د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي په هغې غونډې کې، چې د خونې د پانګونې مرستیال ښاغلي الحاج ارین زلګی عظیمي، د ولایتي چارو مرستیال ښاغلي الحاج فیض احمد خوافي، د پاليسۍ او له حکومت سره د اړيکو مرستیال ميراجان سليمانخېل او د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزي هم په کې برخه لرله، ګډون وکړ او د عامل ریاست له مرستیالانو او ټولو کارکوونکو سره پر ليدنې سربېره يې د دوی کاري فعالیتونه وستايل او پر لا ښهوالي یې ټینګار وکړ.
ښاغلي هاشمي د خبرو پرمهال وویل، د افغانستان د سوداګرۍ او پانګونې خونه د خصوصي سکټور ګډ کور دی او له ستر سوداګر څخه تر کوچني دوکاندار پورې ټول په دې اداره کې د درناوي وړ دي. نوموړي زیاته کړه "زما په ګډون، چې د خونې عمومي رئیس یم، تر ټولو ټیټ رتبه کارکوونکي پورې ټول مکلف یوو، چې سوداګرو او پانګوالو ته د خدمتونو په وړاندې کولو او د اداري چارو په ترسره کولو کې په صداقت، مسئولیت او ژمنتیا عمل وکړو"
د خونې عمومي رئیس په دې غونډه کې د کارکوونکو د هڅو او فعالیتونو ستاینه وکړه او اړوندو مسؤلینو ته یې لارښوونه وکړه، چې د افغانستان د سوداګرۍ او پانګونې خونې بنسټګر ارواښاد عبدالمجید خان زابلي د خدمتونو درناوي په موخه دې یو عالي نښان جوړ شي، څو د خصوصي سکټور دې ستر شخصیت د ارزښتناکو خدمتونو د ستاینې یوه کوچنۍ نښه وي.
ښاغلي هاشمي همداراز کارکوونکو ته وویل، د دې لپاره چې د دوی کاري بهیر په عادي او اغېزناک ډول دوام ومومي، که هر کارکوونکی مادي یا معنوي ملاتړ ته اړتیا ولري، رهبري به یې په مسئولانه توګه ملاتړ وکړي.
د غونډې په پای کې د خونې د مالي او اداري چارو مرستیال او د عامل ریاست سرپرست ښاغلي زینالله حسني د افغانستان د سوداګرۍ او پانګونې خونې د کاري بهیر د مثبت پرمختګ په اړه عمومي رئیس ته ډاډ ورکړ.
