د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق خدماتي چارو مرستیال ښاغلي نصیر احمد عرب، د اتاق ستر سلاکار ښاغلي سردار ولي پښتون او د نړیوال نندارتون مرکز رئیس ښاغلي صابر لطیفي د هلال الکترونیک شرکت رئیس ښاغلي نرسل نرسلوف او د شانکرانا ریانا شرکت مسؤل ښاغلي سد هیر شیتي سره د اتاق په مرکزي دفتر کې لیدنه ترسره او په هېواد کې د شته پانګونې فرصتونو په اړه خبرې اترې وکړې.

د هند او اذربایجان پانګوالو د کانونو، کرنې، برېښنا تولید او ساختماني برخو کې پانګونې ته د خپلې لېوالتیا او چمتووالي یادونه وکړه او د افغانستان د سوداګرۍ او پانګونې اتاق له مشرتابه یې وغوښتل چې په دې برخه کې له دوی سره همکاري وکړي.

ښاغلي مهمند د هند او اذربایجان پانګوالو ته د ښه راغلاست په ترڅ کې، د افغانستان او یادو هېوادونو ترمنځ د دوستۍ او اقتصادي اړیکو یادونه وکړه او په افغانستان کې د پانګونې شته فرصتونه تشریح کړل او په هېواد کې یې د هغوی د پانګوالو د لېوالتیا هرکلی وکړ.

ښاغلي مهمند د افغانستان د سوداګرۍ او پانګونې اتاق د کورنیو او بهرنیو سوداګرو او پانګوالو ملاتړې اداره وبلله او د افغان سوداګرو او پانګوالو او د سیمې او نړۍ د هېوادونو ترمنځ د سوداګریزو ناستو پر جوړولو یې ټینګار وکړ.
نوموړي د اذربایجاني او هندي سوداګرو وغوښتل چې خپلې طرحې او وړاندیزونه په لیکلې بڼه اتاق ته وسپاري څو د اړوندو حکومتي ادارو سره په همغږۍ د پانګونې لپاره مناسب چاپیریال رامنځته کړي.

شنبه، سلواغې ۲۱مه، ۱۴۰۲