د افغان – پاک ګډ اتاق رئیس او د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي پاکستان ته د خپل کاري سفر په ترڅ کې، په داسی حال کې چې د افغان – پاک ګډ اتاق اجرائیوي رئیس ښاغلي نقیب الله صافي يې ملتیا کوله د افغانستان د سوداګرۍ او پانګونې اتاق، افغان – پاک ګډ اتاق او د پاکستان سوداګرۍ او صنعت اتاقونو فدراسیون په دری اړخیزه ناسته کې، د ګډون کولو ترڅنګ، د دواړو هېوادونو د خصوصي سکتورونو ګډې همکارۍ په اړه يې خپل رغنده نظرونه او وړاندیزونه مطرح کړل.

په دی ناسته کې د پاکستان د سوداګرۍ او صنعت اتاقونو فدراسیون (FPCCI) لومړي مرستیال ښاغلي ذکي اعجاز او د دواړو هېوادونو سوداګرو او پانګوالو هم حضور درلود.

په یاده ناسته کې په ډیرو اړینو موضوعګانو لکه:
• د دواړو هېوادونو خصوصي سکتورونو ودې او پراختیا
• د سیمې هېوادونو په ځانګړې توګه پاکستان سره ښو اقتصادي، سوداګریزو او ټرانزیټي اړیکو ته وده ورکولو
• په تیرو څو کلونو کې د افغان – پاک ګډ اتاق لاسته راوړنو او بی سارو فعالیتونو
• د دواړو هېوادونو سوداګرو شته ټرانزیټي، سوداګریزو او ټرانسپورټي ستونزو حل
• د دواړو هېوادونو د سوداګرۍ او صنعت وزارتونو ترمنځ د همکارۍ په لا پراختیا
• ګډو نندارتونو او سوداګریزو ناستو جوړولو
• او د دواړو هېوادونو پانګه وال په افغانستان کې د کانونو په سکتور کې ګډې پانګونې ته د هڅولو په اړه د بحث او د نظر تبادله ترسره شوه.

 

شنبه، غويې ۱، ۱۴۰۳