د خصوصی سکټور اوچت غږ

20
سه شنبه, اکتوبر
7 New Articles

د افغانستان د سوداګرۍ او پانګونې خونې مشرتابه پلاوي د اندونیزیا د سوداګرۍ او صنایعو خونې او د بهرنیو چارو وزارت له استازو سره وليدل.

دوشنبه، د تلې ۲۷ مه، ۱۴۰۵
 
د افغانستان د سوداګرۍ او پانګونې خونې عمومي رياست د ټولنيزو او کلتوري چارو مرستیال ښاغلي الحاج حبیب‌الله عمر په مشرۍ پلاوي د اندونېزیا په پلازمېنې جاکارتا کې د دغه هېواد د سوداګرۍ او صنایعو خونې (KADIN) او بهرنیو چارو وزارت له استازو سره خبرې کړې.
په دې لیدنه کې د افغانستان د سوداګرۍ او پانګونې خونې د بلخ او کابل خونو د مشرتابه پلاوي غړو او د اندونېزیا د سوداګرۍ او صنایعو خونې د افغانستان د دوه‌ اړخیزې کمېټې مرستیال ښاغلي هرمان سیسوانتو، د یادې خونې د کرنې برخې مرستیالې مېرمن ډیوي ارنا رحماوتي او د اندونېزیا بهرنیو چارو وزارت د سویلي او مرکزي اسیا برخې مرستیال رئیس ښاغلي جدوت سوتویو حضور درلود.
د افغانستان د سوداګرۍ او پانګونې خونې د ټولنيزو او کلتوري چارو مرستیال ښاغلي الحاج حبیب‌الله عمر د خبرو پر مهال د افغانستان او اندونېزیا ترمنځ د اقتصادي او سوداګریزو اړیکو پر پراختیا ټینګار وکړ او ویې ویل، چې افغانستان په بېلابېلو اقتصادي برخو کې د پانګونې پراخ فرصتونه لري او د اندونېزیا سوداګر او پانګوال کولی شي د ګډو همکاریو له لارې د افغانستان په اقتصادي پرمختګ کې مهم رول ولوبوي.
نوموړي په ځانګړي ډول د کانونو، کرنې، برېښنا او انرژۍ، صنعت او نورو تولیدي سکتورونو کې د پانګونې پر فرصتونو خبرې وکړې او د اندونېزیا له سوداګرو او پانګوالو یې وغوښتل، چې د افغانستان اقتصادي ظرفیتونو د ارزونې او د پانګونې عملي پروژو پلي کولو لپاره خپل حضور او فعالیت پراخ کړي.
همدارنګه ښاغلي الحاج حبیب‌الله عمر د دواړو هېوادونو ترمنځ د ګډو سوداګریزو نندارتونونو د ترسره کولو، د ګډو سوداګریزو پروګرامونو د تنظیم او د خصوصي سکټورونو ترمنځ د اړیکو پیاوړتیا په موخه د همکاریو پر پراختیا ټینګار وکړ. نوموړي د افغانستان او اندونېزیا د سوداګرۍ خونو ترمنځ د یوې ګډې کاري کمېټې د جوړولو وړاندیز هم وکړ، څو د سوداګرۍ او پانګونې لومړیتوبونه مشخص او د ګډو همکاریو لپاره منظم کاري میکانېزم رامنځته شي.
د افغانستان د سوداګرۍ او پانګونې خونې مرستیال، دغه راز د اندونېزیا د سوداګرو د یوه پلاوي د سفر لپاره د بلنې، په افغانستان کې د پانګونې له فرصتونو سره د هغوی د بلدتیا او د راتلونکو سوداګریزو ناستو او نندارتونونو د تنظیم غوښتنه وکړه. هغه همدارنګه د سوداګرو د تګ راتګ د اسانتیا، په ځانګړي ډول د ویزو د بهیر د ساده کولو او چټکتیا پر اهمیت ټینګار وکړ.
د اندونېزیا د سوداګرۍ او صنایعو خونې او د دغه هېواد د بهرنیو چارو وزارت استازو د سوداګرۍ او پانگونې خونی پلاوي ته در ښه راغلاست ویلو ترڅنګ د افغانستان د سوداګرۍ او پانګونې خونې د وړاندیزونو هرکلی وکړ او د دواړو هېوادونو ترمنځ یې د سوداګریزو اړیکو پراختیا، د پانګونې فرصتونو د پېژندنې، د سوداګریزو پلاوو د تګ راتګ او د ګډو پروګرامونو د تنظیم په برخو کې د همکارۍ لېوالتیا څرګنده کړه.