د حبیب ګلزار تجارتي شرکت د ننګرهار ولایت ۴۰۰ کورنیو سره چې په وروستیو طوفانونو او سیلابونو کې زیانمن شوي وو، د اولیه توکو مرسته وکړه. دغه مرسته د افغانستان د سوداګرۍ او پانګونې خونې د مدیره پلاوي د دارالانشاء رئیس، ښاغلي خان محمد سرفراز باز، د اتاق د مدیره پلاوي غړي ښاغلي خانجان الکوزي، د ننګرهار د سوداګرۍ او پانګونې خونې لومړي مرستیال ښاغلي حضرت ولي هډه وال، سوداګریز مرستیال عبدالولي بابکرخيل، او د مدیره پلاوي غړي ډاکتر مخلص احمد په حضور کې وویشل شوه.
د دې شرکت د مرستې په کڅوړه کې یوه بوجۍ اوړه، یوه بوجۍ وريجي او غوړي شامل وو، چې د سرخرود، غنیخیل، بیز اکمالاتي او نورو سیمو مستحقو کورنیو ته چې د طوفان او سیلاب له امله زیانمن شوي وو، وویشل شول.
ښاغلي خان محمد سرفراز باز، د حبیب ګلزار شرکت له رهبرۍ او مسوولینو څخه د دوی د تلپاتې مرستو او په ټول هېواد کې د طبیعي پیښو له زیانمنو سره د همکارۍ لپاره مننه او قدرداني وکړه. هغه، د حبیب ګلزار شرکت دغه اقدام یې د ژمنتیا، همدردۍ او وطن دوستۍ نښه وبلله.
