د هېواد خصوصی سکتور کندز ولایت ته بشردوستانه مرستې واستولې

د افغانستان خصوصی سکتور د ټولنې د یوې سترې برخې په توګه د تاریخ په اوږدو کې په ډېرو سختو حالاتو لکه سیلاوونو، زلزلی، ځمکې ښویدنې، کورنی بېځای شوی او دې ته ورته کړکېجنو شرایطو کې چې د هېواد په هر ولایت کې رامنځ ته شوی، د خلکو مرستې ته وردانګلي دي. د افغانستان د سوداګرۍ او صنایعو اتاق د خصوصی سکتور د اوچت غږ په توګه د دغو مرستو د لا ډېر همغږی کېدلو په موخه دغه نوښت خپل کړي او مرستو ته د خصوصی سکتور هڅولو له لارې توانیدلی چې ډیرې نقدي او غیر نقدي مرستې راغونډې کړي.

دا ځل اتاق مرستو ته د خصوصی سکتور د هڅولو لا لارې توانیدلی چې اولیه مواد لکه: وړه، غوړي، وریجې، جامې او داسې نورو د اړتیا وړو موادو مرستې راجذبې کړي او ټاکل شوې ده چې دغه مرستې به ډېر ژر کندز ولایت او نورو ولایتونو ته د کندز بیځایه شویو کسانو ته ورسوي.

د افغانستان د سوداګرۍ او صنایعو اتاق د مرسته کونکو ترمنځ د لا ډېرې همغږئ د رامنځته کولو او د کندز ولایت د زیامن شویو کسانو، چې د امنیتي ځواکونو او وسله والو مخالفینو ترمنځ د وروستیو نښتو له امله زیانمن شوی ول، د لاس نیوی په موخه یو مطبوعاتی کنفرانس د افغانستان د سوداګرۍ او صنایعو اتاق او نورو ولایتی اتاقونو د مشرتابه، په کابل کې د کندز ولایت د خلکو شورای، د بېلابېلو ولایاتو د خصوصی سکتورونو استازو، د خصوصی سکتور ټولنې غړو او ګڼ شمېر رسینو په حضور د ۱۳۹۳ کال د تلې د میاشتې په ۱۲ مه نېټه جوړ کړ.

د افغانستان د سوداګرۍ او صنایعو اتاق د مدیره پلاوی لومړي مرستیال ښاغلی الحاج خانجان الکوزی په کندز ولایت کې د رامنځ ته شوې وروستی پېښې په اړه، چې د یاد ولایت د ګڼ شمېر پتمنو اوسېدونکو د ټپي او وژل کېدو لامل شو، د خپل ژور خپګان په څرګندولو سره وویل: «د دې دردمنې پېښې له رامنځ ته کېدو وروسته، سمدلاسه د افغانستان د سوداګرۍ او صنایعو اتاق د کندز ولایت خلکو ته مرستو د راټولولو او رسولو په هڅه کې شو. »

ښاغلی الکوزی د خپلې وینا په پيل کې د خصوصی سکتور په استازیتوب د افغانستان لوی او نجیب ملت ته د هېواد د خصوصی ټولنې د فعالینو پیغام یو واحد پیغام په رسولو سره يې وویل: «هر هغه کس چې په جنایتکارانه او ویجاړونکو کړنو لاس پورې کړي، په هرم قوم پورې چې تړلی ووسی زموږ ټولو ګډ دښمن دی.» او په همدې حال کې نوموړي د هېواد له ټولو وګړو څخه وغوښتل څو د پردیو جاسوسانو په خبرو ونه غولېږي او خپل یووالی ټینګ وساتي.

سربېره پر دې ښاغلی الکوزی د دغو مرستو د راټولولو او وېشلو د میکانیزم په اړه څرګنده کړله چې په پیل کې د هر ولایت د خصوصی سکتور مرستې د اړوند ولایت د خلکو د شورای له لوری راټولېږي، چې له نېکه مرغه د ننګرهار، قندهار، مزارشریف، پکتیا او هرات ولایتونو شوراګانو خپل چمتو والی څرګند کړی دی، د مرستو د راټولو د بهیر له بشپړېدو وروسته، یادې مرستې د اړوندو ولایاتو د شوراګانو له لوري د ولایتی اتاق په مرسته په شفافه توګه اړو کسانو باندې وېشل کېږي.

د افغانستان د سوداګرۍ او صنایعو اتاق د مدیره پلاوی سوداګریز مرستیال ښالی الحاج محمد یونس مومند، د قندهار ولایت د سوداګرو او صنعتګرو په استازیتوب وویل چې، په کندهار ولایت کې د ګڼو ستونزو شتون سربېره هم د دغه ولایت خلکو د کندز ولایت اوسېدونکو ته لومړیتوب ورکړ او دوی به د کندز له خلکو سره له هېڅ راز مرستې ډډه ونه کړي.

په کابل کې د کندز ولایت د خلکو د شورای رئیس ښاغلی انجنیر محمد الدین خان همدرد، کندز ولایت ته د افغانستان د ټولو قومونو د آرشیف په توګه اشاره وکړله، او د خصوصی سکتور ټولنې د غړو په ځانګړې توګه د افغانستان د سوداګرۍ او صنایعو اتاق بشردوستانه احساسات یې وستایل. نوموړي ژمنه وکړله چې د مرستو د ویشلو په برخه کې د روڼتیا ټینګښت لپاره به له هېڅ راز هلو ځلو ډډه ونه کړي څو ټول زیانمن شوی کسان او مستحقین وکولای شی له دغو مرستو څخه برخمن شی.

پر کندز ولایت برید دې ښار ته ډېر درانه زیانونه اړولي دي. اوس مهال د کندز ولایت برېښنا قطع شوې، د څکلو صحی اوبوبه شتون نه لري. هډی تړل شوی او د هېواد د امنیتی ځواکونو او طالبانو تر منځ د جګړې له کبله ټولې مواصلاتی لارې تړل شوي او په داسې یو حالت کې د اولیه موادو شتون له امکان څخه لرې خبره ده. له بده مرغه دغه ټولې ستونزې د دې لامل شوی دی چې د کندز مظلوم خلک په داسې یو ناوړه حالت کې ژوند وکړي.

اتاق د مسؤلیت په منلو سره په کور دننه او له هېواد څخه بهر له ټول خصوصی سکتور څخه غواړي څو لکه څرنګه یې چې د تاریخ په اوږدو کې د ډېرو ناوړو شرایطو کې یې له خپلو خلکو سره مرسته کړی ده، یو وار بیا کلک هوډ وکړي او د کندز ولایت د خلکو مرستې ور ودانګي.

د اتاق مشرتابه د هېواد له دفاع ځواکونو څخه غواړي څو د جګړې ډګر د ښار له منځ او له استوګنیزو سیمو لرې له ښار څخه بهر ته وباسي څو خصوصی سکتور وکولای شی چې خپلې مرستې د کندز ولایت جګړې ځپلو خلکو ورسوي. د یادولو وړ ده چې پرون د هېواد یو شمېر ملی سوداګرو کندز ولایت د مرستو په استولو لاس پورې کړ، چې له بده مرغه یو شمېر موټرونه کندز ښار ته د ننوتلو پر مهال له جګړې سره مخ شو او اور ورته ولګېده.

د افغانستان د سوداګرۍ او صنایعو اتاق، د ملګرو ملتونو له سازمان څخه غواړي څو په دې برخه کې مداخله وکړي او د جګړې له ښکېلو خواوو څخه وغواړي څو لږ تر لږه یوه ورځ اور بند په پام کې ونیسي څو د خصوصی سکتور مرستې زیانمن شویو کسانو ته ورولېږل شي.

د دې محفل د انځورونو د لیدلو لپاره دلته کلیک وکړئ.