ښاغلي آرین زلګی عظیمي، د افغانستان د سوداګرۍ او پانګونې اتاق د پانګونې مرستیال، د اروپايي اتحادیې له سفیرې مېرمن وی رونیکا او د هغې له اقتصادي همکار ښاغلي ریني هنسن سره ولیدل.

 

مېرمن وی رونیکا د اتاق او اروپايي اتحادیې د ګډې همکارۍ څخه چې د صادراتي توکو د ستندرد کولو په موخه د WFP په همکارۍ او د اروپايي اتحادیې په ملاتړ په کابل کې ترسره شوې وه، مننه وکړه او زیاته یې کړه چې د افغانستان خصوصي سکتور په اروپايي هېوادونو کې د سوداګرۍ او بانکدارۍ په برخو کې د هیڅ ډول بندیز سره نه دی مخ.

ښاغلي عظیمي د هېواد د کاروبار وضعیت او د خصوصي سکتور د ودې لپاره د اتاق جامع پلان په اړه معلومات وړاندې کړل او زیاته یې کړه چې د افغانستان سوداګري د تېر کال په پرتله په وروستیو شپږو میاشتو کې ۳۰ سلنه ډېره شوې ده.

نوموړي د هېواد د تولیدي فابریکو لپاره د نړیوالو سرتفیکټونو د ترلاسه کولو په موخه د اروپايي اتحادیې همکاري وغوښته.

ښاغلي عظیمي، د افغانستان د پانګونې فرصتونو د تشریح ترڅنګ، له اروپايي اتاقونو سره د افغانستان د سوداګرۍ او پانګونې اتاق د اړیکو د لا پیاوړتیا، او همدارنګه له اروپايي سوداګرو سره د B2B غونډو په ترسره کولو ټینګار وکړ.

 

 

پنجشنبه، د تلې ۳ مه، ۱۴۰۴