیال ښاغلي خیر الدین مایل احمدي په داسی حال کې چې، د مدیره پلاوي مالي رئیس ښاغلي شیرین آغا سخي هم حضور درلود د بلخ ولایتي اتاق سرپرست ښاغلي اسدالله اسدي، د اندخوی اتاق رئیس ښاغلي عبدالمجید نیازي او د بلخ ولایت یو شمیر مطرح سوداګرو سره لیدنه ترسره او د وارداتي شرکتونو د مالیاتي څیړنو برخه ستونزو په اړه يې ورسره خبرې وکړې.

د بلخ ولایت سوداګرو خپلې مالي ستونزې د افغانستان د سوداګرۍ او پانګونې اتاق له مشرتابه سره شریکې کړې، د یادو ستونزو د حل په برخه کې یې خپل مشخص وړاندیزونه او نظریات د سوداګرۍ او پانګونې اتاق له مشرتابه سره شریک کړل او د همکارۍ غوښتنه یې وکړه.

ښاغلي خیرالدین مایل احمدي د بلخ ولایت سوداګرو ته د ښه راغلاست په ترڅ کې د دوی مالیاتي ستونزې د پوهاوي وړ وبللې او د اسانتیاوو په رامنځته کولو او د لویو مالیاتي ستونزو په له منځه وړلو کې یې د افغانستان د سوداګرۍ او پانګونې اتاق د هڅو ډاډ ورکړ.

هغه له بهرنیو هېوادونو څخه د توکو او محصولاتو د واردولو پر مهال د واحدې مالیې ورکړه د سوداګرو او دولت په ګټه وګڼله او په دې برخه کې یې د عملي ګامونو پر اخیستلو ټینګار وکړ.

ښاغلي شیرین اغا سخي د افغانستان د سوداګرۍ او پانګونې اتاق د طرحې او د مالیاتو د ارزونې په برخه کې د اصنافو د طبقه بندۍ په اړه معلومات ورکړل او د اړوندو حکومتي ادارو سره په همغږۍ کې د اتاق د هڅو ډاډ ورکړ څو لازمې آسانتیاوې رامنځته شي.

یکشنبه، غبرګولي ۲۸مه، ۱۴۰۲