د افغانستان د سوداګرۍ او پانګونې اتاق مالي او اداري معاونیت سرپرست ښاغلي میرزمان پوپل، د نړیوالو اړیکو دیپارتمنت مسئول او یو شمېر د لومړنیو توکو واردوونکو په حضور کې د روسي شرکت "APK RASSVET" LLC استازي سره آنلاین ناسته ترسره او د دواړو هیوادونو د سوداګرو ترمنځ د ګډو پانګونو په اړه یې خبرې وکړې.

 

د روسي شرکت "APK RASSVET" LLC مسئول د یاد شرکت د فعالیتونو په اړه معلومات وړاندې کړل او زیاته یې کړه: یاد شرکت د جوارو، غنمو، اوړو، غوړیو او همدارنګه د ټولو بهرنیو هیوادونو سره د صادراتو او وارداتو په برخو کې فعالیت کوي چې تولیدات یې د نړیوالو معیارونو او کیفیت سره سمون خوري.

نوموړي له ښاغلي پوپل څخه وغوښتل چې افغان سوداګر دې وهڅوي چې د یاد شرکت محصولات وپېري.

محترم میرزمان، لومړني توکي د یو هیواد د خلکو عاجله اړتیا وبلله او په مناسبو نرخونو د باکیفیته خوراکي توکو په وارداتو یې ټینګار وکړ او د یاد شرکت له مسئول څخه یې وغوښتل چې د خپلو تولیدي توکو تفصیلي معلومات د قیمت او کیفیت په نظر کې نیولو سره په ایمیل کې اتاق ته ولېږي ترڅو اتاق یې له افغان سوداګرو سره شریک کړي.

نوموړي د افغان سوداګرو لپاره د هیواد د صادراتي محصولاتو لپاره د نړیوالو بازارونو د موندلو په برخه کې د خپلې همکارۍ ډاډ ورکړ.

 

 

پنجشنبه، چنګاښ ۱۴مه، ۱۴۰۳