د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د مدیره پلاوي سلاکار ښاغلي عبدالرحمن زیرک يې ملتیا کوله، د افغانستان لپاره د ترکيې له سفیر ښاغلي سینک اونال سره لیدنه ترسره او د ټرانزیټ، ټرانسپورټ، سوداګریزو او اقتصادي مسایلو په اړه يې خبرې اترې وکړې.

ښاغلي مهمند د افغانستان سوداګرۍ او پانګونې اتاق او په ټوله کې افغان خصوصي سکتور سره د ترکيې سفارت دوامداره او بی سارې همکارۍ وستایلې او  د افغان – ترکيې ګډ اتاق رامنځته کیدل يې د سوداګریزو اړیکو او همکاریو غښتلتیا برخه کې اړین بللو ترڅنګ، په دی برخه کې يې د ترکيې سفارت د همکاریو غوښتنه وکړه.

دغه راز په دې کتنه کې دواړو لورو د ايران- افغانستان د اورګاډي د لارې د ترانزيتي او ترانسپورتي مسئلو په باب خبرې وکړې او ټينګار يې وکړ چې دغه لاره ډيره مهمه ده او د دواړو هېوادونو ترمنځ د سوداګريزو اړيکو په پراختيا کې مهم رول لوبولى شي.

د دې ناستې په پای کې ښاغلي سینک اونال په یادو برخو کې د ترکیې سفارت د هر اړخیزې همکارۍ ډاډ ورکړ او ژمنه یې وکړه چې د افغانستان او ترکیې ترمنځ د دوه اړخیزو اړیکو د پیاوړتیا او د سوداګریزو همکاریو د لا پیاوړې کولو لپاره به خپلې ټولې هڅې وکړي.

دغه غونډه د دواړو هېوادونو ترمنځ د اقتصادي او سوداګريزو همکاريو د پياوړتيا لپاره يو مثبت ګام بلل شوى دى.

سه شنبه، مرغومي ۲۵مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې د هېواد یو شمیر د غالیو او وینځونکو توکو واردوونکو يې ملتیا کوله د  ګمرکونو له عمومي رئیس لیدنه ترسره او د غالیو او وینځونکو توکو په لوړې تعرفې يې خبرې اترې وکړې.

ښاغلي مهمند په غالیو او وینځونکو توکو د لوړې تعرفې خبره مطرح او د ګمرکونو له عمومي رئیس څخه يې غوښتنه وکړه چې د غالیو او وینځونکو توکو لپاره په ټاکل شویو کوډونو بیا کتنه وکړي.

د ګمرکونو عمومي رئیس ښاغلي مهمند او ورسره سوداګرو ته د ښه راغلاست ویلو ترڅنګ، په سوداګریزو توکو د ګمرکي محصول لوړوالي دلیل د ګمرکونو عمومي ریاست له لوري د نویو کوډونو ټاکل وښودل او له سوداګرو يې غوښتنه وکړه چې د خپلو شرکتونو مخینه او د سوداګریزو توکو انوایسونه د ګمرکونو عمومي ریاست وسپاري څو د ګمرکونو عمومي ریاست د اتاق او اړوندو حکومتي ادارو سره په همغږۍ ورته د حل مناسبې لارې چارې ولټوي.

یکشنبه، مرغومي ۱۷مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند خوست او پکتیا ولایتونو ته د خپل کاري په سفر په ترڅ کې په داسی حال کې چې، د چارو ادارې پانګونې عمومي رئیس ښاغلي انجنیر احمد ضیاء خالد، د صرافانو اتحاديې رئیس ښاغلي بهرام خان، د خوست ولایتي اتاق رئیس ښاغلي شهباز خان، د پکتیا ولایتي اتاق رئیس ښاغلي عزیزالله ګردیزي، د پکتیا ولایت سوداګرو اتحاديې مرستیال ښاغلي اقبال ولي، د پکتیا ولایتي اتاق عامل مدیر ښاغلي حسیب الله ګردیزي،  د اتاق ستر سلاکار ښاغلي سردارولي پښتون، سوداګرو، پانګوالو او د خوست ولایت د روغتیا، کرنې، ښارجوړنې او اراضي برخو مسؤلینو يې ملتیا کوله په جلا ناستو کې د یادو ولایتونو له سوداګرو سره لیده کاته وکړل او د دوی د شته ستونزو په اړه يې خبرې اترې وکړې.

د يادو دوو ولايتونو سوداګر له ګردېز ښار څخه تر ډنډ پټان ولسوالۍ پورې د معياري سړک نشتوالى، له مرکز څخه د دغو ولايتونو تر پولو پورې د ګمرک د لېږد، په ګمرک کې د خوراکي توکو د معياري لابراتوارونو نشتوالى، د یادو ولایتونو مستوفیتونو له لوري د مالیاتو بیا څیړنه، د مچلغو بند جوړول، په ګمرکونو کې د معياري سکنرونو نشتوالى، د يادو ولايتونو په بندرونو کې د اور وژنې نشتوالى، د صنعتي پارکونو نشتوالى او د یو لوی نندارتون په جوړولو کې چې ټول کورني تولیدات په دایمي توګه نندارې ته کېښودل شي یادونه وکړه او د اتاق له لومړي مرستیال او د چارو ادارې پانګونې رئیس څخه يې په یادو برخو کې د همکارۍ غوښتنه وکړه.  

ښاغلي مهمند د یادو ولایتونو د سوداګرو د ستونزو له اورېدو وروسته د یادو ولایتي اتاقونو مسؤلینو ته دنده وسپارله چې د یادو سوداګرو ستونزې په لیکلي ډول مرکزي اتاق ته واستوي، تر څو په اړه یې عملي ګامونه پورته شي.

د اتاق لومړي مرستیال د لویو سوداګریزو مرکزونو پر جوړولو ټینګار وکړ چې ټول کورني تولیدات په کې په دایمي توګه نندارې ته وړاندې شي او د یادو ولایتونو له ټولو سوداګرو او پانګوالو یې وغوښتل چې د دغه ډول مرکزونو په جوړولو کې له اتاق سره همکاري وکړي.

د چارو ادارې پانګونې رئیس د هېواد په لویو بندرونو کې د معیاري لابراتوارونو د جوړېدو یادونه وکړه او د یادو ولایتونو د سوداګرو د ستونزو د حل په برخه کې یې د هر اړخیزې همکارۍ ډاډ ورکړ.

دوشنبه، مرغومي ۲۵مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د عامل پلاوي نړیوالو اړیکو مسؤل ښاغلي امید غفورزي د افغانستان لپاره د جاپان له سفیر ښاغلي کورومیا تاکایوشي  سره لیدنه ترسره او د سوداګریزې پراختیا، پانګونې فرصتونو او افغان سوداګرو لپاره د ویزو صادرولو په اړه خبرې اترې وکړې.

ښاغلي مهمند د افغانستان له خلکو سره د جاپان د سخاوتمندانه مرستو او په هېواد کې د زیربنایي پروژو تطبیق وستایه او د سوداګرۍ او پانګونې اتاق د فعالیتونو او په افغانستان کې د پانګونې د شته فرصتونو په اړه  د معلوماتو ورکولو ترڅنګ، په هېواد کې د ټولیز امنیت او سولې تامین، په دولتي ادارو کې د فساد نشتوالی او د کوکنارو د کښت مخنیوی په افغانستان کې د بهرنیو پانګوالو لپاره د پانګونې ښه فرصتونه وبلل.
نوموړي د جاپان له سفير څخه وغوښتل، چې چاپانې سوداګر او پانګوال وهڅوي، چې د افغانستان د کانونو، انرژۍ او کرنې په برخو کې پانګونه وکړي.

د اتاق لومړي مرستيال د دواړو هېوادونو ترمنځ د سوداګرۍ پراختيا په ځانګړي ډول د وارداتو او صادراتو په برخه کې شته فرصتونو ته اشاره وکړه او افغان سوداګرو ته يې د ويزې د ورکړې د اسانتياوو نشتوالى د دواړو هېوادونو ترمنځ د سوداګرۍ د پراختيا پر وړاندې له سترو ننګونو څخه وباله او د جاپان له سفیر څخه يې په دی برخه کې د لازمې همکارۍ غوښتنه وکړه.

ښاغلي مهمند وړاندیز وکړ چې د جاپان سفارت دې افغان سوداګریز پلاوي ته جاپان ته د سفر کولو زمینه برابره کړي څو وکولی شو د جاپان له اتاق سره سوداګریز هوکړه لیکونه لاسلیک کړو او همدارنګه یې د جاپان محترم سفیر ته بلنه ورکړه چې د افغانستان د سوداګرۍ او پانګونې اتاق ته راشي او له افغان سوداګرو سره له نږدی وګوري.  

ښاغلي کورومیا تاکایوشي د افغانستان له خلکو سره د خپلو مرستو د دوام ډاډ ورکړ او له افغانستان سره یې د سوداګریزو اړیکو پر پیاوړتیا ټینګار وکړ. نوموړي همدا راز ژمنه وکړه، چې افغان سوداګرو ته به جاپان ته د تګ زمینه برابره کړي او جاپاني پانګوال به وهڅوي، چې په افغانستان کې پانګونه وکړي.

یکشنبه، مرغومي ۱۷مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند خوست ولایت ته د خپل کاري په سفر په ترڅ کې په داسی حال کې چې، د چارو ادارې پانګونې عمومي رئیس ښاغلي احمد ضیاء خالد، د صرافانو اتحاديې رئیس ښاغلي بهرام خان، د خوست ولایتي اتاق رئیس ښاغلي شهباز خان د اتاق ستر سلاکار ښاغلي سردارولي پښتون، سوداګرو، پانګوالو او د خوست ولایت د روغتیا، کرنې، ښارجوړنې او اراضي برخو مسؤلینو يې ملتیا کوله په جلا ناستو کې د خوست ولایت مقام له سرپرست او د یاد ولایت علماو شورا له غړو سره لیدنه ترسره او د سرطاني ناروغیو ضد روغتون جوړولو، د ځمکې استملاک او د ځواب ویونکي پروپوزل برابرولو په اړه خبرې اترې وکړې.
 
ښاغلي مهمند د خوست ولایت د خلکو دغه نوښت او خیر ښیګڼه چې غواړي د سرطاني ناروغیو ضد روغتون جوړ کړي وستایه او د یاد روغتون د جوړولو څرنګوالي، عملیاتي پلان او یو شمیر نورو اړوندو مسایلو په اړه مفصل معلومات وړاندی کړل.
نوموړي د دغه روغتون جوړول د سرطاني ناروغیو درملنې برخه کې اړین وګڼل او له اړوندو دولتي ادارو څخه يې وغوښتل چې په دې برخه کې عملي ګامونه پورته کړي، څو د ياد روغتون د جوړېدو چارې ګړندۍ شي.

سربیره پردی، د اتاق لومړي مرستيال خوست يو له صنعتي، ټرانزيټي او سوداګريزو ولايتونو څخه وباله او په دغه ولايت کې يې د صنعتي پارکونو او دایمي نندراتون چې د هېواد کورني تولیدات نندارې ته کیږدي د جوړېدو غوښتنه وکړه.

دخوست ولايت مقام د اتاق لومړي مرستيال او ورسره ملګري ټيم ته د ښه راغلاست ويلو په ترڅ کې په هېواد کې د روغتونونو او روغتيايي مرکزونو جوړول د دولت د کاري پلانونو په لومړيتوبونو کې ياد کړل او د ورته روغتونونو جوړول يې هېوادوالو ته د روغتیا برخه کې د لا ښو خدمتونو وړاندی کولو په موخه اړین او ضروري وبلل.  
نوموړي په دې برخه کې دخوست ولايت اړوندو ادارو  د هر اړخيزو همکاريو ډاډ ورکړ.

ښاغلي خالد وویل چې له دغه سفر څخه یې موخه د سرطان ناروغۍ د درملنې لپاره د معیاري روغتون د عملي کار پیل دی چې، د هېواد د ملي سوداګرو له خوا جوړېږي. نوموړي په دې برخه کې دخوست ولايت مقام څخه د هر اړخېزې همکارۍ غوښتنه وکړه.

په پای کې، د خوست علماو شورا غړو د ورته روغتونونو جوړول ښاریانو ته د روغتیايي خدماتو وړاندی کولو برخه کې اړین ګام وباله او د خپلې هر اړخیزې همکارۍ ژمنه يې وکړه.

یکشنبه، مرغومي ۲۴مه، ۱۴۰۲