د هېواد عالي اقتصادي شورا د صادراتو ملي ستراتیژي تصویب کړه

د هېواد د صادراتو د پراختیا او د افغانستان د صادراتو د ملي سترابیژۍ د نهایي کولو په موخه د افغانستان د سوداګرۍ او صناېعو خونې د هغه  پر له پسې هلو ځلو په پائیله کې چې د یادې ستراتیژۍ د تدوین په موخه په تېرو لسو میاشتو کې د خصوصي سکټور او د افغانستان د سوداګرۍ او صناېعو وزارت  او نړېوال سوداګریز مرکز (ITC)  او اړوند نورو ارګانونو تر منځ تر سره شوې د حکومت د اقتصادي عالي شورا د ۱۳۹۷کال د وري د میاشتې د ۱۴مې نېټې په هغه غونډه کې چې مشري یې د هېواد جمهور رئیس جلالتمآب محمد اشرف غني کوله د افغانستان د صادراتو ملي ستراتیژي تصویب کړه.

د افغانستان د صادراتو ملي ستراتیژي په ټوله کې د ښه کیفیت لرونکو توکو تولیدولو ته د خصوصي سکټور د پام را اړول، د کسب او کار او پانګې اچونې  لپاره د ښه شرایطو را منځته کول، په بازارونو کې د کورنېو تولیداتو څخه ملاتړ، د بنسټونو د ظرفیتونو پیاوړي کول، د دولت څخه ملاتړ کول او دغه راز د اقتصادي پراختیا په مرسته د سولي راوستل په بر کې نیسي.

د افغانستان د سوداګرۍ او صناېعو خونه  د حکومت د دغه نیک اقدام څخه د هرکلي په ترڅ کې دغه کړنه د کورنېو تولیداتو او د هېواد د صادراتو څخه د ملاتړ په برخه کې ګټور ګڼي او هیله کوي څو د هغۍ د عملي کولو په موخه حکومت کوټلي ګامونه واخلي.

د سوداګرۍ خونه د هېواد د خصوصي سکټور په استازیتوب د دغه ستراتیژۍ د پلي کولو په برخه کې د حکومت له اړوند ادارو سره اړینه مرسته ترسره کړي او د خصوصي سکټور له ټولو غړو په خاصه توګه د هېواد له صادر کوونکو څخه غوښتنه کوي څو د را منځته شوي فرصت څخه د تولیدي ظرفیت د لوړاوي او په خاصه توګه د صادراتي توکو  د کیفیت ښه کولو ته جدي پاملرنه وکړي.