د افغانستان د سوداګرۍ او پانګونې اتاق مدیره پلاوي پانګه ایز مرسیتال ښاغلي سلطان محمد صافي د خپل دوه ورځني کاري سفر په جریان کې چې د اتاق د مدیره پلاوي غړي ښاغلي خان جان الکوزي، د کابل سوداګرۍ او پانګونې اتاق لومړي مرستیال ښاغلي احمد شاه حکیمي، د کنړ سوداګرۍ او پانګونې اتاق مدیره پلاوي غړي او د افغان – پاک ګډ مشرتابه پلاوي غړي ښاغلي اجمل صافي يي ملتیا کوله د افغان – پاک اګډ اتاق په ناسته کې چې د پاکستان کراچې ښار کې رامنځته شوه د ګډون ترڅنګ، د دواړو هېوادونو ترمنځ د سوداګرۍ پراختیا او شتو سوداګریزو ستونزو حل په اړه وینا وکړه.
د سفر په لومړۍ ورځ يې د پاکستان هېواد د خصوصي سکتور مسؤلینو او د پاکستان حکومتي چارواکو سره په ناسته کې د افغانستان د سوداګرۍ او پانګونې اتاق په استازولۍ د دواړو هېوادونو د سوداګرۍ او ټرانزیټ په لاره کې د پرتو ستونزو حل، سوداګرۍ پراختیا، سوداګریزو آسانتیاوو رامنځته کولو او د دواړو هېوادونو د خصوصي سکتورونو ترمنځ د لا ډیرې همکارۍ په رامنځته کولو ټینګار وکړ.
ښاغلي صافي او ښاغلي خان جان الکوزي د ټریکنګ ډیوایس، په تورخم او سپین بولدک دروازو کې د سوداګریزو توکو ځنډ، د کراچې بندر کې د کانتینرونو تبدیلي او افغان سوداګرو ته د ویزو نه ورکړه د دواړو هېوادونو د سوداګرۍ په لاره کې خنډونه ونومول او د له منځه وړلو غوښتنه يي وکړه.
همدارنګه د اتاق مشرتابه پلاوي د پاکستان لپاره د افغانستان سفارت سوداګریزې آتشې او افغان سوداګرو سره د کراچۍ ښار کې د لیدنې په ترڅ کې، د دوی ستونزې واوریدې او په کراچۍ ښار کې يي د افغان قونسلګرۍ څخه وغوښتل چې په کراچۍ کې د میشتو افغان سوداګرو ستونزو ته د حل لارو پیداکولو برخه کې خپلې هیڅ ډول مرستې ونه سپموي.
د کاري سفر په دویمه ورځ، د اتاق مشرتابه پلاوي د کراچۍ بندر او دریو هغو ترمینلونو څخه چې د افغانستان سوداګریز توکي تری وارد یا صادر کیږي لیدنه وکړه او د شتو ستونزو په حل يي د مسؤلینو سره خبرې وکړې.
