ښاغلي محمد انور عارفي، د افغانستان د سوداګرۍ او پانګونې اتاق د پالیسۍ او تخنیکي مرستیال، د محترم عبدالمتین غالب، د اتاق د نړیوالو اړیکو د څانګې د مسؤل په حضور کې، له محترم سبالیف اندری روی مویچ، د روسیې د سوداګرۍ او صنایعو اتاق د افغانستان لپاره د ګډې کمېټې له مسؤل سره، آنلاین لیدنه وکړه او د دواړو هېوادونو ترمنځ د سوداګریزو اړیکو د پراختیا په اړه یې بحث او نظرونه تبادله کړل.

 

ښاغلي عارفي، د اتاق د ۹۴ کلونو فعالیتونو په اړه مفصل معلومات وړاندې کړل، روسیه یې یو له مهمو اقتصادي او تولیدي هېوادونو څخه وبلله او د افغان او روسي سوداګرو ترمنځ د ګډو پانګونو د هدف لپاره د ګڼو غونډو پر جوړېدو یې ټینګار وکړ. نوموړي، د سوداګرو د پیسو د لېږد د اسانتیاوو رامنځته کول، د معتبرو حسابونو له لارې، د تجارتي معاملو د زیاتوالي او د دواړو هېوادونو د سوداګرو ترمنځ د باور د رامنځته کولو لپاره مهم وبلل، او په دې برخه کې یې د افغانستان د سوداګرۍ او پانګونې اتاق د همکارۍ ډاډ ورکړ.

ښاغلي مویچ، د روسیې – افغانستان د ګډې کمېټې د لومړۍ کنفرانس، چې ټاکل شوې ده د روسیې د سوداګرۍ او صنایعو اتاق له خوا په نږدې راتلونکي کې جوړ شي، په اړه معلومات وړاندې کړل. نوموړي له د پالیسۍ او تخنیکي مرستیال څخه وغوښتل چې خپل ټول وړاندیزونه او نظریات رسمي بڼه ورکړي او د روسیې د سوداګرۍ او صنایعو اتاق ته وسپاري. همداراز، نوموړي د افغانستان په بېلابېلو سکتورونو کې د روسي سوداګرو د پانګونې د چمتووالي یادونه وکړه او د اتاق له مشرتابه یې وغوښتل چې افغان بانکونه دې وهڅوي، څو په روسیه کې خپلې څانګې پرانیزي، تر څو سوداګر وکولی شي خپل مالي انتقالات په خوندي ډول ترسره کړي.

 

 

 

 

 

سه‌شنبه، د ۱۴۰۴ د وري ۵مه