د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د کندز ولایت له سوداګرو سره د کتنې پر مهال په داسې حال کې چې د کندز د سوداګرۍ او پانګونې اتاق مشرتابه پلاوي او د دغه ولایت سوداګرو يې ملتیا کوله، د شیرخان بندر او سوداګریزو تاسیساتو څخه یې لیدنه وکړه او د سوداګرو ستونزې یې واوریدې.

د کندز د سوداګرۍ او پانګونې اتاق رئیس ګل محمد رجب زاده په شېرخان بندر کې د سوداګرو ستونزې لکه: د دغه بندر په ګمرک کې د نورم او سټنډرډ ادارې نه شتون، د تېلو د زېرمو د معیاري کېدو نه شتون، د سوداګرو لپاره د ویزې د ورکړې د اسانتیاوو نشتوالی، د صنعتي پارک نشتوالی، په شیرخان ګمرک کې د خوراکي توکو د ازمایښت لپاره د روغتیايي ادارې نشتوالی، د سوداګریزو توکو د انتقال لپاره د ټاکلي وخت نشتوالی، د پیسو د لېږد د اسانتیاوو نشتوالی، د معیاري سکینرونو نشتوالی او یو شمېر نورې ستونزې په ګوته کړې او د حل په موخه یې د مرکزي اتاق د همکارۍ غوښتنه وکړه.

نوموړي د خصوصي سکتور له مشرتابه څخه وغوښتل، چې په شېرخان ګمرک کې د کچالو او نورو سبزیجاتو د بارولو او ذخیره کولو لپاره د معیاري سړو خونو د جوړولو لپاره د مناسب ځای په ټاکلو کې له مالیې او کرنې وزارتونو سره همغږي وکړي.

ښاغلي محمد یونس مهمند د کندز د سوداګرو د ستونزو او خبرو له اوریدو وروسته ژمنه وکړه چې د دوی ستونزې به د اړوندو وزارتونو له مشرتابه سره شریکې کړي تر څو ورته د حل مناسبه لاره ومومي.
نوموړي د دغه ولایت له ټولو سوداګرو او پانګوالو وغوښتل چې د معیاري سړو خونو د جوړولو لپاره په ګډه کار وکړي.

شنبه، زمري ۱۴مه، ۱۴۰۲