د افغانستان د سوداګرۍ او پانګونې اتاق مدیره پلاوي دریمې دورې څلورویشتمه ناسته د اتاق د عمومي رئیس ښاغلي توکل احمدیار په مشرۍ او د اتاق لومړي مرستیال ښاغلي محمد یونس مهمند، د سوداګریز چارو مرستیال ښاغلي خیرالدین مایل احمدي، د خدماتي چارو مرستیال ښاغلي نصیر احمد عرب، د اتاق د دارالانشاء رئیس ښاغلي خان محمد سرفراز باز، مالي رئیس ښاغلي شیرین آغا سخي، د نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ذکریا بریالي، ضیاءالدین اچکزي، عصمت الله وردګ، آذرخش حافضي، محمد داود یوسفزي، جان آقا صادقي، محمد ګردیزي، سید پرویز سادات هوفیاني، بهادر خیرخواه، فواد احمد دوست او احمد شکیب احمدیار، د اتاق عامل پلاوي سرپرست ښاغلي میرویس هوتک، د اتاق د څارنې پلاوي رئیس ښاغلي عبدالحامد حمیدي، د څارنې پلاوي منشي ښاغلي عبدالمتین قلندري او د اتاق څارنې پلاوي غړي ښاغلي محمد ناصر صمیم په ګډون د افغانستان د سوداګرۍ او پانګونې اتاق مدیره پلاوي په دفتر کې ترسره شوه.

په پیل کې، د څلورویشتمې ناستې د اجنډا موضوعګانې او د در ویشتمې ناستې مصوبات او د یادې ناستې د محتویاتو لاسلیک د دارالانشاء رئیس ښاغلي خان محمد سرفراز باز لخوا د ناستې ګډونوالو ته وړاندې کړی شول.  

ورپسې د عامل پلاوي سرپرست رئیس ښاغلي میرویس هوتک د عامل پلاوي راپورونه د ناستې ګډونوالو ته وړاندی کړل چي د مدیره او عامل پلاوو وړاندیزونو په اړه تر هر اړخیز بحث وروسته، لازمې پریکړې ونیول شوې.

شنبه، کب ۱۹مه، ۱۴۰۲

د افغانستان د سوداګرۍ او پانګونې اتاق د سیمې او نړۍ هېوادونو سره د سوداګریزو اړیکو پراختیا او اقتصادي ودې په موخه، دا ځل د قرغیزستان هېواد سره د سوداګریزو پیوستون ناسته جوړه چې، د افغانستان د سوداګرۍ او پانګونې اتاق مدیره پلاوي سوداګریزو چارو مرستیال ښاغلي خیرالدین مایل احمدي، په افغانستان کې د قرغیزستان سفیر ښاغلي دانیارژولچیف، د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک، د اتاق عامل پلاوي پالیسۍ او تخنیکي مرستیال ښاغلي محمد انور عارفي، د قرغیزستان د اقتصاد وزیر سلاکار ښاغلي عظمت مامبکوف، د قرغیزستان د صنعت ادارې رئیس ښاغلي ارسلان بیک بازیف او د دواړو هېوادونو سوداګرو او پانګوالو پکې ګډون درلود.

ښاغلي میرویس هوتک د قرغیزستان سفیر، د هغه ملګرو او د دې ناستې ګډونوالو ته د ښه راغلاست ویلو ترڅنګ، د دغه ډول غونډې جوړېدل د افغانستان او قرغیزستان ترمنځ د سوداګریزو اړیکو د پراختیا، ګډې پانګونې او اقتصادي ودې لپاره ښه زمینه وبلله او په راتلونکي کې يې د ورته غونډو د دوام غوښتنه وکړه.  

ښاغلي خیرالدین مایل احمدي د دواړو هېوادونو ترمنځ د سوداګریزو او اقتصادي اړیکو پر اهمیت خبرې وکړې او د دواړو هېوادونو ترمنځ یې د سوداګریزو او اقتصادي اړیکو په برخه کې د لا زیاتو اسانتیاوو په رامنځته کولو ټینګار وکړ.

نوموړي همدارنګه، د افغانستان، قرغیزستان او ازبیکستان هېوادونو ترمنځ د ګډو درې اړخیزو هوکړه لیکونو د لاسلیک، له قرغیزستان څخه د موټر واردونکو لپاره د تګ راتګ د زمینې برابرولو، د افغان-قرغیزستان د ګډ سوداګریز کور د جوړولو او د ګډ نندارتون په جوړیدو چې ټول کورني تولیدات پکې نندارې ته وړاندې شي ټینګار وکړ.

ښاغلي دانیار ژولچیف د دغې غونډې د جوړولو له امله د افغانستان د سوداګرۍ او پانګونې اتاق د هڅو ستاینه وکړه او افغانستان ته د موټرونو او پرزو د صادراتو په ګډون په بېلابېلو سکتورونو کې د قرغیزستان د سوداګرو او پانګوالو د لېوالتیا او چمتووالي یادونه وکړه.
نوموړي افغان سوداګرو ته د اسانتیاوو په رامنځته کولو کې د همکارۍ ډاډ ورکړ.

د موټر واردونکو له قرغیزستان څخه افغانستان ته د تیز رفتار موټرو د واردولو د څرنګوالي په اړه خپل نظریات وړاندې کړل او قرغیزستان ته یې د موټر واردونکو لپاره د سوداګریز سفر، د موټرونو له فابریکو څخه د لیدنې او سوداګریزو تړونونو د لاسلیک غوښتنه وکړه.

په پای کې د قرغیزستان د موټر جوړولو فابریکې تخنیکي مسؤلینو د معلوماتي پریزنټیشن په ترڅ کې د موټرونو د بېلابېلو ډولونو د تولید او د هغو د پرزو د تولید په اړه د غونډې ګډونوالو ته هر اړخیز توضیحات او معلومات وړاندل کړل.

پنجشنبه، کب ۱۷مه، ۱۴۰۲

د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي د بهرنیو چارو وزارت مسؤلینو، د اتاق عامل پلاوي سرپرست رئیس ښاغلي میرویس هوتک او د هېواد یو شمیر سوداګرو په ملتیا د افغانستان لپاره د هندوستان ځانګړي استازي ښاغلي جي پي سنګ سره د بهرنیو چارو وزات انګړ کې لیدنه ترسره او د افغان سوداګرو لپاره د ویزو صدور او نورو ټرانزیټي او سوداګریزو موضوعګانو په اړه یې خبرې اترې وکړې.
 
ښاغلي مایل احمدي د افغان سوداګرو سوداګریزې او ترانزیتي ستونزې په ځانګړې توګه یادو سوداګرو ته د هند د ویزې د نه لاسرسي او دغه راز په واګه بندر کې د ټرانزیټي ستونزو یادونه وکړه او یادې ستونزې د افغانستان او هندوستان سوداګرۍ پر لاره سترې ننګونې وبللې.
نوموړي له ښاغلي جي پي سنګ څخه وغوښتل چې د دواړو هېوادونو ترمنځ د سوداګرۍ د پراختيا او د ترانزيټي ستونزو د حل او د افغان سوداګرو لپاره د ويزې د ورکړې په برخه کې د اسانتياوو په برابرولو کې هر اړخیزه همکاري وکړي.

ښاغلي جي پی سنګ د ښاغلي مایل د خبرو له اورېدو وروسته ژمنه وکړه چې د افغان سوداګرو شته ستونزې به د خپل هېواد له مشرتابه سره شریکې کړي او هڅه به وکړي چې د افغان سوداګرو ستونزو په ځانګړې توګه د ویزو د صدور ستونزې حل برخه کې به کوټلي ګامونه پورته کړي.

جمعه، کب۱۸مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار په داسی حال کې چې د اتاق مدیره پلاوي غړو ښاغلي سید پرویز سادات هوفیاني ،عصمت الله وردک، جان آقا صادقی او بهادر خیرخواه، د نیمروز ولایتي اتاق رئیس ښاغلي عبیدالله نورزي، د هرات ولایتي اتاق رئیس ښاغلي محمد یونس قاضي زاده، د بلخ ولایتي اتاق رئیس ښاغلي اسدالله اسدي، د هرات ولایتي اتاق مرستیال ښاغلي عبدالطیف قناویزیان او د هېواد یو شمیر سوداګرو او پانګوالو يې ملتیا کوله په "افغان – ترکمن سوداګریز نندارتون" او کنفرانس کې چې د ترکمنستان په عشق آباد کې جوړ شوی وو ګډون وکړ.    

ښاغلي احمدیار یاد کنفرانس او نندارتون د دوه اړخیزو سوداګریزو او اقتصادي اړیکو پراختیا او غښتلتیا برخه کې اړین وبلل او د ورته ګډو کنفرانسونو او نندارتونونو د په لاره اچولو غوښتنه يې وکړه.

ښاغلي احمدیار د پخوا راهیسې د افغانستان او ترکمنستان دوستانه اړیکو ته په اشارې کولو سره، د یادو دوستانه اړیکو پر دوام، سوداګریزو راکړو ورکړو کې د لازمو آسانتیاوو پر رامنځته کولو، افغان سوداګرو ته د ویزو په صادرولو، په سیمه ایزو زیربنايي پروژو تطبیق برخه کې د افغان خصوصي سکتور په ښکیلولو او د دواړو هېوادونو د خصوصي سکتورونو په ګډو پانګونو يې ټینګار وکړ.

ښاغلي احمدیار د نندارتون پرانیستې مراسمو وروسته، په نندارتون کې د افغانستان او نورو هېوادونو له غرفو څخه لیدنه ترسره او د افغان سوداګرو او پانګوالو ستونزې او وړاندیزونه يې واوریدل.

د یادونې وړ ده چې، په یاد نندارتون کې کابو ۳۰۰ افغان او بهرنیو شرکتونو ګډون درلود چې له دی ډلې څخه ۱۵ سوداګرو میرمنو هم خپل تولیدات نندارې ته کیښودلي وو.

دوشنبه، کب ۱۴مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار او د اتاق لومړي مرستیال ښاغلي محمد یونس مهمند په استانبول ښار کې د "افغانستان همغږۍ ګروپ" کنفرانس کې د ګډون کولو ترڅنګ، په هېواد کې د خصوصي سکتور اوسني وضعیت او شته پانګه ایزو فرصتونو په اړه خبرې اترې وکړې.
 په یاد کنفرانس کې د افغانستان همکارو نړیوالو سازمانونو او مؤسسو لکه نړیوال بانک، اروپايي اتحادیه او ملګرو ملتونو استازو او د افغانستان د پراختیايې پروژو بسپنه ورکوونکو هم ګډون درلود.
 
په یاد کنفرانس کې، چې په افغانستان کې د پراختیايي پروژو د مالي ملاتړ کوونکو بنسټونو له خوا جوړ شوی و، د تېر کال په ترڅ کې د افغانستان پر عمومي او اقتصادي وضعیت، د شته ننګونو او فرصتونو په اړه بحث او خبرې وشوې او په افغانستان او  سیمه کې د پراختیایي پروژو تطبیق او د مرستو پر دوام ټینګار وشو.

ښاغلي توکل احمدیار د افغانستان د خصوصي سکتور د اوسني وضعیت، د پراختیایي پروژو د وضعیت، په بېلابېلو برخو کې د نړیوالو مؤسسو د فعالیتونو او په هېواد کې د پانګونې د شته فرصتونو په اړه خبرې وکړې او د پانګونې د شته فرصتونو او د نسبي ودې په اړه یې د خوشبینۍ څرګندونه وکړه.
نوموړي د تیرو کلونو په پرتله د افغانستان د صادراتو زیاتوالي ته د اشارې کولو په ترڅ کې، د افغانستان له مالي ملاتړ کوونکو بنسټونو وغوښتل، چې خپلې پروژې او فعاليتونه بېرته پيل کړي، څو هېواد اقتصادي پرمختګ ته ورسېږي او د افغانستان خلکو ته د کار زمينه برابره شي.

ښاغلي مهمند په افغانستان کې د سوداګرۍ او پانګونې د شته فرصتونو په اړه خبرې وکړې او د ټولیز امنیت تامین، د اداري فساد نه شتون او د کوکنارو د کښت مخنیوی یې د پانګونې او د لویو زیربنایي پروژو د تطبیق لپاره یو ښه فرصت وباله.
نوموړي دغه راز له مالي ملاتړ کوونکو بنسټونو او نړيوالو مؤسسو څخه وغوښتل چې له شته فرصت څخه په استفادې په افغانستان کې د پراختيايي پروژو پلي کولو ته دوام ورکړي.

همدارنګه په دې ناسته کې د پراختیايي او سیمه ییزو پروژو په برخه کې د نړیوالو بنسټونو او مالي ملاتړ کوونکو بنسټونو مسؤلینو او استازو په خپلو بېلابېلو اړوندو مسایلو خبرې وکړې او د پراختیايي او اقتصادي پروژو د تطبیق په برخه کې یې د خپلو مرستو پر دوام ټینګار وکړ او نړیوال بانک په روان زیږدیز کال کې د (کاسا ۱۰۰۰) پروژې د پیل خبر ورکړ.

پنجشنبه، کب ۱۷مه، ۱۴۰۲