د افغانستان د سوداګرۍ او پانګونې خونې د پانګونې مرستیال ښاغلي الحاج ارین زلګي عظیمي د یوه پلاوي په مشرۍ، چې د مدیره پلاوي غړی ښاغلي الحاج عبدالله رحیمي، د هېواد ملی سوداګر ښاغلي فریدون هاشمي او یو شمېر مخکښ اقتصادي فعالان هم ورسره مل وو، د چین د شینګداو ښار د تولیدي ماشین‌الاتو په ۲۳م نړیوال نندارتون کې ګډون وکړ.

 

د پانګونې مرستیال د نندارتون د بېلابېلو غرفو د لیدنې پر مهال، د عصري ټکنالوجۍ له تولیدوونکو او عرضه کوونکو سره خبرې وکړې او د افغانستان د تولیدي بنسټونو د عصري کولو په موخه یې د دوه‌ اړخیزو همکاریو پر پراختیا ټینګار وکړ.

ښاغلي عظیمي د نندارتون د پرانېستې په مراسمو پرمهال په خپلې وینا کې د چینایي چارواکو د مېلمه‌پالنې مننه وکړه او د دغه ډول نندارتونونو جوړول یې د اقتصادي اړیکو د پیاوړتیا او د هېوادونو ترمنځ د دوامدارې پراختیا لپاره مهم فرصت وباله.

نوموړي د افغانستان د نوي اقتصادي لیدلوري په اړه وویل، چې افغانستان اوس له نړیوالې ټولنې سره د رغنده تعامل نوي پړاو ته داخل شوی دی. هغه د افغانستان سټراټیژیک جغرافيوي موقعیت ته په اشارې وویل، افغانستان د سیمې د نښلوونکې څلورلارې حیثیت لري، چې د سویلي، مرکزي او ختیځې اسیا مهم بازارونه سره نښلوي او دا ځانګړی موقعیت د ټرانزیټ، سوداګرۍ او سترو پانګونو لپاره بې‌ساري فرصتونه رامنځته کوي.

د افغانستان د سوداګرۍ او پانګونې خونې د پانګونې مرستیال زیاته کړه، چې د سیمه‌ییزو اقتصادي همکاریو پراختیا د دوامدار ثبات، هوساینې او د کاري فرصتونو د رامنځته کېدو لپاره مهم شرط دی. هغه ټینګار وکړ، چې د خصوصي سکټور مسؤلیت یوازې په سوداګریزو راکړو ورکړو پورې محدود نه دی، بلکې د ارزښتونو په رامنځته کولو، د نوښتونو په ملاتړ او د ګډې سولې او اقتصادي ودې پر بنسټ د راتلونکي په جوړولو کې هم مهم رول لري.

د خپلو خبرو په پای کې ښاغلي عظیمي د افغانستان د سوداګرۍ او پانګونې خونې بشپړ چمتووالی څرګند کړ، چې د نړیوالو شرکتونو فعالیتونه اسانه کړي. نوموړي وویل، چې خونه به د باوري سوداګریزو شریکانو په پېژندنه، د سوداګرو ترمنځ د تخصصي (B2B) غونډو په جوړولو او د هېواد په بېلابېلو اقتصادي سکټورونو کې د پانګونې د غوره فرصتونو په معرفي کولو کې لازمې اسانتیاوې برابرې کړي.

 

پنج‌شنبه، چنګاښ ۱۸مه، ۱۴۰۵