د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د نړیوال بانک، UNDP او ILO له مسؤلینو سره آنلاین ناسته ترسره او په هرات ولایت کې د زلزله ځپلو سکتورونو ملاتړ په اړه يې خپل نظرونه مطرح او خبرې اترې وکړې.

د نړیوال بانک، UNDP او ILO مسؤلینو د کوچنیو او منځنیو متشبثینو د ملاتړ خبر ورکړ او د افغانستان د سوداګرۍ او پانګونې اتاق څخه يې وغوښتل چې د هرات ولایت په زلزله کې د ځپل شویو منځنیو او کوچنیو متشبثینو په پیژندنه کې ورسره مرسته وکړي.

ښاغلي هوتک په هرات ولایت کې خصوصي سکتور ته د رسیدلو زیانونو په اړه د معلوماتو ورکولو ترڅنګ، د درندو او سپکو صنایعو، زعفرانو، وچې میوې، لاسي صنایعو، بانکونو او ودانیو برخه کې هرات یو ستر تولیدي ولایت وباله.

همدارنګه، نوموړي د هرات ولایت خصوصي سکتور ستونزو او فرصتونو پیژندلو په موخه د یو کنفرانس په جوړولو د ټینګار کولو ترڅنګ، نړیوالو ادارو سره په هرات کې ولایت کې د زیانمنو سکتورونو په پیژندلو کې د همکارۍ ډاډ ورکړ.

چهارشنبه، لیندۍ ۲۲مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک، د افغانستان نړیوال نندراتون مرکز رئیس ښاغلي محمد صابر لطیفي، د اتاق حقوقي سلاکار ښاغلي عبدالسلام کوهي، د عامه اړیکو او صادراتو پراختیا ډیپارټمنټونو مسؤلینو د روغتیايي محصولاتو نندارې ته د کیښودو په موخه د "ابو علی سینا" په نوم نندراتو جوړولو په هکله، مقدماتي ناسته ترسره کړه.

ښاغلي هوتک د نندارتون جوړولو څرنګوالي په اړه مفصل معلومات وړاندی او د اتاق د مختلفو ډیپارټمنټونو مسؤلینو څخه وغوښتل چې، د نوم لیکنې پروسې چټکتیا، د ملاتړ کوونکو جلب او جذب، کورنیو او نړیوالو شرکتونو، د بازار موندنې ټیم رامنځته کولو او یو شمیر نورو اړوندو مسایلو برخه کې یو د بل سره لازمه همکاري ترسره کړي.

شنبه، لیندۍ ۱۸مه، ۱۴۰۲

د افغانستان د سوداګرۍ او پانګونې اتاق خصوصي سکتور ته د سوداګریزو خدماتو وړاندی کولو او بهرنیو پانګونو جلبولو په سلسله کې، دا ځل د افغان او ترکي سوداګرو ترمنځ د سوداګریزو پیوستون ناسته جوړه چې پکې، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د مدیره پلاوي مالي رئیس ښاغلي شیرین آغا سخي، د مدیره پلاوي غړو هر یو ښاغلي خان جان الکوزي، محمد ګردیزي او محمد داود یوسفزي، د اتاق عامل پلاوي سرپرست رئیس ښاغلي میرویس هوتک، د افغانستان لپاره د ترکي سفارت سوداګریزو چاروال ښاغلي امره قبیل، د پکتیکا، لوګر او خوست ولایتي اتاقونو رئیسانو، افغان او ترکي مطرح سوداګرو او پانګوالو ګډون درلود.

ښاغلي مهمند په کابل کې د ترکیې سفیر او ورسره ملګري پلاوي ته د ښه راغلاست ویلو ترڅنګ، ترکیه د افغانستان پخوانی دوست هېواد وباله او د دواړو هېوادونو ترمنځ یې د سوداګریزو او اقتصادي اړیکو پر پراختیا ټینګار وکړ.

د اتاق لومړي مرستیال په هېواد کې د امنیت ټینګښت، د اداري فساد له منځه تلل او د کوکنارو د کښت مخنیوی په افغانستان کې د پانګونې لپاره ښه فرصتونه وبلل او د دواړو هېوادونو له سوداګرو او پانګوالو څخه یې وغوښتل چې په بېلابېلو برخو په ځانګړي ډول په افغانستان کې د کان کیندنې، د کرنې میکانیزه کیدو او د بریښنا په تولید کې ګډې پانګونې وکړي.

ښاغلي امره، افغانستان ته د ترکیې د سوداګریز پلاوي د سفر موخه د دواړو هېوادونو ترمنځ د سوداګرۍ او پانګونې پراختیا، په افغانستان کې د کرنې او مالدارۍ میکانیزه کیدل، د بیخ بنسټیزو پروژو پلي کول او همدارنګه د افغان سوداګرو او پانګوالو سره د سوداګریز پیوستون ناسته وبلله.

ښاغلي شیرین اغا سخي افغانستان ته د ترکیې د سوداګریز پلاوي سفر د سوداګریزو اړیکو او پانګونې د پیاوړتیا په برخه کې یو مهم ګام ګڼلو ترڅنګ، ترکیه یې یو دوست او ورور هېواد وباله او د دواړو هېوادونو ترمنځ یې د ښو سوداګریزو او اقتصادي اړیکو پر درلودلو ټینګار وکړ.

ښاغلي الکوزي د دا ډول غونډو جوړول د دواړو هېوادونو د سوداګرو ترمنځ د ګډې پانګونې لپاره یو ښه فرصت وباله او زیاته يې کړه چې د افغان سوداګرو یوه لویه ستونزه له ترکیې څخه د ویزو د ورکړې په برخه کې د اسانتیاوو نشتوالی دی.

ښاغلي هوتک په افغانستان کې د سوداګرۍ او پانګونې لپاره مناسبو شرایطو ته د اشارې کولو ترڅنګ، له ترکي سوداګرو او پانګوالو وغوښتل چې په افغانستان کې شته فرصتونو ته په پام سره، پانګونه وکړي.

سه شنبه، لیندۍ ۲۱مه، ۱۴۰۲

د  افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د کابل سواګرۍ او پانګونې اتاق لومړي مرستیال ښاغلي احمد شاه حکیمي، د معمار ودانیز شرکت عامل پلاوي رئیس ښاغلي نجیب الله پاینده، د ښار جوړونې او مسکن وزارت د دفتر ریاست مقام، د ښاري چارو رئیس او د هېواد سوداګرو او پانګوالو د معمار ودانیز شرکت تولیداتو معرفۍ کنفرانس کې ګډون وکړ.
 
ښاغلي نجیب الله پاینده د یاد شرکت د فعالیتونو او لاسته راوړنو په اړه چې د کاینات ګروپ شرکت یوه برخه ده، هر اړخیز معلومات وړاندې کړل او زیاته یې کړه "د کاینات ګروپ شرکت په ۲۰۰۲ زیږدیز کال کې په هېواد کې خپل فعالیت پیل کړی او په ودانیزو او سړک جوړونې برخه کې يې په ټول افغانستان کې بیلابیلې پروژې تطبیق کړي دي.  

ښاغلي مهمند د افغانستان اقتصادي وضعیت د ښه کېدو په حال کې وباله او په هېواد کې یې د امنیت د ټینګښت، د کوکنارو د کښت مخنیوی او د اداري فساد له منځه تلل په هېواد کې د پانګونې مناسب فرصتونه وبلل او د کاینات ګروپ له مسؤلینو یې وغوښتل چې، په هیواد کې د زیربنایي پروژو د تطبیق په برخه کې ډیره پانګونه وکړي.

د اتاق لومړي مرستیال د افغانیو د بیې ثبات د کورنیو او بهرنیو سوداګرو او پانګوالو په پانګونې پورې تړلی وباله او د سیمې او نړۍ له هېوادونو سره یې د ټرانزیټي او سوداګریزو اړیکو د پراختیا غوښتنه وکړه.

چهارشنبه، لیندۍ ۱۵مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مالي رئیس ښاغلي شیرین آغا سخي او د مدیره پلاوي غړو هر یو ښاغلي خان جان الکوزي او ضیاءالدین اچکزي د سپین بولدک اتاق رئیس ښاغلي عبدالهادي، د ټوکر اتحاديې له رئیس ښاغلي حاجي عبیدالله او د هېواد یو شمیر سوداګرو سره د اتاق په مرکزي دفتر کې لیدنه ترسره او د دوی د شته ستونزو او حل لارو په اړه يې خبرې اترې وکړې.

سوداګرو خپلې شته ستونزې په کراچۍ بندر کې د افغان سوداګرو د مالونو د درې سوه کانټینرونو د بندېدو، ترانسپورتي ستونزو او له بندر عباس څخه تر افغان پولې پورې د کرایې زیاتوالي، د ګمرکونو ستونزې او نورې ستونزې اتاق له مشرتابه سره شریکې او یادو ستونزو ته د حل مناسبو لارو چارو غوښتنه يې وکړه.  

ښاغلي الکوزي پاکستان ته د اتاق د مشرتابه د تېر سفر یادونه وکړه چې په پایله کې یې شاوخوا درې زره کانټینرونه چې په کراچۍ بندر کې بند پاتې وو، خوشې شول او د اتاق د هڅو په دوام یې د نورو هغو کانتینرونو چې په برښنايي وسایلو، د موټر پرزو او خوراکي موادو بار دي د خلاصون ډاډ ورکړ.   

ښاغلي مهمند سوداګرو ته د ښه راغلاست ویلو او د هغوی د ستونزو اورېدو وروسته زیاته کړه "اتاق تل هڅه کړې چې د هېواد د سوداګرو ستونزې د هېواد له اړوندو مسوولینو سره شریکې کړي او د دوی د ستونزو د حل په ترڅ کې د هېواد سوداګرو ته لا ډېرې اسانتیاوې برابرې کړي."
نوموړي زياته کړه، چې نن يې د پاکستان په کراچۍ بندر کې د درې سوه کانټينر مالونو د بندېدو د ستونزې په اړه له دولتي چارواکو سره خبرې کړې او په پام کې ده، چې د يو شمېر دولتي چارواکو سره به د یادو ستونزو څیړلو او ورته د حل لارو پیداکولو په موخه ناستې وکړي.

ښاغلي شیرین اغا سخي د مالیې وزارت له خوا د رامنځته شوې نوې کړنلارې په اړه معلومات ورکړل او زیاته یې کړه "دغه وزارت به یوه نوې کړنلاره جوړه کړي چې له مخې به یې له ټولو سوداگریزو توکو څخه دوه سلنه اضافي مالیه راټولیږي.

ښاغلي ضیاالدین اچکزي د سپین بولدک اتاق له مشرتابه سره په جلا ناسته کې ژمنه وکړه چې د دوی ستونزې به له اړوندو ادارو سره شریکوي او د حل په موخه به یې هڅې کوي.

سه شنبه، لیندۍ ۲۱مه، ۱۴۰۲