د افغانستان د سوداګرۍ او پانګونې اتاق د هڅو او د دولت د اړوندو ادارو د همکارۍ په پایله کې او کام ایر او اریانا هوايي شرکت ترمنځ د نوي تفاهم پر بنسټ د کابل له نړیوال هوايي ډګر څخه د هوايي کارګو درېیمه مستقیمه الوتنه د چین شانګهای ښار ته ترسره شوه.

د هوايي دهلیز پرانیستې په مراسمو کې د افغانستان اسلامي امارت ریاست الوزرا اقتصادي مرستیال، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي سوداګریزو چارو مرستیال ښاغلي خیرالدین مایل احمدي، د مدیره پلاوي غړو ښاغلي ضیاءالدین اچکزي او محمد داود یوسفزي، د کابل نړیوال هوايي ډګر، کام ایر او آریانا افغان هوايي شرکتونو رئیسانو، حکومتي چارواکو، سوداګرو او پانګوالو ګډون کړی وه.  

ښاغلي مهمند د پرانیستې په مراسمو کې ګډونوالو ته د ښه راغلاست په ترڅ کې د هوايي دهلېز رول د سوداګرۍ پراختیا او د هېواد اقتصادي وده کې اړین وباله او زیاته یې کړه چې، له نیکمرغه دا ځل د کابل – شانګهای هوايي دهلیز د افغاني شرکتونو له لوري په فعالیت پیل وکړ.

ښاغلي مهمند د سیمې له هېوادونو سره پر سوداګریزو او اقتصادي اړیکو ټینګار وکړ او د سیمې له ټولو هېوادونو یې وغوښتل چې د سوداګرۍ او ټرانزیټي مسایلو په برخه کې له نړیوالو کنوانسیونونو سره سم عمل وکړي.
 نوموړي د هرات د پرونۍ زلزلې له قربانيانو او کورنيو سره د خواخوږۍ د څرګندولو په ترڅ کې د هېواد له ټولو سوداګرو او پانګوالو وغوښتل چې له خپلو هېوادوالو سره د دغې زلزلې له زيانمنو شويو کورنيو سره مرسته او همکاري وکړي.

د ریاست الوزار اقتصادي مرستیال د هېواد په اقتصادي ثبات کې د خصوصي سکټور رول مهم وباله او د هېواد له ټولو سوداګرو او پانګوالو یې وغوښتل چې خپل هېواد ته راستانه شي او د هېواد په اقتصادي ثبات کې د نورو افغانانو په څیر د پام وړ رول ولوبوي.

یکشنبه، تلې ۱۶مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د سوداګرۍ او صنعت له سرپرست وزیر نورالدین عزیزي سره د لیدنې په ترڅ کې، د پاکستان د کراچۍ بندر له لارې د افغان سوداګرو د محصولاتو د ټرانزیټ په برخه کې د شته ستونزو په اړه خبرې وکړې.

ښاغلي مهمند د پاکستان له لوري د هېواد د ټرانزیټي محصولاتو پر وړاندې د خنډونو رامنځته کول د دواړو هېوادونو تر منځ له شته ترانزیتي تړونونو او د ترانزیت له نړیوالو اصولو نه سرغړونه وبلله او د صنعت او سوداګرۍ وزارت له مشرتابه یې وغوښتل دا چې د افغانستان د سوداګرۍ لویه برخه د کراچۍ بندر له لارې ترسره کیږي، نو ښاغلي عزیزي دی د پاکستان حکومت له اړوندو چارواکو سره خبرې وکړي څو لازمې آسانتیاوې رامنځته کړی شي.  
نوموړي د آپتا تړون په بشپړ تطبیق ټینګار وکړ او له دواړو خواوو یې وغوښتل چې د دواړو هېوادونو ترمنځ د ترانزیت اصول مراعات کړي.

د صنعت او سوداګرۍ وزارت سرپرست له پاکستان سره د ټرانزیټ په برخه کې د شته ستونزو د تایید ترڅنګ، د همکارۍ او مناسبې حل لارې په لټه کې د خپلو هڅو ډاډ ورکړ.

په دې ناسته کې د ترانزیت د بدیلو لارو د موندلو، د سیمې د هېوادونو ترمنځ د لازمو ترانزیتي اسانتیاوو د رامنځته کولو، د نړۍ له هېوادونو سره د سوداګریزو اړیکو د پیاوړتیا اود هېواد په بندرونو کې تخنیکي ستونزو حل په اړه خبرې اترې وشوې.

چهارشنبه، تلې ۱۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د دارالانشاء رئیس ښاغلي خان محمد سرفراز باز، د مدیره پلاوي مالي رئیس ښاغلي شیرین آغا سخي، د مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي غړو ښاغلي ضیاءالدین اچکزي او محمد داود یوسفزي او د عامل پلاوي پالیسۍ او تخنیکي مرستیال ښاغلي محمد انور عارفي هم حضور درلود، د افغانستان لپاره د اندونیزیا سفارت له سرپرست ښاغلي بودي رجمت سوریا سپوترا سره لیدنه ترسره او د اندونیزیا او افغانستان ترمنځ د سوداګریزو اړیکو ښه والي، د دواړو هېوادونو سوداګرو ترمنځ د ګډ سوداګریزو انجمن رامنځته کولو او د سوداګرو میرمنو د وړتیا لوړونې په اړه يې خبرې اترې وکړې.    

ښاغلي بودي رجمت سوریا سپوترا د هغه کنفرانس په اړه چې په نږدې راتلونکي کې د اندونیزیا د سوداګرۍ اتاق له خوا د دغه هېواد په مرکز کې د افغان سوداګرو ښځو د ظرفیت د لوړولو په موخه جوړیږي، هر اړخیز معلومات وړاندې کړل او دی کنفرانس لپاره يې د افغان سوداګرو ښځو د پېژندنې په برخه کې د افغانستان د سوداګرۍ او پانګونې اتاق د هر اړخیزې همکارۍ غوښتنه وکړه.

ښاغلي مهمند د افغانستان د سوداګرۍ او پانګونې اتاق ته د ښاغلي بودي راجمت سوریا سپوترا هرکلی وکړ او د افغانستان د سوداګرۍ او پانګونې اتاق یې د هېواد د ټولو سوداګرو او خصوصي سکتور رښتینی استازی وباله.
نوموړي په هېواد کې د سوداګرۍ او پانګونې شته فرصتونه، سوداګریزې اړیکې او د افغانستان او اندونیزیا د څو کلنو ناستو لاسته راوړنې خورا مهمې وبللې او د دواړو هېوادونو ترمنځ یې د سوداګرۍ د بهیر پر چټکتیا د ټینګار کولو ترڅنګ، د پورته یاد شوي کنفرانس په تنظیم کولو کې د اتاق د همکاریو ډاډ ورکړ.

شنبه، تلې ۱۵مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس په پاکستان کې د نندارتونونو د تنظیم له مسؤل ښاغلي عزیر نظام سره آنلاین ناسته ترسره او د افغانستان، پاکستان او چین ترمنځ یې د درې اړخیزو نندارتونونو د جوړولو په اړه خبرې وکړې.

ښاغلي هوتک په تېرو دوو کلونو کې د نندارتونونو د جوړولو او د بهرنۍ پانګونې د جلبولو په برخه کې د اتاق د لاسته راوړنو په اړه معلومات وړاندې کړل او د درې اړخیزو نندارتونونو د جوړولو لپاره یې د لارې د نقشې په جوړولو ټینګار وکړ.
نوموړي په هېواد کې د دا ډول نندارتونونو د ترسره کېدو لپاره د مناسبو شرايطو د برابرولو په برخه کې د خپلې ژمنې ډاډ ورکړ.

ښاغلي عزیر نظام د درې واړو هېوادونو ترمنځ د سوداګرۍ او پانګونې له شته فرصتونو څخه د ګټې اخیستنې او د سیمې د هېوادونو ترمنځ د سوداګریزو اړیکو د ښه والي په اړه خبرې وکړې او په دې برخه کې یې د افغانستان رول مهم وباله.

چهارشنبه، تلې ۱۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د دارالانشاء رئیس ښاغلي خان محمد سرفراز باز د عامل پلاوي سرپرست رئیس ښاغلي میرویس هوتک، د کابل سوداګرۍ اتاق مرستیال ښاغلي همایون خواجه زاده، د ننګرهار ولایتي اتاق رئیس ښاغلي ګل مراد عرب او د هېواد یو شمیر مطرح سوداګرو او پانګوالو په حضور کې د پاکستان سفارت مرستیال ښاغلي جنیت وزیر او د یاد سفارت سوداګریزې آتشې ښاغلي شوکت علي سره د اتاق په مرکزي دفتر کې لیدنه ترسره او د پاکستان په خاوره کې يې د افغان سوداګرو ټرانزیټي او سوداګریزو ستونزو په اړه خبرې اترې وکړې.

ښاغلي مهمند د پاکستان سفارت مرستیال او سوداګریزې آتشې ته د ښه راغلاست ویلو ترڅنګ، په کراچۍ بندر کې د افغان سوداګرو د ټرانزیټي توکو د ننوتلو مخنیوي، په پاکستان کې په افغان ټرانزیټي توکو لس سلنه فیس وضع کولو، د تضمین بیمې بدلول په بانکي تضمین باندی، د دواړو هېوادونو سوداګرو ترمنځ د همغږۍ کمېټې رامنځته کولو یادونه وکړه او د پاکستان سفارت له مشرتابه يې وغوښتل چې د پورته یادو خنډونو په له منځه وړلو او په کراچۍ بندر کې د افغان سوداګرو ټرانزیټي توکو د اسنادو طۍ مراحل پروسه کې د چټکتیا رامنځته کولو برخه کې همکاري وکړي.      

ښاغلي مهمند د پاکستان له خوا د افغانستان د سوداګرۍ او ټرانزیټ کې د ستونزو رامنځته کول د WTO د تړون خلاف، د پاکستان د حکومت له خوا د (اپټا) د تړون له مادو څخه سرغړونه او د ښه ګاونډیتوب د اصولو خلاف عمل وباله او د پاکستان حکومت لخوا يې یادو ستونزو ته د حل لارو چارو پیداکولو غوښتنه وکړه.

ښاغلي ګل مراد عرب او د ننګرهار ولایت سوداګرو د تورخم په دروازه او د پاکستان په خاوره کې دننه د افغان سوداګرو پر ستونزو خبرې وکړې او د دوی د ستونزو د هواري غوښتنه یې وکړه.

دغه راز د کندهار د سوداګرۍ اتاق رئيس ښاغلي محمد صديق مهمند او د سپين بولدک او خوست اتاقونو  رئيسانو هم د اتاق له مشرتابه، د پاکستان سفارت له مرستيال او سوداګريز اتشې سره د انلاين ناستې له لارې خپلې ستونزې مطرح کړې چې ښاغلي محمد یونس مهمند د ددوی د ستونزو د حل ډاډ ورکړ.

ښاغلي جنیت وزیر د کراچي له بندر څخه د افغان سوداګرو د ټرانزیټي توکو د خلاصون، افغان سوداګرو ته د سوداګریزو ویزو د ورکولو او د شته ستونزو د حل په برخه کې د لازمو تدابیرو په نیولو ډاډ ورکړ او د اتاق له مشرتابه یې وغوښتل چې خپلې ستونزې په لیکلي بڼه د پاکستان سفارت سره شریکې کړي.

پنجشنبه، تلې ۱۳مه، ۱۴۰۲