د افغانستان سوداګرۍ او پانګونې اتاق مشرتابه د افغانستان-امریکا ګډ اتاق مشرتابه سره د لیدنې په ترڅ کې په افغانستان کې د شتو ستونزو او فرصتونو په اړه خبری وکړی. د دواړو لوریو مشرانو د "ژینوا" غونډه د افغانستان د اقتصادي پیاوړتیا لپاره اړینه وبلله او زیاته يې کړه چې د افغانستان دولت باید ددی ډول فرصتونو نه په سم ډول ګټه پورته او پانګه اچوونکو ته لازمې آسانتیاوې برابرې کړي.

په دی ویډیوي کنفرانس کې دواړو لوریو په خصوصي سکتور کې د شتو ستونزو او ننګونو د یادولو ترڅنګ د هیواد د اقتصادي پیاوړتیا په اړه خپلې طرحې او نظرونه سره شریک کړل.

په دی ویډیوي کنفرانس کې د زراعت او مالدارۍ وزیر ښاغلي انورالحق احدي، د افغانستان-امریکا ګډ اتاق مشرتابه او د خصوصي سکتور استازیو چې شمیر يې تقریبا ۱۷۰ تنو ته رسیده ګډون درلود.

د اتاق عامل ریس ښاغلي سید زمان هاشمي د خصوصي سکتور په استازولۍ خبری وکړی او د ژینوا په کنفرانس کې د مرسته کوونکو هیوادونو ژمنې يې ګټورې وبللې او زیاته يې کړه چې د افغانستان خصوصي سکتور باید د ژینوا کنفرانس د اجنډا یوه برخه وه، ځکه چې د تلپاتې سولې د ارکانو څخه یوه هم د پیاوړي اقتصاد درلودل دي چې خصوصي سکتور په دی کې مهم رول لوبوي.

د افغانستان دولت په استازولۍ ښاغلي احدي داسې وویل "د ژینوا په کنفرانس کې د مرسته کوونکو هیوادونو ژمنې د هیواد په اقتصاد او د هیوادوالو په ژوند مثتبې اغیزې لري او دا چې د مرسته کوونکو هیوادونو مالي مرستې باید د افغانستان د خلکو په بنسټیزو اړتیاوو باندی مصرف شي."