د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند له یو شمیر ایراني سوداګرو سره چې د "صنعت اونۍ نندارتون" کي گډون کړی د لیدنې پرمهال د دوه اړخیزو سوداګریزو اړیکو پراختیا او غښتلتیا او ګډو پانګونو په اړه خبرې اترې وکړې.

ښاغلي مهمند په کابل کې د ایران له سفارت څخه مننه وکړه چې ایراني سوداګر يې د "صنعت اونۍ نندارتون" کې ګډون کولو ته هڅولي وو او نوموړي همدارنګه، د هېواد د صنعت د ودې په برخه کې د افغان حکومت د پالیسۍ په اړه ایراني پانګوالو ته معلومات ورکړل.

د اتاق لومړي مرستیال په هېواد کې شته فرصتونه د پانګونې لپاره مناسب وبلل او له ټولو ګډون کوونکو ایراني سوداګرو یې وغوښتل چې د خپلو تجربو د شریکولو او ګډې پانګونې په برخه کې له افغان سوداګرو سره په بېلابېلو برخو کې همکاري وکړي.

ایراني سوداګرو د اتاق له لومړي مرستیال څخه له دوی سره د لیدنې له امله مننه وکړه او په بېلابېلو برخو کې یې له افغان سوداګرو سره د سوداګریزو اړیکو د پیاوړتیا، د تجربو د لېږد او ګډې پانګونې په برخه کې د همکارۍ ډاډ ورکړ.

 

سه شنبه، غويي ۲۵، ۱۴۰۳