د افغانستان د سوداګرۍ او پانګونې اتاق د سوداګریزو خدمتونو د وړاندې کولو او د بهرنۍ پانګونې د جلبولو په برخه کې د خپلو پرله پسې هلو ځلو په ترڅ کې د کابل سرینا هوټل کې د سوداګریزو پیوستون کنفرانس د جوړولو په موخه لومړنۍ ناسته وکړه چې په کې، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق د مدیره پلاوي سوداګریزو چارو مرستیال ښاغلي خیرالدین مایل احمدي، د سوداګرۍ او صنعت وزارت معین، د ازبکستان د سوداګرۍ او صنعت وزارت لومړي مرستیال ناظم خان مورادوف، د اتاق د مدیره پلاوي دارالانشاء رئيس ښاغلي خان محمد سرفراز باز، د مدیره پلاوي غړو هر یو ښاغلي خان جان الکوزي، ضیاءالدین اچکزي او سید پرویز سادات هوفیاني، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ اتاق مرستیال ښاغلي همایون خواجه زاده، د ننګرهار ولایتي اتاق رئیس ښاغلي ګل مراد عرب او افغان او ازبک پیژندل شویو سوداګرو او پانګوالو ګډون درلود.

په دې کتنه کې د دواړو هېوادونو ترمنځ د سوداګریزو اړیکو د کنفرانس د جوړېدو، د سوداګرۍ د پراختیا، د پانګونې د فرصتونو د پېژندنې او د اقتصادي اړیکو د پیاوړتیا په اړه بحث او د نظر تبادله وشوه.

د افغانستان د صنایعو او سوداګرۍ وزارت مرستیال د ازبکستان سوداګریز پلاوي ته د ښه راغلاست په ترڅ کې د دواړو هېوادونو ترمنځ د ښو اړیکو یادونه وکړه او د دواړو هېوادونو ترمنځ د سوداګرۍ او پانګونې د وضعیت د ښه کېدو اساسي شاخصونه یې تشریح کړل.

نوموړي د ازبکستان هېواد له سوداګريز پلاوي وغوښتل چې افغان سوداګرو ته د سوداګريزو ويزو د ورکړې، د دغه هېواد له لارې د ټرانزيټ په بيه کې د تخفيف، د افغانستان، قزاقستان او ازبکستان ترمنځ د درې اړخيز تفاهم ليک د لاسليک او يو شمېر نورو سوداګريزو مسايلو په برخه کې همکاري وکړي.

ښاغلي ناظم خال مورادوف افغانستان ته د دغه هېواد د سوداګريز پلاوي د سفر موخه د دواړو هېوادونو ترمنځ د سوداګرۍ او پانګونې د بهير ګړندي کول، د افغانستان د کرنې او مالدارۍ په ميکانيزه کیدو کې د ازبکستان همکارۍ، په افغانستان کې د بنسټيزو پروژو پلي کول او د دواړو لورو د حکومت د لوړ پوړو غړو په ګډون د سوداګریزو اړیکو کنفرانس جوړول ونومول او افغان سوداګرو ته د ویزو د ورکولو په برخه کې يې د یوه ځواب ویونکي او هر اړخیز میکانیزم د رامنځته کولو ډاډ ورکړ.  

ښاغلي مهمند د ازبکستان د صنایعو او سوداګرۍ وزارت مرستیال او ورسره ملګري پلاوي ته ښه راغلاست ووایه او ازبکستان يې د افغانستان دوست او ورور هېواد وباله. هغه د ښو سوداګریزو اړیکو پر درلودلو او په دې برخه کې له شته فرصتونو څخه په استفادې ټینګار وکړ.

ښاغلي خیرالدین مایل احمدي د سوداګرۍ او پانګونې د موخو د ترلاسه کولو لپاره د دا ډول ګډو پروګرامونو ترسره کول ګټور وبلل او د سوداګرۍ بهیر په چټکتیا، د ګډې پانګونې په رامنځته کولو او د دواړو هېوادونو ترمنځ د ګډې سوداګرۍ اتاق په رامنځته کولو یې ټینګار وکړ.

ښاغلي مایل د سوداګرۍ او پانګونې لپاره د مناسبو شرایطو په اړه معلومات ورکړل او د ازبکستان له سوداګریز پلاوي څخه یې وغوښتل چې په افغانستان کې د شته فرصتونو له مخې پانګونه وکړي.

یکشنبه، وږي ۵ مه، ۱۴۰۲

د افغانستان د سوداګرۍ او پانګونې اتاق د مدیره پلاوي غړي ښاغلي ضیاءالدین اچکزي او د عامل پلاوي سرپرست رئیس ښاغلي میرویس هوتک د غذايي امنیت اسلامي سازمان له مسؤلینو ښاغلي ایمري یوکسیک او توفیق احمد سره لیدنه ترسره او په نږدی راتلونکي کې د غذايي امنیت اسلامي سازمان له لوري د پاکستان په فیصل آباد ښار کې د سوداګرۍ او پانګونې کنفرانس جوړیدو په اړه يې خبرې اترې وکړې.

ښاغلي ایمري یوکسیک د یاد کنفرانس په اړه د مفصلو معلوماتو وړاندی کولو ترڅنګ، د اتاق مشرتابه پلاوي څخه وغوښتل چې، د یاد کنفرانس لا ښه جوړولو او د افغان سوداګرو او پانګوالو ګډون برخه کې لازمه همکاري وکړي.

ښاغلي اچکزي د غذايي امنیت اسلامي سازمان مسؤلینو ته د ښه راغلاست ویلو ترڅنګ، د ورته کنفرانسونو جوړول په هېواد کې د سوداګرۍ او پانګونې بهیر چټکتیا برخه کې اړین وبلل او د افغانستان د سوداګرۍ او پانګونې اتاق د همکارۍ ډاډ يې ورکړ.
سربیره پردی، نوموړي په هېواد کې د ننه د ورته کنفرانسونو په جوړولو ټینګار وکړ.

ښاغلي هوتک د غذايي امنیت اسلامي سازمان څخه د ورته سترو کنفرانسونو جوړولو په پار مننه وکړه او د یاد کنفرانس جوړولو څرنګوالي برخه کې يې د خپلو مشخصو وړاندیزونو مطرح کولو ترڅنګ، په یاد کنفرانس کې د افغان سوداګرو او پانګوالو د ګډون برخه کې يې د اتاق د همکارۍ ژمنه وکړه.

سه شنبه، زمري ۳۱مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د عامل پلاوي سرپرست رئیس ښاغلي میرویس هوتک په حضور کې د موسیاد ادارې له مسوولینو سره په آنلاین ډول لیدنه ترسره او د ترکیې په استانبول ښار کې د موسیاد نندارتون جوړیدو او په دغه نندارتون کې د افغان سوداګرو ګډون څرنګوالي په اړه يې خبرې اترې وکړې.

د موسیاد ادارې مسؤلينو د سوداګرۍ او پانګونې اتاق مشرتابه ته د موسیاد نړيوال نندارتون جوړولو برخه کې خپل پروګرامونه او چمتووالی تشریح کړ او په دغه نندارتون کې يې د افغان سوداګرو پر پراخ ګډون ټينګار وکړ. دوی د ټولو شرایطو د برابرولو او د لازمو اسانتیاوو د رامنځته کولو او افغان سوداګرو ته د ویزو د ورکولو ډاډ ورکړ.

د اتاق مدیره پلاوي لومړي مرستیال په ترکیه کې د موسیاد ادارې د ستر نندارتون د جوړېدو هرکلی وکړ او په دغه نندارتون کې یې د افغان سوداګرو او پانګوالو د ګډون ډاډ ورکړ. هغه افغان سوداګرو ته د ویزو د ورکړې په برخه کې ستونزې او په دغه نندارتون کې د غرفو لوړه بیه د افغان سوداګریز پلاوي د ګډون پر وړاندې اساسي ننګونې وبللې او د موسیاد له ادارې یې وغوښتل چې د پورتنیو ستونزو په حل کې پوره همکاري وکړي.

شنبه، وږي ۴مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې، د اتاق عامل پلاوي سرپرست رئيس ښاغلي میرویس هوتک او د نړیوالو اړیکو ډيپارټمنټ مسؤل ښاغلي امید غفورزي يې ملتیا کوله د سارک سازمان د غړو هېوادونو په مشورتي ناسته کې د ګډون ترڅنګ، د سارک غړو هېوادونو د سترو ننګونو او حل لارو په اړه يې خبرې اترې وکړې.

په دې کتنه کې ښاغلي احمدیار د سارک غړو هېوادونو ترمنځ پر شته ننګونو، سوداګرو او پانګوالو ته د سارک د غړو هېوادونو د ویزو په ورکولو کې د لازمو اسانتیاوو د نشتوالي، د دغو هېوادونو ترمنځ د TIR د ترانزیت د اصولو نه مراعت، د سارک د غړو هېوادونو تر منځ د وارداتو او صادراتو پر وړاندې د ترجیحي تعرفو نه تطبیق د دې سیمې یوه له مهمو ستونزو څخه وبلله او د دغو ستونزو د حل لپاره یې د عملي ګامونو پر پورته کولو ټینګار وکړ.

د سارک د غړو هېوادونو مشورتي غونډه هر کال د دغه سازمان د سوداګريزو ستونزو د حل په موخه جوړېږي، چې په کې د غړو هېوادونو استازي ګډون کوي او د غونډې له ګډونوالو سره خپل نظرونه شريکوي.

یکشنبه، زمري ۲۹مه، ۱۴۰۲

د افغانستان د سوداګرۍ او پانګونې اتاق مشرتابه د حکومت د وروستي فرمان څخه د رسنیز کنفرانس په ترڅ کې چې، د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق د مدیره پلاوي مالي رئیس ښاغلي شیرین آغا سخي، د مدیره پلاوي غړو خان جان الکوزي او ضیاءالدین اچکزي، د عامل پلاوي سرپرست رئیس ښاغلي میرویس هوتک، د څارنې پلاوي رئیس ښاغلي عبدالحامد حمیدي، د کابل سوداګرۍ اتاق مرستیال ښاغلي همایون خواجه زاده او د هېواد یو شمیر مطرح سوداګرو او پانګوالو په کې ګډون درلود، ستاینه او هر کلی وکړ.  

ښاغلي مهمند د هېواد د خصوصي سکتور د غړو لپاره د لازمو اسانتیاوو او خدماتو د رامنځته کولو په موخه، د حکومت د مشرتابه د مقام له فرمان څخه مننه وکړه او دا یې په هېواد کې د سوداګرۍ د ودې، پراختیا او چټکتیا په لور یو ګام وباله.

ښاغلي مهمند په تېرو دوو کلونو کې د ټولیز امنیت د تامین، د کوکنارو د کښت د مخنیوي او د اداري فساد د پام وړ کمولو په برخه کې د حکومت له هڅو څخه خوښي څرګنده کړه او د حکومت له مشرتابه په ځانګړې توګه د مالیې له وزارت څخه یې وغوښتل چې له سوداګرو او واردونکو څخه مالیه په واحد ډول راټوله کړي. هغه د ترانزیت په برخه کې د وروستیو پرمختګونو په اړه معلومات ورکړل او افغانستان یې د سیمې له مهمو ترانزیتي هېوادونو څخه وباله.

ښاغلي شیرین آغا سخي د هېواد د کورني صنعت د ملاتړ په برخه کې د حکومت د رهبرۍ هڅې وستایلې او د افغانستان د خلکو او دولتي ادارو له خوا د کورنیو تولیداتو په ګټه اخیستنې باندې یې ټینګار وکړ.

ښاغلي خانجان الکوزي د حکومت د رهبرۍ د وروستي فرمان د تائید په ترڅ کې د دې فرمان صادرول د هیواد د خصوصي سکتور د ستونزو د هواري په برخه کې یو مهم ګام وباله او د دغه فرمان په عملي کولو یې د اړوندو ادارو له لوري ټینګار وکړ. نوموړي ترکیې ته د اتاق د مشرتابه د کاري سفر او لاسته راوړنو په اړه خبرې وکړې او وې ویل: ترکیې ته په سفر کې یې د هېواد د خصوصي سکتور لپاره د لازمو اسانتیاوو په رامنځته کولو، د ترکيې او افغانستان ترمنځ د ګډې سوداګرۍ خونې پر جوړېدو، په ترکیه کې میشت افغان سوداګر په هېواد کې پانګونې ته د هڅولو او یو شمیر نورو مسایلو په اړه يې خبرې اترې وکړې.

په دې کنفرانس کې: د صنعتکارانو ټولنې رئیس عبدالجبار صافي، د ټوکر اتحادیې رئیس حاجي عبیدالله او د تازه مېوو او سبزیجاتو د اتحادیې رئیس ښاغلي اخترمحمد احمدي د حکومت د رهبرۍ د وروستي فرمان په اړه خبرې وکړې او د هېواد له خصوصي سکتور څخه يې د دولت د مشرتابه د ملاتړ قدرداني وکړه.

پنجشنبه، وږي ۲مه، ۱۴۰۲