د افغانستان د سوداګرۍ او پانګونې اتاق عمومي رئیس ښاغلي توکل احمدیار او د اتاق مدیره پلاوي سوداګریزو چارو مرستیال ښاغلي خیرالدین مایل احمدي د قزاقستان د صدراعظم مرستیال او د افغانستان د سوداګرۍ او صنعت وزارت سرپرست په ملتیا د قزاقستان د آستانه سوداګرۍ اتاق له رئیس سره لیدنه ترسره او د دواړو هېوادونو ترمنځ د سوداګرۍ پراختیا او د داوړو اتاقونو ترمنځ د همکارۍ زیاتوالي په اړه يې خبرې اترې وکړې.

په دې کتنه کې دواړو لورو د دواړو خونو ترمنځ د سوداګرۍ، پانګونې او ګډو همکاریو د پراختیا غوښتنه وکړه او د افغانستان د سوداګرۍ او پانګونې اتاق مشرتابه د افغانستان-قزاقستان د ګډې خونې پر جوړېدو او د د دواړو هیوادونو ترمنځ د سوداګرۍ د پلاوي پر سفر ټینګار وکړ.

پر دې سربېره په دې ناسته کې د افغانستان او قزاقستان د سوداګرو ترمنځ په بېلابېلو سوداګریزو برخو کې هم تفاهم وشو.

شنبه، زمري ۱۴مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار، د قزاقستان د سوداګرۍ د نړیوالې خونې له رئیس ښاغلي آیان یارینوف سره د کتنې په ترڅ کې په هرات ښار کې د قزاقستان د سوداګرۍ خونې د جوړېدو او د دواړو خونو تر منځ د ګډې همکارۍ په اړه خبرې او د نظر تبادله وکړه.

په دغه ناسته کې چې د اتاق د مدیره پلاوي غړي ښاغلي احمد ضیاء عظیمي شینوزاده او د عامل پلاوي نړیوالو اړیکو مسؤل ښاغلي امید غفورزي هم ګډون درلود، ښاغلي یارینوف د قزاقستان سوداګرۍ نړیوالې خونې فعالیتونو په اړه د معلوماتو وړاندی کولو په ترڅ کې وویل "د قزاقستان سوداګرۍ نړیواله خونه د قزاقستان په کچه د سوداګرۍ په برخه کې ترټولو ستره اداره ده او د افغانستان سره د سوداګرۍ پراختیا برخه کې موږ د خپلې همکارۍ ډاډ ورکوو."
نوموړي د افغانستان په هرات ښار کې د قزاقستان د سوداګرۍ خونې د جوړېدو په اړه خبرې وکړې او د قزاقستان د سوداګرۍ له نړیوالې خونې سره یې د افغانستان د سوداګرۍ او پانګونې اتاق د همکارۍ غوښتنه وکړه.

ښاغلي توکل احمدیار د هېواد د سوداګرۍ او اقتصاد په برخو کې د افغانستان د سوداګرۍ او پانګونې اتاق د فعالیتونو په اړه د هر اړخیزو معلوماتو د وړاندې کولو په ترڅ کې د افغانستان د سوداګرۍ او تولیداتو لپاره د قزاقستان د بازار اهمیت یادونه يې وکړه او د افغانستان او قزاقستان ترمنځ د ګډې خونې په رامنځته کولو او افغانستان ته د قزاقي پلاوي په راتګ يې ټینګار وکړ.

ښاغلي احمدیار په هرات کې د قزاقستان د سوداګرۍ خونې د جوړېدو هرکلی وکړ او د قزاقستان د سوداګرۍ له نړیوالې خونې سره یې د افغانستان د سوداګرۍ او پانګونې اتاق د هراړخیزو همکاریو ډاډ ورکړ.

پنجشنبه، زمري ۱۲مه، ۱۴۰۲

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي محمد یونس مهمند، د پکتیا د سوداګرۍ او پانګونې اتاق اجرائیوي آمر ښاغلي حسیب الله ګردیزي او د دغه ولایت یو شمېر سوداګرو په ملتیا، د مالیې وزارت د ګمرکونو له عمومي رئیس محترم مفتي عبدالمتین سعید سره وکتل او د پکتیا د سوداګرو د ګمرکونو پر ستونزو یې خبرې وکړې.

ښاغلي مهمند د هېواد په ګمرکونو کې د سوداګرو د ستونزو د حل په برخه کې د ګمرکونو د عمومي ریاست له ښې او پرله پسې همکارۍ مننه وکړه او غوښتنه یې وکړه چې دغه ریاست دې د سوداګرو لپاره زیربنایي سکتورونو او اسانتیاوو ته لا زیاته پاملرنه وکړي.

حسیب الله ګردیزي د دغه ولایت د سوداګرو عمده ستونزې چې (د پکتیا ګمرک کې د بنسټیزو اسانتیاوو نشتوالی، د درملو او خوراکي توکو او لابراتوار نه شتون او یو شمېر نورې ستونزې) د ګمرک له عمومي رئیس سره شریکې کړې او په دې اړه يې د مالیې وزارت د محترمو چارواکو د پاملرنې غوښتنه وکړه.

محترم مفتي عبدالمتین سعید د پکتیا ولایت د سوداګرو د ستونزو د اوریدو په ترڅ کې د یادو ستونزو په حل کې د ګمرکونو عمومي ریاست د همکارۍ ډاډ ورکړ او زیاته یې کړه چې د مالیې وزارت د زیربنایي تاسیساتو د جوړولو لپاره بودجه ځانګړې کړې ده چې ودانیزې چارې به يې ډیر ژر بشپړې او ګټې اخیستنې ته به وسپارل شي.

پنجشنبه، زمري ۱۲مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار چې د قزاقستان په نړیوال نندارتون او سوداګریز پیوستون کنفرانس کې د ګډون په موخه استانه ته تللی دی، د اسلامي همکاریو د سازمان له چارواکو سره په جلا جلا لیدنو کې د کرنې او خوراکي توکو، د پاکستان په فیصل اباد ښار کې د دې ادارې د کنفرانس او د افغان سوداګرو د ګډون په اړه یې بحث او د نظر تبادله وکړه.

په دغه ناسته کې چې، د افغانستان د سوداګرۍ او پانګونې اتاق مدیره پلاوي غړي ښاغلي احمد ضیاء عظیمي شینوزاده هم حضور درلود، د اسلامي همکاریو سازمان مسؤلینو د کرنې او خوراکي توکو په برخه کې او د پاکستان د فیصل آباد د کنفرانس په اړه چې د کرنې په برخه کې د یو شمېر اسلامي هېوادونو د استازو په ګډون جوړېږي، معلومات ورکړل او د اتاق له عمومي رئیس څخه یې وغوښتل چې په دې کنفرانس کې د څلویښتو افغان سوداګرو د ګډون تخنیکي همکاري وکړي.

ښاغلي توکل احمدیار د دغه کنفرانس د جوړېدو هرکلی وکړ او د سوداګرۍ او پانګونې اتاق په ځانګړې توګه د کرنې په برخه کې د افغانستان د اړتیاوو د پوره کولو او په دغه کنفرانس کې د افغان سوداګرو د ګډون د زمینې د برابرولو په برخه کې د همکارۍ ډاډ ورکړ.

چهارشنبه، زمري ۱۱مه، ۱۴۰۲

د افغانستان د تولیداتو نندارتون د قزاقستان په استانه ښار کې د قزاقستان د لومړي وزیر د مرستیال، د سوداګرۍ او صنایعو د وزیر او د بهرنیو چارو د وزارت د مرستیال، د افغانستان د صنایعو او سوداګرۍ وزارت د سرپرست، د افغانستان د سوداګرۍ او پانګونې اتاق عمومي رئیس ښاغلي توکل احمدیار، د اتاق مدیره پلاوي سوداګریزو چارو مرستیال ښاغلي خیرالدین مایل احمدي، د مدیره پلاوي غړي ښاغلي احمد ضیاء عظیمي شینوزاده او د دواړو هېوادونو سوداګرو په حضور کې پرانیستل شو.

د افغانستان د صنایعو او سوداګرۍ وزارت سرپرست د سیمې د هېوادونو په ځانګړې توګه د قزاقستان ترمنځ د سوداګرۍ د پراختیا، په افغانستان کې د کانونو او نورو برخو کې د پانګونې د فرصتونو په اړه خبرې وکړې او په هېواد کې یې د ګډې پانګونې غوښتنه وکړه.

د قزاقستان د سوداګرۍ وزير له افغانستان سره د خپل هېواد د بشردوستانه مرستو د ژمنو او دوام د يادونې په ترڅ کې په همدې ورځ د قزاقستان د مخابراتي شرکت او افغان ټيلي کام ترمنځ د يوه هوکړه ليک د لاسليکېدو يادونه وکړه چې له مخې به يې انټرنېټ افغانستان ته په مناسب قیمت او ښه کیفیت سره پلورل کیږی.
نوموړي د دواړو هېوادونو ترمنځ د سوداګرۍ پر پراختیا په ځانګړي ډول له قزاقستان څخه افغانستان ته د اوړو او غنمو د صادراتو پر دوام او د افغاني محصولاتو پر پېرلو ټینګار وکړ.

ښاغلي توکل احمدیار په افغانستان کې د کانونو، کرنې، صنعت، ساختماني، انرژۍ، مخابراتو، روغتیا او داسې نورو برخو کې د سوداګرۍ او پانګونې په برخه کې د شته فرصتونو یادونه وکړه، او قزاقستان ته يې د افغانستان په وچې او تازه میوې، غالیو، درملیزو بوټو، زعفرانو، قیمتي ډبرو او لاسي صنایعو په صادرلو ټنیګار وکړ او د افغانستان پر صادراتي توکو یې د ترجیحي تعرفې غوښتنه وکړه.

ښاغلي احمدیار زیاته کړه: زه باور لرم چې که افغان سوداګرو ته د ویزو د ورکولو ستونزې هوارې شي او د هېواد پر صادراتي توکو ترجیحي تعرفې وضع شي، د سوداګرۍ په ځانګړي ډول د افغانستان صادراتو کې به د پام وړ زیاتوالی رامنځته شي.

پنجشنبه، زمري ۱۲مه، ۱۴۰۲