د افغانستان د سوداګرۍ او پانګونې اتاق د جلغوزیو صادراتو د زیاتولو او چین هېواد ته د انتقال په موخه ګډه غونډه ترسره کړه، چې پکې ښاغلي محمد یونس مهمند د سوداګرۍ او پانګونې اتاق لومړي مرستیال، ښاغلي خیرالدین مایل احمدي د اتاق سوداګریز مرستیال، ښاغلي سید جاوید برهان د اتاق نړیوالو اړیکو رئیس، ښاغلي ضیاءالدین اچکزی د اتاق مشرتابه پلاوي غړی، محمد انور عارفي، د عامل پلاوي پالیسۍ او تخنیکي مرستیال، او میرزمان پوپل د عامل پلاوي مالي او اداري سرپرست مرستیال همدا راز، د کام ایر، آریانا او ترکیش هوايي شرکتونو استازو، د جلغوزیو صادرونکو او د مفید ګروپ استازي هم ګډون درلود.
ښاغلي محمد یونس مهمند، د جلغوزیو صادرونکو او د هوايي شرکتونو استازو ته هرکلی ووایه، جلغوزي یې د هېواد له سترو صادراتي توکو څخه وبلل او د هوايي شرکتونو له استازو یې وغوښتل چې د جلغوزیو په خوندي انتقال کې جدي پاملرنه وکړي.
ښاغلي مهمند، همدارنګه په دې غونډه کې د انارو صادراتو په زیاتوالي ټینګار وکړ، چې روسیې، متحده عربي اماراتو، قطر او نورو سیمیزو هېوادونو ته به صادر شي. هغه، د افغانستان د سوداګرۍ او پانګونې اتاق له لوري د سوداګرو لپاره د تسهیلاتو په برخه کې د پوره ملاتړ او همکارۍ ډاډ ورکړ.
ښاغلي خیرالدین مایل، د افغانستان د سوداګرۍ او پانګونې اتاق د خصوصي سکتور لپاره پل او ملاتړ کوونکی وباله او د هوايي شرکتونو له مسوولینو یې وغوښتل چې د جلغوزیو په انتقال کې د تېر کال په پرتله زیاتې اسانتیاوې برابرې کړي.
ښاغلي سید جاوید برهان، د جلغوزيو صادرات یې د هېواد په اقتصادي وده کې مهم وبلل او سوداګرو ته یې د نورو سوداګریزو اسانتیاوو د رامنځته کولو ډاډ ورکړ، چې د اتاق په هڅو او د اړوندو حکومتي ادارو په همکارۍ به ترسره شي.
