د افغانستان د سوداګرۍ او پانګونې اتاق مشرتابه پلاوي ښاغلیو: محمد یونس مهمند د اتاق لومړی مرستیال، خیرالدین مایل احمدي د اتاق سوداګریز مرستیال، سید جاوید برهان د اتاق نړیوالو اړیکو رئیس، خانجان الکوزی د افغان-پاک ګډ اتاق رئیس، سلطان محمد صافی او ضیاالدین اچکزۍ، د اتاق مشرتابه پلاوي غړي، حاجي شرف الدین د اتاق ارشد مشاور، حاجي عبیدالله د رخت ټولنې رئیس، حاجي نجابت حیدري، د میوو ټولنې رئیس او د هېواد له بیلابیلو سکتورونو څخه یو شمېر سوداګرو له ښاغلي روبرت دیکسن د انګلستان د سفارت له شارژدافیر او له مل پلاوي سره د اتاق په مرکزي دفتر کې ولیدل او د سیمې هېوادونو ترمنځ د سوداګرۍ او پانګونې په برخه کې د موجوده ستونزو او د مناسب حل لارو موندلو په اړه یې خبرې اترې وکړې.
ښاغلي مهمند، ښاغلي دیکسن او د هغه مل پلاوي ته ښه راغلاست ووایه، د افغانستان او انګلستان اړیکې یې تاریخي وبللې او د افغانستان خلګو ته د انګلستان د بشري مرستو یادونه او مننه یې وکړه. هغه، د هېواد د امنیت ټینګښت، د کوکنارو د کر کیلو منع او د اداري فساد له منځه وړل او د حکومت له خوا په سوداګرۍ او پانګونه کې د اسانتیاوو د برابرولو په اړه خبرې وکړې، او د منطقې هېوادونو سره په سوداګرۍ او ترانزیت کې پر موجوده ستونزو یې خبرې وکړې. هغه زیاته کړه: له بېلابېلو هېوادونو په ځانګړې توګه له پاکستان سره د سوداګرۍ او ترانزیت په برخه کې مهمې ستونزې لکه: د افغانستان پر ځینو صادراتي توکو لوړې ګمرکي تعرفې، د اروپايي هېوادونو، هندوستان او مرکزي آسیا هیوادونو لخوا د ویزې په ورکولو کې د سهولتونو نشتوالی، د پاکستان له لوري په پولو کې ستونزې، د نړیوالو سوداګریزو اصولو او میکانیزمونو نه رعایتول، د سوداګریزو همکاریو د تفاهم لیک نه پلي کول او د کراچۍ بندر له لارې د یو شمېر وارداتي توکو د راتګ مخنیوی پکې شامل دي چې دا ټول د افغانستان او پاکستان خصوصي سکتور ته زیانونه اړولي دي.
د اتاق لومړي مرستیال، د افغانستان د حکومت له خوا د خصوصي سکتور د هر اړخیز ملاتړ یادونه وکړه او له ټولو هېوادونو سره د خصوصي سکتور د هر اړخیزو همکاریو او د نړیوالو اړیکو د ښه والي لپاره د عملي ګامونو د پورته کولو ډاډ ورکړ. هغه، د انګلستان له شارژدافیر څخه وغوښتل چې د افغانستان د کنګل شويو شتمنیو د ازادولو او د مالي انتقالاتو د خنډونو په لرې کولو کې چې د خصوصي سکتور لپاره یې بې شمېره ستونزې رامنځته کړي دي، مرسته وکړي.
د اتاق لومړي مرستیال، د بدیلو سوداګریزو لارو د موندلو یادونه وکړه او افغانستان یې د جنوبي آسیا او مرکزي آسیا وصل کونکی هېواد وباله او د افغانستان له لارې د ترانزیتي انتقالاتو د عادي جریان خبر یې ورکړ.
هغه، ۸۰ سلنه د سوداګرو او پانګه والو داخلي ستونزې حل شوې وبللې او ټینګار یې وکړ چې د نړۍ او سیمې له ټولو هېوادونو سره باید په متقابل درناوي، د متقابلې همکارۍ سیاست او د نړیوالو سوداګریزو او ترانزیتي اصولو په رعایتولو سره سوداګریزې اړیکې وساتل شي. هغه، د انګلستان له شارژدافیر څخه وغوښتل چې د نړیوالو اصولو او میکانیزمونو په پام کې نیولو سره د افغان سوداګرو د موجودو ستونزو په حل کې له سیمه ییزو هېوادونو سره مرسته وکړي.
ښاغلي مایل احمدي، د هېواد په اقتصادي وده کې د خصوصي سکتور رول مهم وباله او له ښاغلي دیکسن څخه یې وغوښتل چې د خصوصي سکتور د اقتصادي ودې او هوساینې د اهمیت په پام کې نیولو سره د افغان سوداګرو او پانګه والو د ستونزو د حل لپاره مناسبې لارې چارې او عملي ګامونه پورته کړي.
ښاغلي سلطان محمد صافي، د پاکستان حکومت له خوا په سوداګرۍ او ترانزیت کې رامنځته شوې ستونزې په ځانګړي ډول د افغان باغدارانو لپاره زیانمنې وګڼلې او د دغو ستونزو په حل یې ټینګار وکړ. هغه، یادونه وکړه چې د دونرانو غونډه (ACG) د سپتمبر په ۲۹مه په دوبۍ کې جوړیږي او اتاق باید د هېواد د خصوصي سکتور د غږ په توګه په دې غونډه کې ګډون وکړي. هغه، د انګلستان له شارژدافیر څخه وغوښتل چې د دې غونډې جزئیات له مشرتابه پلاوي سره شریک کړي.
ښاغلي خانجان الکوزي، د انګلستان له هېواد څخه د خصوصي سکتور په اړه د هغوی د هر اړخیز ملاتړ مننه وکړه او د افغانستان-پاکستان د ګډې خونې په جوړولو کې د دې هېواد رول ارزښتمن وګاڼه. هغه د انګلستان هېواد څخه د تېر په څېر د خصوصي سکتور د لا زیات ملاتړ غوښتنه وکړه.
سوداګرو او پانګوالو هر یو په نوبت سره خپلې ستونزې په بېلابېلو سوداګریزو برخو کې او د صادراتي توکو په انتقال کې څرګندې کړې او له ښاغلي دیکسن څخه یې وغوښتل چې د همغږۍ له لارې یې د حل لپاره هڅې وکړي.
ښاغلي روبرت دیکسن، د افغانستان د سوداګرۍ او پانګونې اتاق د مشرتابه له خوا د داسې ناستې د جوړولو څخه مننه وکړه، د خصوصي سکتور د مشرتابه خبرې او ستونزې یې واورېدې او په هېواد کې یې د خصوصي سکتور رول په اقتصادي وده او هوساینې کې ارزښتمن وباله. هغه، د خصوصي سکتور په ځانګړي ډول د مالي انتقالاتو او بانکي برخو ستونزې د پام وړ وبللې او ژمنه یې وکړه چې په راتلونکي کې به د ناستو له لارې د خصوصي سکتور پر ستونزو غور او د حل لپاره به هڅې وکړي.
