د افغانستان د سوداګرۍ او پانګونې اتاق مشرتابه پلاوي، هر یو: ښاغلي محمد یونس مهمند د اتاق لومړی مرستیال او ښاغلي سلطان محمد صافي د اتاق د مشرتابه پلاوي غړی د جلالتمآب ملا عبدالغني برادر د ریاست الوزرا اقتصادي مرستیال او جلالتمآب مولوي عبدالکبیر د رياست الوزرا سیاسي مرستیال؛ او ښاغلیو: نورالدین عزیزی د صنعت او سوداګرۍ وزیر، عطاالله عمري د کرنې، مالدارۍ او اوبولګولو وزیر، خلیل الرحمن حقاني د مهاجرینو او راستنېدونکو چارو وزیر، د ازبیکستان، ترکیې او پاکستان هیوادونو ډيپلوماټانو او ګڼ شمېر سوداګرو او پانګهوالو سره د کرنې او مالدارۍ محصولاتو ۳۱م نندارتون چې د کرنې وزارت لخوا جوړ شوی و، ګډون وکړ.
ښاغلي محمد یونس مهمند، افغانستان په عمده توګه یو زراعتي او مالداره هیواد وباله چې له ګاونډیو هیوادونو سره ښې سوداګریزې، اقتصادي او ترانزیټي اړیکې لري او په تېرو درېیو کلونو کې د افغانستان د کرنې وزارت هڅې په زراعت میکانیزه کولو کې وستایلې. هغه د کرنې او مالدارۍ تولیداتو ملاتړ باندې ټینګار وکړ.
ښاغلي مهمند، د اوبو کمښت د هیواد د بزګرانو یوه لویه ستونزه یاده کړه او له حکومتي چارواکو یې وغوښتل چې په دې برخه کې د اوبو بندونو جوړولو عملي ګامونه پورته کړي. نوموړي شکرپاره د هیواد یو لوی زراعتي محصول وګاڼه او له دولت څخه یې د دې محصول د صادراتو لپاره د اسانتیاوو رامنځته کولو غوښتنه وکړه.
د اتاق لومړي مرستیال، د چین له سفیر سره د یوې ناستې یادونه وکړه او زیاته یې کړه: صادرونکي کولای شي انار بې له کوم محدودیت څخه چین ته صادر کړي. هغه له سیمې په ځانګړي توګه له اروپایي هیوادونو سره د ترانزیتي هوکړهلیکونو لاسلیک کول د افغانستان د صادراتو د زیاتوالي لپاره ضروري وباله او له د بهرنیو چارو وزارت څخه یې د دې هوکړهلیکونو په لاسلیک کې جدي پاملرنه وغوښته.
ښاغلي مهمند، د کوکنارو کر د منع کېدو د حکومت یوه لویه لاسته راوړنه وبلله او له کرنې وزارت او ټولو بهرنیو مرستندویانو څخه یې وغوښتل چې د بدیل کښت په برخه کې د هیواد له بزګرانو سره لازمې مرستې وکړي. هغه د حکومت لخوا د وارداتي وچو شیدو ګمرکي تعرفې زیاتوالی د افغانستان په داخلي تولیداتو کې د ځانبساینې په برخه کې یوه ښه کړنه وبلله.
ښاغلي مهمند، د افغانستان د سوداګرۍ او پانګونې اتاق له لوري د هیواد د تولیدي محصولاتو لپاره د بهرنیو بازارونو د موندلو په برخه کې همکاري یاده کړه او له بنګلهدېش، سریلانکا، هند او هغو هیوادونو سره چې له افغانستان سره اقلیمي توپیر لري، د ګډو نندارتونونو د جوړولو غوښتنه وکړه.
ښاغلي مهمند، په هیواد کې د کمپل تولیدي فابریکې د کار له پیل څخه یادونه وکړه او له ټولو لوړپوړو حکومتي چارواکو یې وغوښتل چې د دغې فابریکې په پرانیستلو کې ګډون وکړي. هغه له ټولو سوداګرو او پانګهوالو څخه وغوښتل چې د لومړنیو توکو، سون موادو او نورو مالونو د بیو په راکمولو کې جدي پاملرنه وکړي.
چارشنبه، د تلې ۲۵مه، ۱۴۰۳
