چهارشنبه، د وږي ۲۵مه، ۱۴۰۵

 

د افغانستان د سوداګرۍ او پانګونې خونې عمومي رئیس په کابل کې د ایران اسلامي جمهوریت د سفارت له مرستیال محمد مقدسي او د ایران اسلامي جمهوریت د نندارتونونو له رئیس علي رضا صدرزاده سره ولیدل او د سوداګریزو او اقتصادي همکاریو پر پراختیا او د دواړو هېوادونو خصوصي سکټورونو ترمنځ د اړیکو پر پیاوړتیا یې ورسره خبرې وکړې.

په دې لیدنه کې د سوداګریزو نندارتونونو پر جوړولو، د B2B ناستو پر ترسره کولو، د اقتصادي تعاملاتو پر پراختیا او د افغانستان په بازار کې د ایراني شرکتونو د لا ډېر حضور پر زیاتوالي ټینګار وشو.

ایراني پلاوي وړاندیز وکړ، چې د ایران د صنعتي او تولیدي ولایتونو اقتصادي مسوولان، واليان او آن ځيني وزیران دې د امام ابوحنیفه (رح) په پنځم ملي او نړيوال نندارتون کې د ګډون لپاره وبلل شي، چې د خونې عمومي رئیس له خوا یې د دې وړانديز هرکلی وشو.

په پای کې دواړو لورو د سوداګرو او پانګوالو د تګ راتګ پر اسانولو او د افغانستان او ایران د خصوصي سکټورونو ترمنځ د مستقیمو تعاملاتو پر پیاوړتیا ټینګار وکړ.