ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د ترکمنستان د ولسمشر مرستیال، د دغه هېواد لوړپوړو چارواکو، د خصوصي سکتور غړو او نړیوالو بنسټونو استازو په حضور کې، د ترکمنستان ٢٠٢٥ پانګونې فورم کې ګډون وکړ.

دغه فورم د داخلي او بهرنیو پانګوالو لپاره د پانګونې فرصتونو او اسانتیاوو د معلوماتو وړاندې کولو، د ګډو پانګونو د چارو برابرولو، د پانګونې قانوني چوکاټ او میکانیزم وضاحت، د کورنیو تولیداتو احصائیه، د تېر کال اقتصادي وده او راتلونکو پلانونو د تشریح په موخه جوړ شوی و.

په دې پروګرام کې د ترانسپورت، انرژۍ، مخابراتو، الکترونیکي سوداګرۍ او د بانکي تضمینونو د صادرولو په برخو کې بحث او نظرونه تبادله شول.

همداراز، ښاغلي احمدیار د ترکمنستان د ولسمشر له مرستیال سره تعارفي لیدنه وکړه او پدې کتنه کې یې د افغانستان د خصوصي سکتور لاسته راوړنې او د سوداګرۍ او پانګونې اتاق هڅې توضیح کړې.

 

 

 

 

 

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، ترکمنستان ته د خپل سفر په ترڅ کې د افغانستان له سفارت څخه لیدنه وکړه او په ترکمنستان کې د افغانستان له سفیر، ښاغلي فضل محمد صابر سره وکتل.

ښاغلي صابر، ښاغلي احمدیار ته د ښه راغلاست ویلو تر څنګ، په یاد هېواد کې د افغانستان سفارت د هڅو په اړه مفصل معلومات ورکړل، چې موخه یې د خلکو، سوداګرو او پانګوالو لپاره د اسانتیاوو رامنځته کول دي.

ښاغلي احمدیار، د سفارت د هڅو ستاینه وکړه او د سوداګرو ستونزې، په ځانګړي ډول له ترکمنستان څخه د تیلو د وارداتو ستونزې، له ښاغلي سفیر سره شریکې کړې، او د دې ستونزو د حل لپاره یې د مسؤلینو جدي پاملرنه وغوښته.

همداراز، ښاغلي احمدیار، سوداګرۍ او بهرنۍ پانګونه د هېواد د ودې لپاره مهم وبلل او له ښاغلي صابر یې وغوښتل چې د دواړو هېوادونو د خصوصي سکتور ترمنځ د سوداګریزو اړیکو د پراخوالي لپاره همکاري وکړي.

 

 

 

 

د افغانستان د سوداګرۍ او پانګونې اتاق د تورخم دروازې د بیا پرانستلو د هڅو په لړ کې خپله دویمه غونډه د اتاق د لومړي مرستیال ښاغلي محمد یونس مهمند په مشرۍ په داسې حال کې چې د اتاق د عامل پلاوي مالي او اداري سرپرست مرستیال ښاغلي میرزمان پوپل، د ننګرهار د سوداګرۍ اتاق لومړي مرستیال ښاغلي حضرت علی هډوال، د افغان-پاک ګډ اتاق اجرائیوي رئیس ښاغلي نقیب‌الله صافي او یو شمیر سوداګرو او پانګوالو ګډون درلود، د پاکستان د سوداګریزو اتاقونو فدراسیون مرستیال ښاغلي محمد جواد کاظمي، د خیبر پښتونخوا د صنایعو د اتاق رئیس ښاغلي محمد یوسف افریدي، او یو شمېر پاکستانی سوداګرو سره د ۱۴۰۳ کال د کب د میاشتې په ۲۷ نیټه په تورخم دروازه کې ناسته ترسره کړه.

په دې ناسته کې د دواړو لورو قومې مشرانو د ډيورنډ فرضي کرښې دواړو غاړو ته د تورخم لارې په بندېدو د منفي اغېزو او د خلکو پر سوداګریزو ستونزو، ننګونو خبرې وکړې او د سوداګرۍ اتاق له لومړي مرستيال او د دواړو هېوادونو له حکومتی چارواکو يې وغوښتل چې د يادې پولې پرانېستلو ته ځانګړې پاملرنه وکړي.

په دې کتنه کې دواړو لورو د تورخم بندر په اهمیت او د سیمې په اقتصادي وضعیت کې د هغې د رول په اړه خبرې وکړې او د افغانستان - پاکستان ترمنځ د سوداګرۍ پر پراختیا یې ټینګار وکړ، ځکه د دوی په وینا د دې لارې بندېدو د دواړو هېوادونو د خصوصي سکتور غړو ته په میلیونونو ډالره زیان اړولی او د تورخم دروازه باید د تل لپاره د سوداګریزو مالونو او د عامو خلکو د تګ راتګ پر مخ خلاصه شي.

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د خپل رسمي سفر په ترڅ کې عشق‌آباد، ترکمنستان ته، د هېواد د یو شمېر سوداګرو او پانګوالو په ملتیا، د ترکمنستان د خصوصي سکتور نندارتون د پرانیستې په مراسمو کې ګډون وکړ.

په دې مراسمو کې د ترکمنستان د ولسمشر مرستیال، د دغه هېواد لوړپوړي مقامات، په عشق‌آباد کې د افغانستان سفیر، او د دواړو هېوادونو د خصوصي سکتور غړي هم حضور درلود.

ښاغلي احمدیار د نندارتون له بېلابېلو برخو او تولیداتو لیدنه وکړه او له یو شمېر غرفه‌دارانو سره یې د دوه اړخیزو همکاریو او د خصوصي سکتور د سوداګریزو اړیکو د پراخوالي په اړه خبرې وکړې.

د سوداګرۍ او پانګونې اتاق رئیس، دا ډول نندارتونونه د تولیداتو د معرفي کولو او د کورنیو محصولاتو د بازار موندنې لپاره مهم وبلل او په کابل او عشق‌آباد کې د ګډو نندارتونونو د جوړولو پر اړتیا یې ټینګار وکړ.

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د یو شمېر سوداګرو په حضور کې له محترم مرگن قوردوف سره وکتل او د سوداګریزو اړیکو د پراخوالي او ګډو پانګونو په اړه یې بحث وکړ.

ښاغلي قوردوف، ښاغلي احمدیار ته د ترکمنستان د خصوصي سکتور نندارتون ته د ښه راغلاست تر څنګ، د یاد نندارتون، د پانګونې د پراختیا فورم، او د ترکمنستان د سوداګرۍ او صنایعو اتاق د هڅو په اړه مفصل معلومات ورکړل.

ښاغلي قوردوف، افغانستان د ترکمنستان مهم سوداګریز شریک وباله او ژمنه یې وکړه چې د افغان سوداګرو لپاره د لازمو اسانتیاوو رامنځته کولو او د افغان پانګوالو د جلب لپاره به هر اړخیزې هڅې وکړي.

د سوداګرۍ او پانګونې اتاق رئیس، ترکمنستان یې د افغانستان له نېکو ګاونډیانو څخه یاد کړ او د دواړو هېوادونو د دیني او کلتوري ګډو ارزښتونو ته په اشاره، د ترکمنستان اتاق له رئیس یې وغوښتل چې پانګوال وهڅوي ترڅو د ترکمنستان د برېښنا له انرژۍ په ګټې اخیستنې د افغانستان د سترو کانونو په استخراج او پروسس کې پانګونه وکړي.

ښاغلي احمدیار، همداراز د افغان سوداګرو ستونزې، په ځانګړي ډول د تېلو او ګازو واردات، له ښاغلي قوردوف سره شریکې کړې او د دې ستونزو د حل او د سوداګرو لپاره د اسانتیاوو غوښتنه یې وکړه.

نوموړي، د دې لیدنې په څنډه کې د ترکمنستان له یو شمېر سوداګرو سره هم وکتل او د سوداګریزو اړیکو د پراخوالي، ګډو پانګونو، او د سوداګرۍ د اسانتیاوو په اړه یې ورسره بحث وکړ.