د افغانستان د سوداګرۍ او پانګونې اتاق د مدیره پلاوي د پانګه اچوونې مرستیال ښاغلي سلطان محمد صافي، د مدیره پلاوي مالي رئیس ښاغلي شیرین آغا سخي، د مدیره پلاوي غړيو هر یو خا جان الکوزي، محمد ګردیزي او احمد ضیاء عظیمي شینوزاده، د اتاق عامل رئیس ښاغلي سید زمان هاشمي د پاکستان سفیر ښاغلي منصور احمد خان او د پاکستان سوداګریز پلاوي سره د لیدنې په ترڅ کې د ټرانزیټ او سوداګرۍ په اړه خبرې وکړی.
ښاغلي صافي د پاکستان سفیر او ورسره پلاوي ته د ښه راغلاست ویلو ترڅنګ د دواړو هیوادونو ګډ دین، ژبه او کلتور د دوستۍ نښه وبلله. او د پاکستان په بندرونو کې د افغان سوداګرو ستونزو ته د پای ټکي کیښودلو په برخه کې يې د پاکستان هیواد څخه د لازمو آسانیتاوو رامنځته کولو غوښتنه وکړه.
نوموړي افغان مسافرو ته د ویزې صادرولو په پار د پاکستان هیواد څخه مننه وکړه خو زیاته يې کړه چې شته آسانتیاوې بسنه نه کوي او د پاکستان هیواد څخه يې د ویزې، سوداګریزو او فرهنګي اړیکو پراختیا په برخه کې د لاډیرو آسانتیاوو برابرولو غوښتنه وکړه.
ښاغلي خان جان الکوزي وویل "د کابل او اسلام آباد دولتي چارواکو تر منځ لیدنو د سوداګرو ستونزې راکمې کړي خو لاتراوسه افغان سوداګر په پاکستان کې د بارګیرۍ، سوداګریزو توکو لیږد او ټرانزیټ په برخو کې د ستونزو سره مخ دي. په افغانستان کې د پاکستان سفارت باید دا موضوع د اړونده پاکستاني چارواکو سره مطرح او د حل لارې ورته ولټوي."
نوموړي زیاته کړه چې د دواړو هیوادونو ترمنځ سیاسي ستونزې باید د سوداګرۍ پراختیا مخه ونه نیسي، ځکه چې قانوني سوداګري د دواړو هیوادونو ګټې خوندي کوي.
ښاغلي هاشمي وویل "موږ د پاکستان هیواد سره ښې سوداګریزې اړیکې لرو خو بیا هم افغان سوداګر د پاکستان په بندرونو کې د یو شمیر ستونزو سره مخ دي. د افغانستان او پاکستان هیوادونه باید هر هغه عامل چې
د سوداګرۍ د پراختیا مخه نیسي له منځه ویسي او د خصوصي سکتور لپاره لازمې آسانتیاوې رامنځته کړي."
ښاغلي منصور احمد خان وویل "موږ تل هڅه کړی چې د دواړو هیوادونو د سوداګرۍ پراختیا لپاره، شته ستونزی له منځه ویسو او لازمې آسانتاوې رامنځته کړو. په نږدی راتلونکي کې به په کابل کې یو نندارتون په لاره واچوو او د سوداګریزې ویزې په برخه کې ستونزی له منځه تللي او افغان سوداګر اوس په ډیرې آسانۍ سره سوداګریزې ویزې ترلاسه کولی شی."
نوموړي زیاته کړه چې د (اپټا) تړون پای ته رسیدلې او د دواړو هیوادونو سوداګرو ته د لاډیرو آسانتیاوو برابرولو په موخه به په تړون کې لازم بدلونونه رامنځته کړی شي.
په دی غونډه کې د بلخ، هرات، پکتیا او ننګرهار ولایتي اتاقونو هم په آنلاین ډول ګډون درلود او خپل نظرونه يې د سوداګریزې پراختیا او ټرانزیټ په اړه څرګند کړل.
