د افغانستان د سوداګرۍ او پانګونې اتاق عمومي رئیس ښاغلي توکل احمد یار، د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک او د نړیوالو اړیکو ډيپارټمنټ مسؤل ښاغلي امید غفورزي هم حضور درلود، د سارک هېوادونو د کلني سوداګریز نندارتون څخه چې د بېلا بېلو هېوادونو په ځانګړې توګه د افغانستان سوداګرو او پانګوالو په پراخ ګډون سره ترسره شو، له یو شمېر ګډونوالو سره لیدنه او خبرې اترې وکړې.

د افغانستان د سوداګرۍ او پانګونې اتاق عمومي رئيس په چين کې د دغه شان ستر نندارتون له جوړېدو څخه د خوښۍ په څرګندولو سره، د سارک غړو هېوادونو د توليداتو په معرفي کولو او د هېوادونو ترمنځ د سوداګريزو اړيکو په پياوړتيا کې د دغه نندارتون رول مهم وباله او د دې سازمان په نورو غړو هېوادونو کې هم د دې ډول نندارتونونو پر جوړولو ټینګار وکړ.

ښاغلي احمدیار له یو شمېر هغو افغان سوداګرو او پانګوالو سره خبرې وکړې چې په دغه نندارتون کې یې خپل تولیدات نندارې ته وړاندې کړي وو او د هغوی ستونزې یې واورېدې. افغان سوداګرو افغان سوداګرو ته د ویزو نه ورکول، چین ته د پیسو د لېږد رالېږد په برخه کې د اسانتیاوو نشتوالی او د هېواد په بندرونو کې د لازمو اسانتیاوو نشتوالی له لویو ننګونو څخه وباله او د افغانستان د سوداګرۍ او پانګونې اتاق له مشرتابه څخه یې د لازمې پاملرنې غوښتنه وکړه.

یکشنبه، زمري ۲۹مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د اتاق عامل پلاوي سرپرست رئیس ښاغلي میرویس هوتک یې ملتیا کوله د چین او سویلي آسیا هېوادونو د کنفرانس په څنډه کې، د بنګله دیش د سوداګرې او صنعت وزیر، د سارک، نیپال، او سریلانکا اتاقونو رئیسانو سره ناسته ترسره او د سویلي آسیا هیوادونو سره د سوداګریزو اړیکو د ښه کولو او د یادې سیمې د فرصتونو د پیژندلو لپاره د هر اړخیز میکانیزم د جوړولو په اړه بحث او نظرونه تبادله کړل.

ښاغلي توکل احمدیار په افغانستان کې د سوداګرۍ او پانګونې د وضعیت په اړه د شته شرایطو او فرصتونو په اړه معلومات ورکړل او د یادو هېوادونو د خصوصي سکتور له غړو یې وغوښتل چې خپل سوداګر او پانګوال وهڅوي چې په افغانستان کې شته فرصتونه په پام کې ونیسي او په افغانستان کې پانګونه وکړي.

ښاغلي احمدیار افغانستان د سیمې د هېوادونو لپاره یو مهم ترانزیتي هېواد وباله او په دې برخه کې یې د سیمې د ټولو هېوادونو لپاره د لازمو اسانتیاوو د رامنځته کولو ډاډ ورکړ.

پنجشبنه، زمري ۲۶مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د عامل پلاوي سرپرست رئیس ښاغلي میرویس هم حضور درلود، د پاکستان د سوداګرۍ اتاقونو د فدراسیون له رئیس ښاغلي عرفان اقبال سره لیدنه ترسره او په تورخم او کراچۍ بندرونو کې د افغان سوداګرو پر ستونزو، د ګډې پانګونې، د پاکستان او افغانستان د ګډو نندارتونونو پر پرانیستلو، افغانانو ته د ویزو د ورکړې پر ستونزو او یو شمېر نورو مسایلو خبرې وکړې.

ښاغلي احمدیار د افغانستان د سوداګرۍ او پانګونې پر وضعیت، په دغه هېواد کې د پانګونې د شته فرصتونو په اړه خبرې وکړې او په پاکستان کې د مېشتو افغان سوداګرو ستونزې یې د پاکستان د سوداګرۍ او پانګونې اتاقونو فدراسیون له رئیس سره شریکې کړې.
د افغانستان د سوداګرۍ او پانګونې اتاق عمومي رئیس د دواړو هېوادونو ترمنځ د سوداګریزو اړیکو پر پراختیا او د ګډې پانګونې پر رامنځته کولو ټینګار وکړ او د پاکستان د سوداګرۍ اتاقونو فدراسیون له رئیس څخه یې وغوښتل چې د اړیکو په برخه کې شته فرصتونه په پام کې ونیسي او افغانانو ته د ویزو په صادرولو کې همکاري وکړي.

د پاکستان د سوداګرۍ اتاقونو فدراسیون رئیس ښاغلي عرفان اقبال د اتاق عمومي رئیس د خبرو له اورېدو وروسته، د ګډو نندارتونونو په جوړولو، د دواړو هېوادونو ترمنځ د سوداګریزو اړیکو د پراختیا او افغانانو ته د ویزو د ورکړې په برخه کې د لازمو اسانتیاوو په رامنځته کولو کې د هر اړخیزو همکاریو ډاډ ورکړ.

پنجشنبه، زمري ۲۶مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار چین ته د خپل رسمي سفر په ترڅ کې په داسی حال کې چې، د اتاق عامل پلاوي سرپرست ښاغلي میرویس هوتک او د عامل پلاوي د نړیوالو اړیکو مسؤل ښاغلي امید غفورزي يې ملتیا کوله، د جنوبي اسیا د سوداګرۍ په کنفرانس کې چې د چین له خوا په لاره اچول شوی و ګډون وکړ او د افغانستان د اقتصادي وضعیت لکه: د هېواد د اوبو مدیریت، د برېښنا تولید، د کرنې میکانیزه کیدو، د کانونو استخراج او د روغتیايي خدمتونو د معیاري کولو په اړه معلومات وړاندی کړل.

ښاغلي احمديار د دغه شان ستر کنفرانس د جوړېدو هرکلى وکړ او د دغه ډول کنفرانس رول يې د سيمې د هېوادونو ترمنځ د سوداګريزو اړيکو په پراختيا کې مهم وباله.
نوموړي په هېواد کې د پانګونې د فرصتونو په اړه معلومات ورکړل او د ګډون کوونکو هېوادونو له سوداګرو او پانګوالو یې وغوښتل چې له شته فرصتونو څخه په استفادې په افغانستان کې پانګونه وکړي.

د اتاق عمومي رئیس له افغانستان سره د چين د بشردوستانه مرستو د قدردانۍ په ترڅ کې د چين اقتصاد په نړۍ کې د ستر اقتصاد په توګه ياد کړ او د افغانستان له خصوصي سکتور سره يې د دغه هېواد پر همکاريو ټينګار وکړ.

ښاغلي احمدیار ژمنه وکړه چې د افغانستان د سوداګرۍ او پانګونې اتاق به د بهرنیو سوداګرو او پانګوالو لپاره د مناسبو اسانتیاوو او شرایطو د برابرولو په برخه کې له اړوندو دولتي ادارو سره د هر اړخیزو همکاریو ژمنه وکړه.

پنجشنبه، زمري ۲۶مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د اتاق عامل پلاوي سرپرست رئیس ښاغلي میرویس هوتک هم حضورد درلود، د چین او سویلي اسیا هېوادونو ترمنځ په تخنیکي ناسته کې ګډون وکړ او د چین او سارک غړو هیوادونو ترمنځ د همکارۍ میکانیزم د جوړېدو په اړه یې خبرې وکړې.

ښاغلي احمدیار د داسې سترې غونډې د ترسره کېدو د قدردانۍ په ترڅ کې د دا ډول غونډو جوړول د سیمې د هېوادونو په ځانګړې توګه د سارک سازمان د غړو هېوادونو ترمنځ د اړیکو د ښه کېدو لپاره یو ګام وباله او په دې برخه کې یې د عملي ګامونو پر اخیستلو ټینګار وکړ. نوموړي په دې برخه کې د افغانستان د سوداګرۍ او پانګونې اتاق د هر اړخیزې همکارۍ ژمنه وکړه.

میرویس هوتک د سارک د غړو هېوادونو ترمنځ د همکارۍ د میکانیزم رامنځته کول مهم وګڼل او د سوداګریزو اړیکو پر پراختیا، ګډې پانګونې او د سارک غړو هېوادونو لپاره یې د بهرنۍ پانګونې د هڅونې د لارو چارو په رامنځته کولو ټینګار وکړ.

پنجشبنه، زمري ۲۶مه، ۱۴۰۲