د تاجکستان نړېوال نندارتون د دوشنبې په ښار کې جوړشو

د تاجکستان نړېوال نندارتون د افغانستان، تاجکستان، ازبکستان، بیلاروس، انډونیزیا او قزاقستان د هېواد په ګډون د ۳ ورځو لپاره د وري د میاشتې له ۹ څخه تر ۱۱ نېټې د تاجکستان هېواد په دوشنبې ښار کې جوړ شو. په دغه نندارتون کې په ګڼو سکټورونو پورې اړوند ۴۰ افغاني شرکتونو ګډون کړې وو. یادو افغاني شرکتونو د مرمر ډبرې، ګران بیه او نیمه ګران بیه کاڼي، جلغوزي، د افغانستان جوړ کړي غوړي، پنبه، د کالیو او چرمي صناېعو په ګډون ګڼ شمېر لاسي توکي، ګاڼې، قالینې او یو شمېر نور توکي نندارې ته وړاندې کړل.

په دغه نندارتون کې د افغانستان د سوداګرۍ او صناېعو خونې په استازیتوب د یادې خونې د مشرتابه پلاوي لومړي مرستیال ښاغلي الحاج خانجان الکوزي، دخونې صنعتي مرستیال ښاغلي الحاج باز محمد افسرزي، د خونې د خوراکي توکو د کمېټې رئیس ښاغلي نظام الدین تاج زاده، د خونې د صادراتو د پرمختیا د څانګې مسؤل ښاغلي میرزمان پوپل او د ننګرهار د سوداګرۍ او صناېعو خونې د مشرتابه پلاوي رئیس ښاغلي الحاج ګلمراد عرب ګډون کړې وو.

دغه نندارتون د پنجشنبې په ورځ د غرمې مخکې پرانستل شو چې د همدغې ورځ د ماسپښین په ۳ بجو د یادو هېوادونو سوداګریزه ناسته هم جوړه شو.