په مزار شریف ښار کې د ګازي برق د تولید د پروژې تړون لاسلیک شو

د مزارشریف د ګازي برق د تولید پروژې تړون د شنبې په ورځ د ۱۳۹۶ کال د سلواغې د میاشتې په ۳مه نېټه د اوبو او انرژۍ وزارت او غضنفر ګروپ تر منځ د هېواد د جلالتمآب جمهور رئیس محمد اشرف غني په وړاندې د کابینې د یو شمېر وزیرانو او د افغانستان د سوداګرۍ او صناېعو خونې د مشرتابه پلاوي د لومړي مرستیال ښاغلي الحاج خانجان الکوزي په ګډون لاسلیک شو. دغه پروژه د ۷۵ملیونه امریکايي ډالرو په پانګې اچونې سره د  غضنفر ګروپ د شرکت لخوا د IFC د مالي ادارې په همکارۍ د عامه او خصوصی مشارکت تر برنامې لاندې پلي کیږي چې د ۵۲ میګاواټو په اندازه برېښنا د تولید وړتیا لري.

د افغانستان د سوداګرۍ او صناېعو خونه د حکومت د دغه کړنې څخه هرکلې کوي او دا یو مهم ګام ګڼي. د دغه راز پروژو عملي کېدل د عامه او خصوصي برخې د مشارکت او په ګڼو برخو کې د پانګې اچونې د هڅونې سبب کیږي او زمونږ د ګرانو هېوادوالو لپاره د کارموندنې ګڼې موخې را منځته کوي.