ښاغلي محمد یونس مهمند د افغانستان د سوداګرۍ او پانګونې اتاق لومړی مرستیال، هرات ولایت ته د خپل سفر په ترڅ کې، چې ښاغلیو: پیښو ته د رسیدنې په چارو کې د دولت وزارت مقام، د افغانستان د سوداګرۍ او پانګونې اتاق د مشرتابه پلاوي غړي جان آقا صادقي، د څارنې پلاوي منشي او د غزني اتاق رئیس عبدالمتین قلندري، د هرات اتاق لومړی مرستیال عبداللطیف قناویزیان، د هرات اتاق سوداګریز مرستیال سعید صدیقي، د هرات ګمرک رئیس، د نیمروز اتاق رئیس حاجي عبیدالله نورزی، د یادې اورلګېدنې زیانمن شوي سوداګر، او د افغانستان یو شمېر وتلي سوداګرو یې ملتیا کوله، د هرات ولایت ګمرک په بېلابېلو برخو کې د اورلګېدنې له سیمو لیدنه وکړه او له یو شمېر زیانمن شویو کسانو، سوداګرو او د دې ولایت له محلي چارواکو سره د یادې پېښې د څرنګوالي په اړه خبرې وکړې.
محلي چارواکو، د هرات ولایت په ګمرک کې د اورلګېدنې په اړه مفصل معلومات وړاندې کړل او زیاته یې کړه: په دې پېښه کې له ۵۰ څخه ډېر سوداګریزې محمولې، ۱۵ باربري وسایط او یو بشپړ د مالونو ګدام په بشپړ ډول او ۳ نور ګدامونه په جزوي ډول سوځېدلي دي.
سوځېدلي توکي برېښنايي وسایل، تکه، رخت، بطرۍاو داسې نور شامل وو.
ښاغلي محمد یونس مهمند، د محلي چارواکو د خبرو تر اورېدلو او د سوداګرو د سوځېدلو مالونو د بېلابېلو برخو د لیدلو وروسته، یادې پېښې ته د خواشینۍ څرګندونه وکړه او دا یې د خصوصي سکتور لپاره لوی اقتصادي زیان وباله. هغه په بندرونو او ګمرکاتو کې د نورو تاسیساتو پر جوړولو ټینګار وکړ ترڅو د ورته لویو پېښو مخنیوی وشي، او د هرات له محلي چارواکو څخه یې په دې برخه کې د جدي پاملرنې غوښتنه وکړه.
