د افغانستان د سوداګرۍ او پانګونې اتاق د هېواد د صادارتي محصولاتو ودې په موخه د خپلو بی سارو هلو ځلو په سلسله کې، داځل د صادراتي محصولاتو ضد عفوني کولو په تړاو د عامه پوهاوي پروګرام په اتاق کې د مدیره پلاوي غړیو هر ښاغلي خان جان الکوزي او ضیاءالدین اچکزي، د عامل پلاوي رئیس ښاغلي شفیق الله عطايي، د کرنې وزارت د کرنیزو محصولاتو د قرنطین او ضد عفوني کولو مسؤل ښاغلي سردار علي عباس، د فومیګیشن مرکز او کندا فروټ شرکت رئیس ښاغلي نجیب الله مهمند، سوداګرو او د وچې میوې او پښتې صادروونکو سوداګرو په حضور کې په لاره واچول شو.

 

دغه پروګرام چې د صادراتو او پانګونې پراختیا ډیپارټمنټ په همکارۍ جوړ شوی و، په پیل کې محترم خانجان الکوزي د صادراتي محصولاتو د فومیګیشن پر اهمیت خبرې وکړې او د قرنطین د حشراتو د مخنیوي مرکز یې د هېواد د صادراتو د معیاري کولو په خاطر یوه اساسي اړتیا وګڼله او زیاته یې کړه: د کوکنارو د کښت له منع کېدو وروسته د پنبې کښت په بې ساري ډول وده کړې او د دې محصول صادرات د نړیوالو معیارونو د پوره کولو لپاره فومیګیشن ته اړتیا لري.

 

نوموړي د کندا فروټ شرکت د فوموګیشن له مسوولينو وغوښتل، چې د سوداګرو د مالي حالت په پام کې نيولو سره د صادراتي محصولاتو د فومیګیشن بيې تر ټولو کمې کړي.

ښاغلي عطايي د نړیوالو معیارونو سره سم د صادراتو په معیاري کولو باندې ټینګار وکړ او ویې ویل: د صادراتو په معیاري کولو کې د فومیګیشن رول ارزښتناک دی او د وچې میوې سوداګر او د پنبې شرکتونه باید د خپلو کرنیزو محصولاتو فومیګیشن ته جدي پاملرنه وکړي. هغه له صادرونکو سوداګرو سره د دغه مرکز د لا زياتې همکارۍ غوښتنه وکړه.

 

ښاغلي عطايي زیاته کړه: د اتاق مشرتابه تل هڅه کوي چې ګاونډیو هېوادونو او سیمې ته د صادراتو بهیر چټک او معیاري کړي چې د دغه ډول مرکز جوړول د دې پروسې په معیاري کولو کې مرسته کوي.

د کندا فروټ شرکت اجرائیوي رئیس د فیومیګیشن د پړاوونو، د صادراتي محصولاتو په برخه کې د هغه ګټې، د سوداګرو او د کرنیزو محصولاتو صادرونکو ته د اړتیا وړ اسانتیاوو، د فی کیلو/ټن د فومیګیشن نرخ او یو شمېر نورو موضوعاتو په اړه معلوماتي پریزنټیشن وړاندې کړ.

 

په دې پروګرام کې سوداګرو او صادرونکو هم خپلې پوښتنې مطرح کړې چې د اتاق او اړوندو ادارو د مسوولینو له خوا ورته د قناعت وړ ځوابونه ورکړل شول.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړیو هر یو ښاغلي خان جان الکوزي او ضیاءالدین اچکزي او د عامل پلاوي مالي او اداري مرستیال ښاغلي میرویس هوتک د کیمیاوې سرې واردوونکو اتحاديې له رئیس ښاغلي حاجي رحمت الله، د هلمند ولایتي اتاق رئیس ښاغلي غلام یحی پښتون او د یادې اتحاديې له یو شمیر غړیو سره په مرکزي دفتر کې لیدنه ترسره کړه.

 

د کیمیاوې سرې واردوونکو د سویل څخه د هېواد نورو برخو ته د کیمیاوې سرې د انتقال او ګمرکي تعرفو بیې لوړوالي ستونزو په اړه خبرې وکړې او د یادو ستونزو حل برخه کې يې د اتاق د همکارۍ غوښتنه وکړه.

 

ښاغلي مهمند د کیمیاوې سرې واردوونکو سوداګرو ستونزو له اوریدو وروسته، د هغوی څخه وغوښتل چې خپلې ستونزې په لیکلې بڼه اتاق ته وسپاري څو اتاق يې د اړوندو دولتي ادارو سره شریکې او د له منځه وړلو برخه کې يې لازمه همکاري ترسره کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د سویل حوزې د کیمیاوې سرې واردوونکو سوداګرو د کرنې وزارت له معین ښاغلي صدراعظم سره د لیدنې په ترڅ کې، د ګاونډیو هېوادونو څخه د کیمیاوې سرې واردولو او د هېواد مختلفو برخو ته يې د وړلو برخه کې شته ستونزو په اړه خبرې وکړې.

 

ښاغلي مهمند د کیمیاوي سرې پر اهمیت او د کرنیزو محصولاتو په وده کې د هغې د رول په اړه خبرې وکړې او ویې ویل: کیمیاوي سرې د کرنیزو محصولاتو د ودې او زیاتوالي لپاره یوه بیړنۍ اړتیا ګڼل کېږي، خو که موږ ونه شو کولای چې خپلو کروندګرو ته کیمیاوي سرې برابرې کړو؛ د کرنې بهیر او د کرنیزو محصولاتو زیاتوالی به د ستونزو سره مخامخ شي.

 

نوموړي د کرنې وزارت له مرستیال څخه وغوښتل چې د کیمیاوي سرې د برابرولو په برخه کې د بزګرانو اړتیاوې په نظر کې ونیسي، د دوی د ستونزو د حل په موخه دې لازمه همکاري وکړي او له ګاونډیو هېوادونو څخه د کیمیاوي سرې د واردولو او د هېواد ټولو برخو ته د لېږدولو په برخه کې دې اسانتیاوې رامنځته کړي.

 

ښاغلي صدراعظم د ښاغلي مهمند د خبرو او د کیمیاوي سرې د واردونکو د شته ستونزو له اورېدو وروسته وویل: موږ هڅه کوو چې شته خنډونه په ګوته او د حل لپاره یې لازم اقدامات ترسره کړو.

هغه ژمنه وکړه، چې په دې اړه به درې کسیزه کمېټه وټاکي، ترڅو خپل کاري راپور د وزارت له مشرتابه سره شریک کړي او په پایله کې به یې معقوله پرېکړه وشي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي مالي رئیس ښاغلي شیرین آغا سخي د هرات ولایت خوراکي توکو اتحاديې له رئیس ښاغلي نجیب الله خیر اندیش فوشنج او د یادې اتحاديې له یو شمیر غړیو سره په مرکزي دفتر کې د لیدنې په ترڅ کې، د هرات ولایت د سوداګرو او صنعتکارانو شته ستونزو او ننګونو په اړه خبرې اترې وکړې.

 

ښاغلي خیر اندېش فوشنج په دغه ولایت کې د خوراکي توکو د تولیدونکو او واردونکو د ستونزو یادونه وکړه او ویې ویل: د خوراکي توکو واردونکي او تولیدونکي د لوړو ګمرکي تعرفو، د خوراکي توکو د فابریکو د جوړولو لپاره د کافي ځمکې نه شتون او یو شمېر نورو ستونزو سره مخ دي او یادې ستونزې باید د حکومت لخوا حل شي.

 

نوموړي د اتاق له مشرتابه وغوښتل، چې د دوی ستونزې له دولتي چارواکو سره شریکې کړي او د حل په برخه کې ورسره همکاري وکړي.

ښاغلي مهمند د خوراکي توکو اتحادیې د غړو د ستونزو د اوریدو او د ښه راغلاست په ترڅ کې د صنعت په اهمیت او د هیواد په اقتصادي وده کې د هغې د رول په اړه خبرې وکړې او وې ویل: صنعت او پانګونه په بیلابیلو سکتورونو کې اساسي رول لري. او همدارنګه د هېواد په اقتصادي وده او پرمختګ کې يې رول خورا مهم دی او دا چې اتاق تل هڅه کړې چې په دې برخه کې د دولت لازمه پاملرنه راجلب کړي.

 

هغه په دې برخه کې د افغانستان د سوداګرۍ او پانګونې اتاق له مشرتابه څخه د هر اړخیزې همکارۍ ډاډ ورکړ او زیاته یې کړه: د اتاق مشرتابه هڅه کوي چې د هرات د صنعتکارانو او د خوراکي توکو د واردونکو ستونزې له دولتي چارواکو سره شریکې کړي او د هغوی ستونزې حل کړي. او دوی ته به د زیربنایي سکتور په برخه کې د دولت له خوا لازمې اسانتیاوې چې د فابریکو د جوړولو لپاره د کافي ځمکې برابرول او د ګمرکي تعرفو کمول پکی شامل دي برابرې کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د عامل پلاوي مالي او اداري مرستیال ښاغلي میرویس هوتک په ملتیا په کابل کې د یوناما دفتر له مسؤلې آغلې داني بوګس سره لیدنه ترسره کړه.

 

په یاده ناسته کې چې د اتاق په مرکزي دفتر کې ترسره شوه، د خصوصي سکټور پر ستونزو، د دولتي ادارو له خوا د هېواد د صادراتو د ملاتړ په موخه د سبسایډي نه برابرول، د دولتي پروژو د تطبیق کوونکو د غوښتنو نه برابرولو، د افغانانو د پیسو د کنګل کیدو او یو شمیر نورو مسایلو په اړه د نظرونو تبادله وشوه.

 

ښاغلي مهمند یادو ستونزو ته په کتو سره په هېواد کې د پانګونې د فرصتونو په اړه هیله مندي څرګنده کړه او ویې ویل: د پانګونې او سوداګرۍ یو له اساسي شرطونو څخه د ټولیز او سرتاسري امنیت تامین دی چې له نېکه مرغه نن ورځ د داسې شرایطو شاهدان یو او فضا د پانګونې لپاره مناسبه ده.

 

نوموړي د پنبې د کښت او د ځينو ولايتونو په اقتصادي وده کې د هغې د اهميت په اړه خبرې وکړې او زياته يې کړه: د جنوب لوېديځو ولايتونو په ځانګړې توګه هلمند ولايت چې د کرنې وړ ځمکې او مناسب اقليم لري، د پنبې کرلو او توليد ته چمتو دي او که د يوناما دفتر او نړيوالې مؤسسې په دې برخه کې همکاري وکړي موږ کولای شو په دغه ولایت کې د پنبې د پروسس او تېلو د تولید فابریکه جوړه کړو چې له یوې خوا به د دې ولایت خلکو ته د کار زمینه برابره شي او له بلې خوا به د پنبې غوره تېل د هېواد په دننه کې عرضه او بهر ته يي په صادرولو باندی قادر شو.

 

آغلې داني بوګس د اتاق د مشرتابه له پرله پسې هڅو څخه د مننې په څرګندولو سره، د دوی پر هر اړخیزو همکاریو ټینګار وکړ او ویې ویل: د افغانستان خلک له سختو اقتصادي شرایطو سره مخ دي، د یوناما دفتر د اقتصادي ودې ترڅنګ، د بشردوستانه مرستو، زیربناوې، د ډیرو پانګونو لپاره د زمینې برابرول، د صنعت وده او د کورنیو سرچینو څخه د انرژۍ تولید برخه کې هر اړخیزې همکارۍ کولو ته ژمن دی.