ښاغلي محمد یونس مهمند د افغانستان د سوداګرۍ او پانګونې اتاق لومړی مرستیال، پداسې حال کې چې د افغانستان د سوداګرۍ او پانګونې اتاق د مشرتابه پلاوي غړی ښاغلي جان آقا صادقي، د هرات اتاق لومړي مرستیال ښاغلي عبدالطیف قناویزیان، د هرات اتاق سوداګریز مرستیال ښاغلي سعید صدیقي، او د دې ولایت یو شمېر نامتو سوداګر او پانګوالو یې ملتیا کوله، د هرات له والي سره ولیدل او د هرات په ولایت کې د سوداګریزو مالونو د سوځېدنې په اړه یې خبرې وکړې.
ښاغلي مهمند د هرات د ولایت له محلي ادارې څخه مننه وکړه چې په یاده پېښه کې یې د مرستې هڅه کړې او د نورو مالونو د سوځېدو مخه یې نیولې ده. هغه، د هرات له والي څخه وغوښتل چې د هرات ګمرک د اورلګېدنې په اړه په پلټنو کې همکاري وکړي.
ښاغلي جان آقا صادقي، د هرات له والي څخه وغوښتل چې د هېواد په لویو بندرونو کې اړینې بنسټیزې اسانتیاوې او تاسیسات جوړ کړي.
د هرات والي د سوداګریزو مالونو د اورلګېدنې پېښې قربانیانو ته د خپلې خواخوږۍ او تسلیت څرګندولو تر څنګ، ژمنه وکړه چې د ورته لویو پېښو د مخنیوي لپاره به له هر اړخیزو هڅو، په ځانګړې توګه د معیاري اور وژنې سیستم او نورو اړینو تاسیساتو په جوړولو کې به عملي ګامونه پورته کوي.
