د افغانستان د سوداګرۍ او پانګونې اتاق دارالإنشاء رئیس ښاغلي خان محمد سرفراز باز د عامل پلاوي سرپرست رئیس ښاغلي میرویس هوتک او د عامل پلاوي تخنیکي او پالیسۍ مرستیال ښاغلي محمد انور عارفي په حضور کې، د عامل پلاوي مختلفو ډیپارټمنټونو آمرینو او کارکوونکو سره لیدنه ترسره او د کارونو ښه تدبیر، چارو سمون، په سپارل شویو دندو کې صداقت، اخلاص او مسلکیتوب او د مشرتابه پلاوي له پالیسۍ او پریکړو ملاتړ او ورته غاړه ایښودنې په اړه يې خپلې رغنده سپارښتنې وکړې.

ښاغلي خان محمد سرفراز باز د کوچني اختر مبارک باد ویلو ترڅنګ، د خصوصي سکتور غړو ته په ښو او صادقانه خدماتو وړاندی کولو، د اتاق مشرتابه پلاوي په همکارۍ د سوداګرو ستونزو ته د حل لارو په پیداکولو او د کارکوونکو خپلو ورځنیو کارونو ته په ژمنتیا ټینګار وکړ.

ښاغلي میرویس هوتک د عامل پلاوي کارکوونکو په استازولۍ د دارلإنشاء رئیس ښاغلي خان محمد سرفراز باز ته د سوداګرو ستونزو حل، ورځنیو چارو په ښه ډول ترسره کولو او د مشرتابه پلاوي د پریکړو څخه د اطاعت کولو ډاډ ورکړ.

دوشنبه، وري ۲۷مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق عامل پلاوي پالیسي او تخنیکي مرستیال ښاغلي محمد انور عارفي د افغانستان لپاره د قزاقستان د سوداګرۍ کور له رئیس ښاغلي ارمان یاسینتایف سره د لیدنې په ترڅ کې، د دواړو هېوادونو ترمنځ د سوداګريزو او اقتصادي اړیکو په پراختیا او غښتلتیا خبرې وکړې.

ښاغلي ارمان له افغانستان څخه قزاقستان ته د سوداګریزو توکو په ځانګړي ډول د وچې مېوې او نورو خامو موادو د صادراتو او وارداتو په برخه کې د قزاق سوداګرو د لیوالتیا خبر ورکولو ترڅنګ، د ګډو نندارتونونو او سوداګریزو ناستو جوړولو برخه کې يې د اتاق د هر اړخیزې همکارۍ غوښتنه وکړه.  

ښاغلي مهمند ښاغلي ارمان ته د ښه راغلاست ویلو وروسته، قزاقستان یو پخوانی دوست او د دیني او کلتوري مشترکاتو، اقتصادي، سوداګریزو او ټرانزیټي اړیکو لرونکی هېواد وباله او په یاده برخه کې يې د اتاق هر اړخیزې همکارۍ ډاډ ورکړ.

شنبه، وري ۱۸مه، ۱۴۰۳

د افغانستان د سوداګرۍ او پانګونې اتاق د چارو د ښه والي او د ولایتي اتاقونو د ستونزو د حل په موخه انلاین غونډه وکړه، چې د عامل پلاوي سرپرست ښاغلي میرویس هوتک، حقوقي سلاکار، مالي مفتش، د مرکزي اتاق د ډیپارټمنټونو مسؤلینو او د ولایتي اتاقونو اجرائیوي مسؤلینو په کې ګډون درلود.

ښاغلي هوتک د ولایتي اتاقونو رول د غړو په جلب او جذب او د هېواد خصوصي سکتور ته د خدمتونو په وړاندې کولو کې مهم وباله او خصوصي سکتور غړو ته د خدمتونو د وړاندې کولو، د دوی د ستونزو هواري لپاره د مرکزي اتاق سره د منظمو اړیکو نیولو، د حکومتي ادارو سره نیکو کاري اړیکو لرلو، په کار کې چټکتیا او د اړوندو ولایتونو له مختلفو سکتورونو سره د ناستو په ترسره کولو برخه کې لازمې لارښوونې وکړې.

په دې ناسته کې، د ولایتي اتاقونو یو شمېر مسؤلینو، حقوقي سلاکار او د دې اتاق د بېلابېلو څانګو مسؤلینو د یو شمېر نورو سوداګریزو موضوعاتو او ویناوو تر څنګ د خپلو کاري څانګو او د اساسنامې په رڼا کې د ولایتي اتاقونو د فعالیتونو په اړه خبرې اترې وکړې او ژمنه يې وکړه چې د کار ښه والي او پرمختګ په موخه به خپلې هڅې لاپسې ګړندۍ کړي.

دوشنبه، وري ۲۷مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند او د اتاق مدیره پلاوي غړي ښاغلي خان جان الکوزي ننګرهار ولایت ته د خپل کاري سفر په ترڅ کې، په هغه مشورتي ناسته کې چې د هېواد لویو لارو په ځانګړې توګه د کابل – جلال آباد لويې لارې بیارغونې په موخه د ننګرهار ولایتي اتاق کنفرانسونو په تالار کې جوړه شوې وه، ګډون وکړ.
په یاده ناسته کې د ننګرهار ولایتي اتاق مدیره پلاوي غړو، د کسبګرو، کرنې او صنعت اتاقونو استازو، د ټرانسپورټ اتحاديې غړو او ختیځو ولایتونو ډیر شمیر سوداګرو او پانګوالو د ګډون کولو ترڅنګ، خپل د ارزښت وړ نظرونه او وړاندیزونه شریک کړل.

ښاغلي مهمند د شمال ختیځو ولایتونو غوښتنې چې د ټرانسپورټ غړو له لوري دی د کابل – ننګرهار لويه لاره د "ټول پلازا" په شکل جوړه شي، د حکومت د مشرتابه مقام لارښوونو په اړه ګډون کوونکو ته معلومات وړاندی کړل او د مختلفو اتحادیو له غړو او ختیځو ولایتونو سوداګرو يې وغوښتل چې په دی برخه کې خپل نظرونه شریک کړي.

د اتاق لومړي مرستيال د هېواد په بیارغونه کې د هېوادوالو رول اړین وباله او د کابل- جلال اباد لويه لاره يې د هېواد له مهمو لويو لارو څخه وبلله او د دې لويې لارې رغول يې د هېواد د اقتصاد په وده، د سوداګريزو مالونو په خوندي توګه د لېږد رالېږد، ټرانزیټ، د موټر چلوونکو لپاره د اسانتياوو رامنځته کولو او د ټرافیکي پېښو مخنیوي برخه کې له ارزښته ډکه وبلله.

ښاغلي مهمند ټرانسپورټ یو له مهمو سکتورونو څخه وباله چې د هېواد ټولې برخې سره نښلوي او د مسافر وړونکو او بار وړونکو وسایطو د مالکینو له لوري يې د"ټول پلازا" په شکل د هېواد لویو لارو په بیارغونه کې د دوی رول اړین وګاڼه او د ټرانسپورټ سکتور ټولو غړو څخه يې وغوښتل چې په دی برخه کې هر اړخیزه همکاري وکړي.

خان جان الکوزي د کابل-ننګرهار لويې لارې په جوړولو کې د ختيځو ولايتونو د سوداګرو رول مهم وباله او په اقتصادي، سياسي، امنيتي او ټولنيزو برخو کې يې د دې لويې لارې جوړول د ختيځو ولايتونو بنسټیزه اړتيا وګڼله او د یادې لارې د جوړولو برخه کې يې د اتاق د هر اړخیزې همکارۍ ډاډ ورکړ.

د ختیځو ولایتونو مختلفو سکتورونو استازو د دغه نیک اقدام له امله د حکومت د مشرتابه، د اقتصادي کمیسیون له محترم رئیس او د ننګرهار ولایت له محترم والي څخه مننه وکړه او د ټول پلازې په عملي کیدو یې خوښي څرګنده او د خپلې همکارۍ ډاډ يې ورکړ.

چهارشنبه، وري ۱۵مه، ۱۴۰۳