چهارشنبه، د زمري ۷مه، ۱۴۰۵

د اقتصادي اړیکو د پیاوړتیا او سوداګریزو همکاریو د پراختیا هڅو پر دوام د افغانستان د سوداګرۍ او پانګونې خونې د ولایتي چارو مرستیال ښاغلي فیض احمد خوافي، د خونې د مدیره پلاوي غړي ښاغلي کمال نبي‌زاده په ملتیا د دوشنبې په ورځ د زمري په پنځمه د اوزبېکستان؛ فرغانې ولایت د سوداګریز له پلاوي سره، چې د دغه ولایت د والي ښاغلي خیرالله بازاروف په مشرۍ افغانستان ته راغلی و، بلخ ولایت ته سفر وکړ.

دغه سفر د دواړو هېوادونو د ګډ هوډ څرګندونه کوي، چې موخه یې د سوداګریزو او ټرانزیټي اړیکو پراختیا او په سیمه کې د پانګونې د نوو فرصتونو رامنځته کول دي. پلاوي ته د بلخ د سوداګرۍ او پانګونې خونې د رئیس ښاغلي الحاج محمد ابراهیم غضنفر او د بلخ ولایت د والي مرستیال له لوري د مولانا جلال‌الدین بلخي نړیوال هوايي ډګر کې تود هرکلی وشو. وروسته پلاوي په مزارشریف ښار کې د فرغانې ولایت د تولیداتو له نندارتون لیدنه وکړه. دغه نندارتون د سیمې له اقتصادي ظرفیتونو او تولیدي وړتیاوو سره د بلدتیا او د دواړو لورو د اقتصادي فعالانو ترمنځ د ګډو همکاریو د پراختیا لپاره یو مناسب فرصت و.

ورپسې، د بلخ د محترم والي په دفتر کې یوه مهمه ناسته ترسره شوه، چې د بلخ محترم والي، د اوزبېکستان د فرغانې ولایت والي ښاغلي خیرالله بازاروف، د افغانستان د سوداګرۍ او پانګونې خونې د ولایتي چارو د مرستیال ښاغلي الحاج فیض احمد خوافي، ښاغلي کمال نبي‌زاده، ښاغلي الحاج محمد ابراهیم غضنفر، د فرغانې د سوداګرۍ خونې د رئیس او د فرغانې ولایت د پنځو ولسوالیو د مرستیالانو په ګډون جوړه شوې وه. په ناسته کې د سوداګریزو اړیکو د پراختیا، سوداګرو ته د ویزو د اسانتیاوو، ګډو پانګونو او ټرانزیټي همکاریو په اړه هر اړخیز بحث او د نظر تبادله وشوه.

د بلخ او فرغانې د والیانو، د سوداګرۍ خونو د مدیره پلاوي غړو، سیمه‌ییزو مسئولینو، سوداګرو او پانګوالو فعال حضور د سیمه‌ییزو اقتصادي اړیکو د لا پیاوړتیا لپاره د دواړو لورو جدي هوډ او قوي اراده څرګندونه کوي.
ښاغلي خوافي په خپلو خبرو کې د فرغانې ولایت د سوداګریز پلاوي او د سیمې د اقتصادي فعالانو وروستي سفرونه د افغانستان او اوزبېکستان د ګډ عزم نښه وبلله او هیله یې څرګنده کړه، چې دغه سفر به د سوداګریزو راکړو ورکړو د زیاتوالي، د نوو فرصتونو د رامنځته کېدو او د افغانستان د نورو ولایتونو او د اوزبېکستان د ګاونډیو سیمو ترمنځ د اقتصادي همکاریو د پیاوړتیا لامل شي.

د بلخ کانټیننټال هوټل په تالار کې په يوه بله ګډه ناسته کې بیا د خونې د ولایتي چارو مرستیال، د بلخ والي او د فرغانې ولایت سوداګریز پلاوي د دې سفر ارزښت او لاسته راوړنې تشریح کړې. په همدې مراسمو کې د بلخ او فرغانې د سوداګرۍ او پانګونې خونو ترمنځ د همکارۍ هوکړه لیک لاسلیک شو او همدارنګه د دواړو لورو سوداګرو ترمنځ په بېلابېلو برخو کې ۱۳ سوداګریز هوکړه لیکونه، چې ارزښت یې له ۳۵ میلیون امریکایي ډالرو زیات دی، هم لاسلیک شول.

دغه لاسته راوړنې د دواړو هېوادونو د سیمه‌ییزو همکاریو، د سوداګرۍ او ټرانزیټ د پراختیا او د اقتصادي اړیکو د لا پیاوړتیا لپاره د دواړو لورو جدي هوډ څرګندوي. تمه کېږي چې د دې بهیر په دوام سره به په سیمه کې د پانګونې فرصتونه، ټرانزیټي زیربناوې او اقتصادي فعالیتونه لا پراخ شي او د دواړو هېوادونو ګډې ګټې به لا ښه خوندي شي.