د افغانستان د سوداګرۍ او پانګونې اتاق مدیره پلاوي سوداګریز مرستیال ښاغلي خیرالدین مایل احمدي په داسی حال کې چې، د اتاق مدیره پلاوي غړي ښاغلي خان جان الکوزي او د عامل پلاوي سرپرست رئیس ښاغلي میرویس هوتک يې ملتیا کوله د نړیوالې خصوصي سوداګرۍ مرکز (CIPE) له استازي ښاغلي ایمل شیرزاد سره د لیدنې په ترڅ کې، پر عایداتو د مالیاتو قانون کې د بدلونونو، د سوداګریزو خدمتونو د لومړیتوبونو پيژندنې او په شته ننګونو د غلبې حاصلولو په موخه، د ستر کنفرانس په لاره اچولو په اړه خبرې اترې وکړې.  

ښاغلي مایل احمدي افغان سوداګرو ته د بهرنیو هېوادونو له خوا د ویزو نه ورکول، د دوی بانکي زیرمو ته د سوداګرو او خصوصي شرکتونو نه لاس رسی او د پیسو د لېږد لپاره د کمېشن لوړوالی له عمده ستونزو څخه یاد کړل. نوموړي د خصوصي سکتور او نړیوالو بنسټونو ترمنځ د همغږۍ په رامنځته کولو کې د (CIPE) د ادارې رول د مهمو سوداګرو د ستونزو د حل په برخه کې مهم وباله او له یادې ادارې سره یې د اتاق د همکارۍ ډاډ ورکړ.

ښاغلي خانجان الکوزي د سوداګرو او کورنیو پانګوالو ترمنځ د لوی کنفرانس په لاره اچولو کې د دې ادارې (CIPE) پر همکارۍ ټینګار وکړ او د معلوماتو په برخه کې د ننګونو او لومړیتوبونو د پیژندلو او د زیربناوو د جوړولو په برخه کې د پانګونې د جلبولو په موخه یې د دغه ډول کنفرانس جوړول مهم وبلل.

ښاغلي میرویس هوتک د هېواد د سوداګرو او پانګوالو په ګډون د دغه ستر کنفرانس د جوړولو برخه کې، د افغانستان د سوداګرۍ او پانګونې اتاق د هر اړخیزې همکارۍ ډاډ ورکړ.

ښاغلي ایمل شیرزاد په یادو مواردو کې د هېواد د خصوصي سکتور له غړو سره د مرستې په موخه د (CIPE) د لیوالتیا یادونه وکړه او ویې ویل: (CIPE) هڅه کوي چې څنګه کولای شي چې د افغانستان د سوداګرۍ او پانګونې اتاق سره په همغږۍ کې د سوداګرۍ او پانګونې په برخه کې د مالیاتو د قوانینو په اړه روزنیز سیمینارونه او اغیزمن پروګرامونه جوړ کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند قطر ته د خپل سفر په جریان کې په داسی حال کې چې د قطر اتاق سرپرست يې ملتیا کوله د قطر د موټر چلونې روزنیزې اکاډمۍ له مختلفو برخو څخه لیدنه وکړه.

د موټر چلونې روزنیزې اکاډمۍ مسؤل د یادې اکاډمۍ د مختلفو برخو او خدمتونو په اړه د معلوماتو وړاندی کولو په ترڅ کې وویل "د موټر چلونې روزنیزه اکاډمي د نړۍ ټولو هېوادونو ته د منلو وړ د فعالیت معتبر جواز لرلو سره، پیریدونکو ته د موټر چلونې معیاري خدمتونه وړاندی کوي چې یاد معیاري خدمتونه موټر چلوونکي د موټر چلونې او ټرانسپورټ اړین مهارتونه په واک کې ورکوي."  

ښاغلي مهمند د موټر چلونې مهارتونه او د ټرانسپورټ برخه کې لازمې آسانتیاوې یوه بنسټیزه اړتیا وبلله او د هېواد د ټرانسپورټ سکټور په اړه يې د معلوماتو وړاندی کولو په ترڅ کې وویل "د افغانستان د سوداګرۍ او پانګونې اتاق د (IRU) نړیوال سیستم غړیتوب لري او موږ په افغانستان کې د (TIR) سیسټم د رامنځته کولو په تکل کې یو څو هغه خلک چې په دی برخه کې په فعالیت بوخت دي، مسلکي او لازمې زدکړې ترلاسه کړي."
ښاغلي مهمند د قطر موټر چلونې روزنیزې اکاډمۍ له مسؤل څخه وغوښتل چې د افغانستان د (TIR) برخې فعالو کارګرو، مسؤلینو او موټر چلونکو وړتیا لوړونې په موخه دوی  ته روزنیز ورکشاپونه جوړ کړي څو هغوی قطر ته راشي او د اړتیا وړ مسلکي مهارتونه ترلاسه کړي.

د پوهنتونونو او لوړو زدکړو مؤسسو فارغانو او په ادارو کې د شته زدکړیالانو د وړتیا لوړونې او دوی ته د خصوصي سکتور په شرکتونو کې د کارموندنې په موخه، د افغانستان د سوداګرۍ او پانګونې اتاق د میډیوټک مؤسسې سره هوکړه لیک لاسلیک کړ.

د یاد هوکړه لیک پربنسټ، د افغانستان د سوداګرۍ او پانګونې اتاق د هغو زدکړیالانو، لوړو زدکړو مؤسسو او پوهنتونونو فارغانو چې اتاق ته د میډیوټک مؤسسې لخوا معرفي کیږي، وړتیا لوړونې او د خصوصي سکټور هغه شرکتونو چې مسلکي کارکوونکو ته اړتیا لري، د دوی په ورپیژندلو کې همکاري کوي.

یاد هوکړه لیک د افغانستان د سوداګرۍ او پانګونې اتاق د عامل پلاوي سرپرست رئیس ښاغلي میرویس هوتک او د میډیوټک مؤسسې مسؤل ښاغلي احمد ولي احمدي لخوا لاسلیک شو.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند قطر ته د خپل رسمي سفر په جریان کې، په داسی حال کې چې ورسره ټیم يې ملتیا کوله د افغانستان لپاره د امریکا سفارت اقتصادي څانګې له رئیس ښاغلي هنري بیکر سره د لیدنې په ترڅ کې، په هېواد کې د سوداګرۍ او پانګونې اړوند مسایلو، په دی برخه کې شته ننګونو او د افغانستان د سوداګرۍ او پانګونې اتاق هڅو په اړه خبرې اترې وکړې.

ښاغلي مهمند د افغانستان ولس سره د امریکا متحده ایالاتو بشردوستانه مرستو ستایلو او په هېواد کې د سوداګرۍ او پانګونې په اړه د معلوماتو ورکولو ترڅنګ زیاته کړه "د نوي نظام تر حاکم کیدو وروسته، د هېواد سوداګرۍ او پانګونې برخه کې مثبت بدلونونه رامنځته شوي او د تیر کال په پرتله د صادراتو په کچه کې زیاتوالی راغلی دی. سربیره پردی، هیله لرو چې، راتلونکی کال د صادراتو په کچه کې ۷۰ سلنه زیاتوالی نور هم رامنځته شي."

ښاغلي مهمند په هېواد کې د ټولیز امنیت او سولې شتون، د اداري فساد او کوکنارو کښت نه شتون، د ټرانزیټ، ټرانسپورټ او کانونو استخراج برخه کې د لازمو آسانتیاوو شتون د هېواد د سوداګرۍ او پانګونې بهیر تسریع لپاره ښه فرصتونه وبلل او د ښاغلي بیکر څخه يې وغوښتل چې ستر امریکايي شرکتونه په افغانستان کې د کانونو استخرج برخه کې پانګونې ته وهڅوي.

د اتاق د مدیره پلاوي لومړي مرستیال په هېواد کې د سوداګرو ستونزې له ښاغلي بیکر سره شریکې او زیاته يې کړه "د افغانستان د خلکو د شتمنیو کنګل کیدل، سوداګرو ته د ویزو د صدور خدماتو نه شتون او د پیسو د انتقال لپاره د حوالې سیستم څخه ګټه پورته کول هغه موضوعګانې دي چې سوداګرو ته يې ډیر شمیر ستونزې رامنځته کړي دي."
نوموړي د پورته یادو ستونزو حل برخه کې د امریکا متحده ایالاتو د مرستې او همکارۍ غوښتنه وکړه.

ښاغلي هنري بیکر د افغان سوداګرو شته ستونزو تائیدولو ترڅنګ، د افغانستان لپاره د امریکا متحده ایالاتو راتلونکو اقتصادي پلانونو، بشردوستانه مرستو او د هېواد د کانونو د اسخراج په موخه د سترو امریکايي شرکتونو د هڅولو څخه ډاډ ورکړ.

ښاغلي توکل احمدیار د افغانستان د سوداګرۍ او پانګونې اتاق عمومی رئیس، او ښاغلي محمد یونس مهمند د مدیره پلاوي لومړۍ مرستیال پداسې حال کې چې ښاغلیو: فیض محمد خافی د نفت او ګازو اتحادیې لومړۍ مرستیال، فواد صدیقي او عبدالمتین په دبۍ کې د هیواد پیژندل شوي سوداګرو هم حضور درلود. له نوي افغاني قونسل ښاغلي ګل محمد خان ځدران سره په استانبول کې، د یادې قونسلګرۍ په دفتر کې سره ولیدل.


ښاغلي توکل احمدیار، ګل محمد خان ځدران ته په استانبول ښار کې د افغانستان د نوي قونسل په توګه د مبارکی ویلو تر څنګ هېله يې څرګنده کړه چې په یاد هیواد کې د افغانستان د نوي قونسل په ټاکلو سره به د افغان سوداګرو او اتباعو ستونزو ته د حل لارې چارې وموندل شي او د سوداګرۍ د پراختیا ترڅنګ د ترکي پانګوالو د ګډو پانګونې شاهد به ووسو.


ښاغلي محمد یونس مهمند د افغانستان د روانو حالاتو، سوداګریزو مناسباتو او په بیلابیلو سکټورونو کې د ترکي پانګوالو د پانګونې په اړه د معلوماتو وړاندې کولو ترڅنګ، وویل: د سوداګرۍ او پانګونې اتاق د افغانستان د نوی قونسل سره په همکارۍ کولای شې د مشترکو سوداګرۍ پراختیا او ګډو پانګونو باندې فعالیت ولري.