پنج‌شنبه، د تلې ۲۳مه، ۱۴۰۵

 

د افغانستان د سوداګرۍ او پانګونې خونې د ټرانسپورټ او ټرانزیټ د تخصصي کمېټې رئیس او غړو، د خونې د عامل پلاوي د پالیسۍ او تخنیکي چارو مرستیال په حضور کې په کابل کې د قرغېزستان له سفیر ښاغلي تورداکان سیدیکوف سره لیدنه او خبرې وکړې. په دې لیدنه کې د ټرانزیټي همکاریو پر پراختیا، د دواړو هېوادونو ترمنځ د سوداګرۍ مستقیمې لارې پر جوړولو او د پنځو هېوادونو د اوسپنې پټلۍ دهلېز د پروژې پر بیا فعالولو خبرې وشوې.

د افغانستان د سوداګرۍ او پانګونې خونې د عامل پلاوي د پالیسۍ او تخنیکي چارو مرستیال ښاغلي احمد شکیل حازم له افغانستان سره د سوداګرۍ او پانګونې د اړیکو پراختیا ته د قرغېزستان د لېوالتیا له امله مننه وکړه او د دواړو هېوادونو د سوداګرو او پانګوالو ترمنځ د اړیکو په رامنځته کولو کې یې د خونې پر رول ټینګار وکړ. نوموړي د چین، قرغېزستان، تاجکستان، افغانستان او ایران ترمنځ د اوسپنې پټلۍ دهلېز یوه مهمه پروژه وبلله او ویې ویل، چې دغه پروژه د سیمه‌ییزې نښلونې، سوداګرۍ او اقتصادي همکاریو په پراختیا کې مهم رول لوبولای شي.

د خونې د مدیره پلاوي غړي او د ټرانسپورټ او ټرانزیټ کمېټې رئیس ښاغلي ګل‌میر امیني هم د دواړو هېوادونو ترمنځ د مستقیمې ټرانزیټي لارې جوړولو ته د قرغېزستان د سفیر د پاملرنې له امله مننه وکړه او په دې پروګرام کې یې د افغانستان د ټرانسپورټي او باروړونکو شرکتونو اتحادیو د ګډون چمتووالی اعلان کړ. نوموړي د سړکونو او اوسپنې پټلۍ د بېخبناوو پراختیا د توکو د لېږد اسانتیا او د افغانستان ټرانزیټي اړیکو د پراختیا لپاره یو مناسب فرصت وباله.

ورپسې په کابل کې د قرغېزستان سفیر ښاغلي تورداکان سیدیکوف د افغانستان د سوداګرۍ او پانګونې خونې له همکارۍ او همغږۍ مننه وکړه او له افغانستان سره د سوداګرۍ مستقیمې لارې جوړولو او د پنځو هېوادونو د اوسپنې پټلۍ دهلېز د بیا فعالولو په اړه یې د خپل هېواد د پلانونو په هکله معلومات وړاندې کړل. نوموړي د دغو پروژو پلي کېدل د ښکېلو هېوادونو لپاره مهم وبلل او د ټرانسپورټي بېخبناوو د پراختیا او سوداګرۍ د ودې لپاره یې د سیمه‌ییزو همکاریو پر اړتیا ټینګار وکړ.

د قرغېزستان سفیر همدارنګه د دغو پروژو پر چارو د ژر تر ژره پیلولو لپاره د خپل هېواد لېوالتیا څرګنده کړه او د سړکونو پراختیا او د دوه‌اړخیزو او سیمه‌ییزو همکاریو پیاوړتیا یې د ګډو سوداګریزو فعالیتونو او پانګونو د پراختیا له مهمو عواملو څخه وبلله.

د لیدنې په پای کې دواړو لورو د همکاریو پر دوام، د مستقیمو سوداګریزو او ټرانزیټي لارو پر جوړولو او د ټرانسپورټي بېخبناوو پر پراختیا ټینګار وکړ، څو د افغانستان او قرغېزستان ترمنځ اقتصادي اړیکې پیاوړې او سوداګریزې راکړې ورکړې لا اسانه شي.