د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې، د افغان – پاکستان ګډ اتاق اجرائیوي رئیس ښاغلي نقیب الله صافي، د اتاق د عامل پلاوي نړیوالو اړیکو، عامه اړیکو او صادراتو پراختیا ډيپارټمنټونو مسؤلینو هم حضور درلود، د پاکستان سوداګریزې آتشې ښاغلي کوثر علي زیدي سره لیدنه ترسره او په امام ابوحنیفه (رح) دویم ملي او نړیوال نندراتون کې يې د پاکستاني شرکتونو د ګډون او دوی ته د لازمو آسانتیاوو رامنځته کولو په اړه خبرې اترې وکړې.

ښاغلي هوتک د امام ابوحنیفه (رح) د دویم ملي او نړیوال نندارتون د ترسره کیدو په اړه، د کورنیو او بهرنیو ګډون کوونکو شرکتونو، همکارو بنسټونو او د دغه نندارتون د ترسره کولو لپاره د لازمو اسانتیاوو د برابرولو په اړه هر اړخیز معلومات وړاندې او له خپلې خوا يې د ټولو ممکنه خدماتو د وړاندی کولو ډاډ ورکړ.  

ښاغلي هوتک په دغه نندارتون کې د پاکستاني تولیدي شرکتونو د ګډون هرکلی وکړ او د اړوندو شرایطو او اسانتیاوو د ښه والي په برخه کې یې د اتاق د هر اړخیزې همکارۍ ژمنه وکړه.

ښاغلي کوثر علي زیدي د پاکستان د تولیدي شرکتونو په اړه د معلوماتو د وړاندې کولو په ترڅ کې د امام ابوحنیفه (رح) د دویم نندارتون ترسره کول د سیمې د هېوادونو ترمنځ د سوداګریزو اړیکو د ټینګښت او پراختیا لپاره مهم وباله.
نوموړي هیله څرګنده کړه چې، پاکستاني سوداګر به په دې غونډه کې ګډون وکړي او د دواړو هېوادونو د سوداګرو ترمنځ د سوداګريزو تړونونو په لاسليک کولو سره به د سوداګرۍ او پانګونې له شته فرصتونو څخه ښه ګټه پورته کړي.

شنبه، چنګاښ ۱۷مه، ۱۴۰۲

د افغانستان د سوداګرۍ او پانګونې اتاق مدیره پلاوي سوداګریزو چارو مرستیال ښاغلي خیرالدین مایل احمدي په داسی حال کې چې، د مدیره پلاوي مالي رئیس ښاغلي شیرین آغا سخي، د عامل پلاوي سرپرست رئیس ښاغلي میرویس هوتک او د مختلفو ډيپارټمنټونو آمرینو يې ملتیا کوله د امام ابوحنیفه (رح) دویم ملي او نړیوال نندارتون د جوړیدو له ځای څخه يې لیدنه ترسره او د اړوندو ډيپارټمنټونو مسؤلینو سره يې د کاري پرمختګونو او لازم چمتووالي په اړه خبرې اترې وکړې.
 
ښاغلي مایل احمدي د نندارتون له بېلابېلو برخو څخه د لیدنې پر مهال او د نندارتون په تالار کې د غرفو د نصبولو او تخنیکي کارونو په ګډون یې د کار د پرمختګ خبر ورکړ. هغه د کنفرانس د موقعیت او د کورنیو او بهرنیو مېلمنو د ښه راغلاست په اړه خبرې وکړې او د بهرنیو شرکتونو لپاره د مناسب ځای د چمتو کولو او یو شمېر نورو مسایلو په اړه یې د امکان تر حده د دغه نندارتون د ترسره کېدو پر چټکتیا ټینګار وکړ.

ښاغلي شیرین آغا سخي د یاد نندارتون د ترسره کیدو لپاره د لازمو تیاریو په برخه کې د افغانستان د سوداګرۍ او پانګونې اتاق د کارکوونکو له هڅو څخه خوښي څرګنده کړه او د کاري بهیر د چټکتیا او د کاري ټیمونو ترمنځ د لا زیاتې همغږۍ په موخه یې لازمې لارښوونې وکړې.

چهارشنبه، چنګاښ ۱۴مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د ملګرو ملتونو د سرمنشي د ځانګړي استازي له مرستیال ښاغلي مارکس پوتزل سره لیدنه ترسره او د امام ابوحنیفه (رح) دویم ملي او نړیوال نندارتون د جوړولو، په هېواد کې د پانګونې شته فرصتونو، سوداګرو ته د ویزو صدور ستونزو، ټولیز امنیت، د کوکنارو کښت نه شتون او یو شمیر نورو مسایلو په اړه يې ورسره خبرې اترې وکړې.
 
ښاغلي مهمند د امام ابو حنیفه (رح) د دویم ملي او نړیوال نندارتون په اړه هر اړخیز معلومات وړاندې کړل او په دغه نندارتون کې یې د بهرنیو سوداګریزو شرکتونو پر پراخ ګډون ټینګار وکړ.

ښاغلي مهمند د ټولیز امنیت رامنځته کیدل، د اداري فساد له منځه تلل او د کوکنارو کښت نه شتون د زیربنایي پروژو د تطبیق، د انرژۍ تولید او د کانونو د استخراج لپاره اړین عناصر وبلل او له ښاغلي مارکس پوتزل څخه یې وغوښتل چې په دې برخه کې شته فرصتونو ته د پام کولو ترڅنګ، د بنسټیزو پروژو د کار د بیا پیل او د بانکي ستونزو د له منځه وړلو لپاره د هېواد له خصوصي سکتور سره همکاري وکړي.

ښاغلي مهمند له ښاغلي پوتزل څخه وغوښتل چې بهرني پانګه وال وهڅوي چې د افغانستان په زیربنایي سکتورونو کې د هېواد له خصوصي سکتور سره په همکارۍ پانګونه او تړونونه ترسره کړي.

ښاغلي مارکس پوتزل د اقتصادي ودې او د کارموندنې په برخه کې د هېواد د خصوصي سکتور د فعالیتونو ستاینه وکړه او د سوداګرۍ او پانګونې په برخه کې یې د لازمو اسانتیاوو په رامنځته کولو، سوداګرو ته د ویزو د ورکړې او یو شمېر نورو مسایلو په اړه د خپلې همکارۍ ډاډ ورکړ.

پنجشنبه، چنګاښ ۱۵مه، ۱۴۰۲

د سویلي او سویل ختیځې آسیا سوداګرو (سیچوان) ۱۲مه ناسته د چین نړیوالې سوداګرۍ پراختیا شورا لخوا د سیچوان ولایت د خلکو او د سارک سوداګرۍ او صنعت اتاق په همکارۍ د چین هېواد په سیچوان ولایت کې د ۲۰۲۳ زیږدیز کال جون د میاشتې په ۲۸ مه نېټه چې د ۱۴۰۲ لمریز کال د چنګاښ میاشتې له ۷مې نېټې سره سمون لري، جوړه چې پکې د سویلي او سویل ختیځې آسیا هېوادونو دولتي او غیر دولتي استازز، د چین هېواد مطرح سوداګرو او لوړ پوړو چارواکو ګډون درلود.   

په دې غونډه کې د سوداګرۍ او پانګونې د فرصتونو، د سوداګریزو اړیکو د پیاوړتیا او پراختیا، د سویلي او جنوب ختیځې اسیا د اړیکو د پراختیا میکانیزم د رامنځته کولو او همدارنګه د سیمه ییزو پرمختګونو په اړه سیمینارونه وړاندې شول او هر اړخیز بحثونه وشول.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند چې د هېواد د خصوصي سکټور په استازیتوب یې په دې لویه غونډه کې ګډون کړی و، په افغانستان کې د سوداګرۍ او پانګونې د فرصتونو په اړه وینا وکړه او ویې ویل "په افغانستان کې د سرتاسري امنیت شتون، د اداري فساد او د کوکنارو کښت نه شتون او یو شمیر نور مسایل هغه موضوعګانې دي چې په هېواد کې يې د سوداګرۍ او پانګونې لپاره فرصتونه رامنځته کړي دي."

د مدیره پلاوي لومړي مرستیال افغانستان د فرصتونو هېواد وباله او په ځانګړې توګه د کانونو، کرنې، صنایعو، ساختماني، انرژۍ، مخابراتو او روغتیا په برخو کې یې شته فرصتونه د غونډې ګډونوالو او استازو ته تشریح کړل او د برخه اخیستونکو هیوادونو استازي يې په یادو شويو سکتورونو په ځانګړي توګه د انرژۍ تولید برخه کې پانګونې ته وهڅول.

ښاغلي مهمند د افغان حکومت پالیسي د دوستۍ او نیکمرغۍ پر محور ولاړه وګڼله، د سوداګرۍ او سیمه ییزو او غیر سیمه ییزو تعاملاتو د ملاتړ او هرکلي په ترڅ کې یې د سویل او سویل ختیځو هېوادونو ترمنځ د پانګونې او سوداګریزو اړیکو پر پراختیا ټینګار وکړ.

ښاغلي مهمند د امام ابوحنيفه (رح) د دویم نندارتون د ترسره کېدو په اړه د تفصيلي معلوماتو د وړاندې کولو په ترڅ کې د چين په ١٢ مه سوداګرۍ غونډه (سيچوان) کې له ګډون کوونکو هېوادونو وغوښتل چې په دغه نندارتون کې چې د ٢٠۲۳ کال د جولای په ١٦مه نېټه د ۷ ورځو لپاره جوړېږي، ګډون وکړي او د سیمې هېوادونو سره خپلې سوداګریزې اړیکې غښتلې کړي.

محترم محمد یونس مهمند د پورتنۍ غونډې په څنډه کې د چین د برښنا د تولید له ستر شرکت (ډونګ فانګ الیکټریک انټرنیشنل کارپوریشن) څخه لیدنه وکړه او د یاد شوي شرکت د بریښنا تولید ماشینونه او تخنیکونه او په افغانستان کې یې د نوموړو توکو نصب او ګټه اخیستنه وارزوله.
نوموړي د ياد شرکت مسوولينو ته بلنه ورکړه چې د امام ابوحنيفه رحمه الله په ملي او نړيوال نندارتون کې د ګډون کولو ترڅنګ، خپل تولیدات او وړیتاوې تشریح او نندارې ته کیږي.

ښاغلي مهمند همدا راز د چین د چندوی ولایت د سوداګرۍ او پانګونې اتاق له مشرتابه سره وکتل او د افغانستان د سوداګرۍ او پانګونې اتاق او یادې اتاق ترمنځ یې د دوه اړخیزو همکاریو په اړه بحث او خبرې وکړې. د چیندوی د سوداګرۍ او پانګونې اتاق مشرتابه په دوه اړخیزو همکاریو ټینګار وکړ او د دواړو خونو ترمنځ یې د همکاریو د تفاهم لیک د لاسلیکولو ډاډ ورکړ.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند چین ته د خپل کاري سفر په ترڅ کې، په داسی حال کې چې، د هېواد مطرح سوداګرو هر یو ښاغلي فیض محمد خافي، حاجي نظام، حاجي ندیم او حاجي شیرآغا يې ملتیا کوله د چین هېواد یوو ښار میشت افغان سوداګرو سره لیدنه ترسره او د افغان سوداګرو شته ستونزو او ننګونو او د دواړو هېوادونو ترمنځ يې د سوداګریزو او پانګه ایزو فرصتونو په اړه خبرې اترې وکړې.
 
په چين کې مېشتو افغان سوداګرو هر يو دغه هېواد ته د مدیره پلاوي لومړي مرستيال د راتګ هرکلى وکړ او خپلې سوداګريزې او پانګه ایزې ستونزې يې له هغه سره شريکې کړې او له چينايي چارواکو سره يې د همغږۍ په رامنځته کولو سره د حل غوښتنه وکړه.

ښاغلي مهمند په چین کې د مېشتو افغان سوداګرو د ستونزو او وړاندیزونو د اورېدو پرمهال له افغان سوداګرو سره د سوداګرۍ او پانګونې په برخه کې د چین د هر اړخیزو همکاریو ستاینه وکړه او په افغانستان کې يې د سوداګرۍ او پانګونې د شته فرصتونو، د امنيت د تامين، د هېواد په ګمرکونو کې د رامنځته شويو اسانتياوو په اړه هراړخيز معلومات وړاندې کړل او له هغوى څخه يې وغوښتل چې د شته آسانتیاوو په پام کې نيولو سره په هېواد کې د سوداګرۍ او پانګونې د حالت د ښه والي په برخه کې هر اړخيزه همکاري وکړي.

ښاغلي مهمند په چين کې د مېشتو افغان سوداګرو رول د افغانستان په اقتصادي وده او پرمختګ کې مهم وباله او د دغو سوداګرو ستونزې يې له چينايي چارواکو سره شريکې کړې او د يادو شويو ستونزو د هواري او په دې برخه کې د لا زياتې همغږۍ د رامنځته کېدو غوښتنه يې وکړه.
نوموړي دغه راز د هېواد له دولتي چارواکو سره د سوداګرو د ستونزو د شریکولو او د هېواد سوداګرو ته د خدمتونو د وړاندې کولو په برخه کې د افغانستان د سوداګرۍ او پانګونې اتاق د مشرتابه د هراړخیزو هڅو ډاډ ورکړ.

پنجشنبه، چنګاښ ۱۵مه، ۱۴۰۲