د افغانستان د سوداګرۍ او پانګونې اتاق د افغانستان لپاره د ترکيې نوي سفیر ښاغلي جنک اونال ته د ښه راغلاست، معرفت او ملمستیا مراسم جوړ کړل چې پکې، د چارو ادارې رئیس ښاغلي نورالحق انور، د اقتصادي وزارت سرپرست ښاغلي دین محمد حنیف، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق خدماتي مرستیال ښاغلي نصیر احمد عرب، د اتاق د نړیوالو اړیکو رئیس ښاغلي انجنیر سید جاوید برهان، د ازبکستان سفیر، د ایران سفیر مرستیال، د اتاق مدیره پلاوي غړو هر یو ښاغلي خان جان الکوزي، سید پرویز سادات هوفیاني، داوود یوسفزي، جان آقا صادقي او احمد شکیب احمدیار، د کابل اتاق رئیس ښاغلي سید جمیل سادات، د کابل اتاق لومړي مرستیال ښاغلي احمد شاه حکیمي، د کابل اتاق سوداګریزو چارو مرستیال ښاغلي همایون خواجه زاده، د کابل اتاق مدیره پلاوي غړو او د هېواد یو شمیر مطرح سوداګرو او پانګوالو ګډون درلود.
 
ښاغلي مهمند په افغانستان کې د ترکیې نوي سفیر ته د ښه راغلاست ویلو ترڅنګ، ترکیه د ګډو کلتوري او دیني ارزښتونو لرونکی هېواد وباله او د ترکیې له سفیر څخه یې وغوښتل چې د سوداګریزو اړیکو او ګډې پانګونې په برخه کې لا زیاتې هڅې وکړي.

ښاغلي مهمند د دواړو هېوادونو ترمنځ د سوداګریز انډول د توپیر  پر کمولو ټینګار وکړ او د ترکیې له سفیر څخه یې وغوښتل چې د ترکیې له اړوندو څانګو سره په همغږۍ دې د افغان سوداګریزو توکو لپاره ترجیحي تعرفې وضع کړي.
نوموړي دغه راز له ګاونډیو هېوادونو په ځانګړې توګه د ایران له اسلامي جمهوریت څخه وغوښتل، چې ترکیې ته د افغانستان د ټرانزیټ شرایط اسانه کړي.

ښاغلي مهمند ازبکستان د افغانستان لپاره یو مهم سوداګریز او ترانزیتي هیواد یاد کړ او د دغه هیواد له سفیر څخه یې وغوښتل چې افغان سوداګرو ته د ویزو په ورکولو او د دوه اړخیزو سوداګریزو غونډو په جوړولو کې همکاري وکړي.

د اتاق لومړي مرستیال د افغانستان په رسمیت نه پيژندل، د نړیوالې ټولنې له خوا د افغانانو د پیسو کنګل کیدل او د هېواد سوداګرو ته د ویزو نه ورکول د خصوصي سکتور له لویو ستونزو څخه وبلل او د سیمې او نړۍ له هېوادونو يې وغوښتل چې په دی برخه کې جدي پاملرنه وکړي.   

محترم نورالحق انور د افغانستان خلکو ته خدمت او د زیربنایي پروژو پلي کول د حکومت لومړیتوبونه وګڼل او د نړۍ له هیوادونو سره یې د مثبت تعامل پر بنسټ د حکومت تګلاره بیان کړه.

ښاغلي دین محمد حنیف د افغانستان د سوداګرۍ او پانګونې اتاق له مشرتابه څخه د دغې غونډې د جوړولو له امله مننه وکړه او د هرات د وروستۍ زلزلې له قربانیانو او راستنیدونکو افغان کډوالو سره یې د ترکیې د بشردوستانه مرستو ستاینه وکړه.

ښاغلي جنک اونال د افغانستان د سوداګرۍ او پانګونې اتاق له مشرتابه څخه د دغه ډول غونډې د جوړولو له امله مننه وکړه او د دواړو هېوادونو اړیکې یې دوه اړخیزې وبللې.
نوموړي په افغانستان کې د ټولیز امنیت هرکلی وکړ او دا یې د پانګونې او سوداګرۍ د بهیر د چټکتیا لپاره یو ښه فرصت وباله.

د ترکیې سفیر په ترکیه کې د وروستۍ زلزلې په برخه کې د افغانستان د خصوصي سکتور د مرستو ستایلو ترڅنګ، د افغانستان خلکو ته د ترکيې سفارت ټولو قونسلي خدماتو لکه افغان سوداګرو او پانګوالو ته د ویزو ورکول، د ترکيې او افغانستان ترمنځ د سوداګریزو راکړو ورکړو او یو شمیر نورو برخو کې د هر اړخیزې همکارۍ ډاډ ورکړ.

د ازبکستان سفیر د افغانستان او ازبکستان ترمنځ د سوداګریزو او اقتصادي اړیکو د ښه والي خبر ورکړ او په تېرو وختونو کې یې د دواړو هېوادونو ترمنځ د ترسره شویو ګډو غونډو یادونه وکړه او ژمنه یې وکړه چې د سوداګریزو خدمتونو د وړاندې کولو په برخه کې به لا زیاتې هڅې وکړي.

د افغانستان لپاره د ایران مرستیال سفیر د بشردوستانه مرستو برابرولو، سوداګریزو او پانګه ایزو چارو، ریل پټلۍ او ټرانزیټ برخه کې د هوکړه لیکونو لاسلیکولو څخه د ایران اسلامي جمهوریت د چمتووالي خبر ورکړ او د ایران له لارې د افغان سوداګرو ټرانزيټ برخه کې يې د لازمو آسانتیاوو رامنځته کولو ژمنه وکړه.

پنجشنبه، لیندۍ ۳۰مه، ۱۴۰۲

د خصوصي سکتور غړو د کابل نړیوال هوايي ډګر  مشرتابه سره په همغږۍ د ۷ عام المنفعه پروژو تطبیق او پیل د یو لړ مراسمو په ترڅ کې، چې د افغانستان اسلامي امارت ریاست الوزراء اقتصادي مرستیال، د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د سوداګریزو چارو مرستیال ښاغلي خیرالدین مایل احمدي، د مدیره پلاوي غړو هر یو ښاغلي خان جان الکوزي، سید پرویز سادات هوفیاني او احمد شکیب احمدیار، د عامل پلاوي رئیس ښاغلي میرویس هوتک، د ټرانسپورټ او هوايي چلند وزارت معین، د کابل سوداګرۍ اتاق لومړي مرستیال ښاغلي احمد شاه حکیمي او د هېواد یو شمیر سوداګرو او پانګوالو پکې ګډون درلود، ولمانځه او یادې پروژې يې ګټې اخیستنې ته چمتو وبللې.

د ټرانسپورټ وزارت مرستیال د دې مراسمو ګډونوالو ته د ښه راغلاست ویلو ترڅنګ، د هېواد د مشهورو سوداګرو او پانګوالو له لوري د پلي شویو پروژو په اړه هر اړخیز معلومات وړاندې کړل او د یادو پروژو د پلي کېدو له امله یې د هغو څخه مننه وکړه.

د ریاست الوزراء اقتصادي مرستیال د هېواد په اقتصادي وده او پرمختګ کې د سوداګرو او پانګوالو رول مهم وباله او له ټولو کورنیو او بهرنیو سوداګرو یې وغوښتل چې د پانګونې له شته فرصتونو ګټه پورته کړي او د زیربنایي پروژو په تطبیق کې فعاله ونډه واخلي.

ښاغلي مهمند د هېواد وده او پرمختګ په ټولیز امنیت پورې تړلی وباله او د هېواد د نړیوالو هوايي ډګرونو معیاري کول یې د سوداګرۍ په زیاتوالي کې مهم وګڼل.
نوموړي له افغان سوداګرو او پانګوالو وغوښتل، چې د هېواد د ابادۍ  په برخه کې له حکومت سره اوږه په اوږه کار وکړي.

دوشنبه، لیندۍ ۲۷مه، ۱۴۰۲

د افغانستان د سوداګرۍ او پانګونې اتاق افغان سوداګرو او پانګوالو ته په سوداګریزو راکړو ورکړو کې د لازمو آسانتیاوو رامنځته کولو او د شته ستونزو حل په موخه د عزیزي بانک مسؤلینو سره ناسته جوړه چې پکې د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک، د عزیزي بانک بازار موندنې رئیس ښاغلي محمد انور رضا، د اتاق حقوقي سلاکار ښاغلي عبدالسلام کوهي، د اتاق د غړو او صادراتو پراختیا ډیپارټمنټونو مسؤلینو  او یو شمیر سوداګرو او پانګوالو ګډون درلود.

ښاغلي هوتک د هېواد په اقتصادي وده او پرمختګ کې د خصوصي بانکونو رول مهم وباله او عزیزي بانک یې په هېواد کې یو له فعالو بانکونو څخه وباله او سوداګرو او پانګوالو ته یې د سوداګریزو خدمتونو په وړاندې کولو کې د دغه بانک د هڅو ستاینه وکړه.
نوموړي د دغه بانک له مشرتابه پلاوي وغوښتل، چې په هېواد کې د سوداګرو او پانګوالو د بانکي زېرمو د ورکړې په برخه کې جدي پاملرنه وکړي.

د هېواد سوداګرو او پانګوالو  په یاد بانک کې د دوی د پیسو کنګل کیدل، د هېواد په بندرونو کې د فعالو استازولیو نشتوالی، د سیمې او نړۍ هېوادونو ته د پیسو د لېږد لپاره د لازمو اسانتیاوو نشتوالی د دوی له عمده ستونزو څخه وبلل او د عزیزي بانک له مسؤلینو یې وغوښتل چې د یادو ستونزو د حل په برخه کې عملي ګامونه پورته کړي.

ښاغلي محمد انور رضا د عزیزي بانک د فعالیتونو، تاریخ، لاسته راوړنو، د سیمې او نړۍ هېوادونو ته د پیسو د انتقال د څرنګوالي، انلاین خدمتونو، د اسعارو د تبادلې، د کوچنیو پورونو د ورکړې په اړه د معلوماتي پریزنټیشن وړاندی او د شته ستونزو حل برخه کې يې د خپلې همکارۍ ډاډ ورکړ.

سه شنبه، لیندۍ ۲۸مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق مالي رئیس ښاغلي شیرین آغا سخي، د مد یره پلاوي غړو هر یو ښاغلي خان جان الکوزي او جان آقا صادقي، د عامل پلاوي سرپرست رئیس ښاغلي میرویس هوتک، د عامل پلاوي پالیسۍ او تخنیکي مرستیال ښاغلي محمد انور عارفي او د کابل سوداګرۍ اتاق سوداګریزو چارو  مرستیال ښاغلي همایون خواجه زاده د ترانسپورټ اتحاديې له مسؤلینو سره لیدنه ترسره او د دوی شته ستونزې يې واوریدې.

د ټرانسپورټ اتحادیې مسؤلین له ګاونډیو هېوادونو سره د سوداګرۍ او ټرانزیټ لپاره د معیاري میکانیزم نشتوالی، د مالیې وزارت له لوري د ۱۳۹۵-۱۳۹۹ مالياتو بیا څېړنه، په خصوصي بانکونو په ځانګړې توګه میوند بانک کې د سوداګرو د پیسو کنګل کېدل او د کراچۍ بندر کې له ۵۰۰ څخه د ډیرو کانتینرونو متوقف کیدل له خپلو عمده ستونزو څخه وبلل او د یادو ستونزو په حل کې يې د اتاق د هر اړخیزې همکارۍ غوښتنه وکړه.

ښاغلي مهمند د ټرانسپورټ اتحادیې د مسؤلینو د ستونزو او ننګونو له اورېدو وروسته د افغانستان د سوداګرۍ او پانګونې اتاق د هېواد د ټولو سوداګرو او پانګوالو ګډ کور وباله او د ټرانسپورټ اتحادیې له مسؤلینو یې وغوښتل چې خپلې ستونزې په لیکلې بڼه اتاق وسپاري څو اتاق يې د حل برخه کې لازم ګامونه پورته کړي.  

ښاغلي مهمند د تېرو کلونو د مالیاتي اسنادو د بیا څېړلو او په یوه بڼه د مالیاتو د راټولولو په برخه کې د ستونزو د حل په موخه د اتاق د مشرتابه له هڅو خبر ورکړ او زیاته یې کړه "د پورته ستونزو حل په موخه د مشرتابه مقام دفتر لخوا د سکتوري وزارتونو ګډه کمېټه رامنځته کړې شوې ده څو یادو ستونزو ته د پای ټکی کیږدي."
نوموړي ژمنه وکړه چې، د لوړ تناژ ټرانسپورټي وسایطو مهالویش او  لارې تنظیمولو موضوع به د ټرانسپورټ او هوايي چلند او صنعت او سوداګرۍ وزارتونو او د ریاست الوزراء اقتصادي کمیسیون سره شریکه کړي.

یکشنبه، لیندۍ ۲۶مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار او د اتاق دارالإنشاء رئیس ښاغلي خان محمد سرفراز باز  په دوحه کې د افغانستان اسلامي امارت سیاسي دفتر رئیس ښاغلي سهیل شاهین سره د لیدنې په ترڅ کې، د سوداګرو شته ستونزو او په هېواد کې د سوداګرۍ پراختیا بهیر څرنګوالي په اړه خبرې اترې وکړې.

ښاغلي احمدیار د افغانستان د سوداګرۍ او پانګونې اتاق د فعالیتونو او لاسته راوړنو په اړه مفصل معلومات وړاندې کړل او په هېواد کې یې د سوداګرۍ د ودې بهیر د ښه کېدو په حال کې وباله. هغه له ښاغلي شاهین څخه وغوښتل چې د هېواد په بهرني سیاست کې اقتصادي او سوداګریزو پروګرامونو ته لومړیتوب ورکړي.

ښاغلي سرفراز باز په هېواد کې بانکي راکړې ورکړې د بهیر ښه والي ته اشاره وکړه او د سوداګرو عمده ستونزې یې د ځینو هېوادونو له خوا د ویزو نه ورکول او د سیمې له هېوادونو سره د دوه اړخیزو او څو اړخیزو ټرانزیټي تړونونو نشتوالی وباله.

ښاغلي شاهین د افغانستان د سوداګرۍ او پانګونې اتاق د مشرتابه د پلانونو او نظریاتو له اورېدو وروسته ژمنه وکړه چې د سوداګرو لپاره د ویزو د ورکړې او د سیمې او نړۍ له هېوادونو سره د ټرانزیټي تړونونو د لاسلیکولو په برخه کې به هڅې وکړي او یاده موضوع به د افغان حکومت له مشرتابه سره شریکه کړي.

دوشنبه، لیندۍ ۲۷مه، ۱۴۰۲