ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، روسیې ته د خپل سفر په ترڅ کې ، چې پکې د روسیې ولسمشر، د مالیزیا د ولسمشر مرستیال، د چین د ولسمشر مرستیال، او د کویټ، سعودي عربستان، متحده عربي اماراتو، چین او روسیې سوداګریز استازو هم حضور درلود، د روسیې په ولادي واسټوک ښار کې په ختیځ اقتصادي کنفرانس کې ګډون وکړ او د آسیایي هېوادونو ترمنځ د سوداګریزو اړیکو په ښه والي ټینګار وکړ.
ښاغلي مهمند، د روسیې له سفارت او سوداګریز اتشه څخه د هغوی د همکارۍ له امله مننه وکړه او په افغانستان کې عمومي امنیت، د کوکنارو د کښت مخنیوی، او د اداري فساد له منځه وړل یې د سوداګرۍ او پانګونې د پراختیا لپاره ښه فرصت وباله او د یادو هېوادونو له سوداګریزو استازو څخه یې وغوښتل چې د خپلو هېوادونو سوداګر په افغانستان کې په بېلابېلو برخو، په ځانګړي ډول د کانونو، کرنې او انرژۍ په سکتورونو کې پانګونې ته وهڅوي.
د اتاق لومړي مرستیال، د یادو هېوادونو سوداګریزو استازو ته د امام ابوحنیفه "رح" په نوم د دریم نړيوال او ملي نندارتون په اړه معلومات ورکړل، چې ټاکل شوې ده د روان میلادي کال د اکتوبر له ۶مې څخه تر ۱۲مې پورې د افغانستان د سوداګرۍ او پانګونې اتاق له خوا په کابل ښار کې ترسره شي، او هغوی یې وهڅول چې خپل سوداګر په دغه نندارتون کې ګډون ته تشویق کړي.
ښاغلي مهمند، په دې سفر کې له لویو لوژیستیکي، ساختماني، موبل فرنیچر، خوراکي موادو، کرنې او جواهراتو شرکتونو څخه لیدنه وکړه او د موبل فرنیچر شرکت مسوولینو ته یې سپارښتنه وکړه چې په خپلو تولیداتو کې له افغان لرګیو څخه استفاده وکړي. نوموړي همدارنګه د یادو شرکتونو له مسوولینو وغوښتل چې په امام ابوحنیفه "رح" دریم نندارتون کې ګډون وکړي او خپل تولیدات نندارې ته وړاندې کړي.
د اتاق لومړي مرستیال د روسیې د ولادي وستوک بندري ښار پر اهمیت خبرې وکړې او دغه ښار یې له ختیځې آسیا په ځانګړي ډول له جاپان، چین او کوریا سره د افغانستان د هوایي او بحري ترانزیت له لارې د وصل نقطه وبلله او دغه ښار یې د افغانستان او ختیځې آسیا هېوادونو ترمنځ د سوداګرۍ په چټکتیا کې مهم وباله. نوموړي همدارنګه د چین، کوریا او جاپان څخه د وارداتي توکو د انتقال لپاره د ولادي وستوک ښار د ترانزیتي لارې د استفادې پر اهمیت ټینګار وکړ او دا لار یې یوه له لنډو او لږ لګښتي لارو څخه وګڼله.
