پاکستان د افغانستان د تازه میوې او تازه سبزیجاتو په صادرولو کې ستونزې جوړوي

د پاکستان دولت په دې نږدیو کې په افغاني زراعتي تولیداتو ډیر سخت شرایط وضع کړي، چې له امله یې پاکستان ته صادارات دریدلي دي. نو په همدې اساس په کابل کې پاکستان سفارت یوه مطبوعاتي خبرپاڼه خپره کړې، چې په کې لیکلي یې دي، چې د پاکستان دولت په افغاني توکو باندې کوم بندیز ندې لګولی او نه یې کوم بند تړلی، بلکې د صحي معیارونو د ښه ساتلو لپاره یې په خپله وارداتي پالیسۍ کې تغیرراوستی، چې له مخې یی ۸۲۰ قسمه زراعتي اقلام چې پاکستان ته د ټولې نړۍ څخه صادریږي باید د صحی معیار سند یا قرنطین ولري، همدارنګه خبرپاڼه کې دا هم ویل شوي چې د پاکستان د قرنطین د ادارې استازي په طورخم او چمن کې په عملي توګه وجود لري او خپل کارونه پرمخ بیایی.

د افغانستان د سوداګرۍ او صنایعو خونه د پاکستان سفارت د یادې مطبوعاتي خبرپاڼې او ادعاوو په جواب کې لاندې ټکي زیاتوي:

۱: دا صحیح ده چې پاکستان په رسمي توګه نه بندر تړلی او نه هم د افغان زراعتي توکو باندې بندیز لګولې دی، بلکې پاکستاني اړخ پرته له کومې رسمي اطلاع څخه پر افغان زراعتي توکو دومره سخت شرایط وضعه کړي لکه د قرنطین سرټیفیکټ او نور شرایط برابرول، چې په دومره لږ وخت کې یې پوره کول د امکان څخه لرې ده.

۲: په سپین بولدک او طورخم کې د قرنطین د استازو موجودیت او د هغوۍ د عملي کار دعوه بې اساسه ده ځکه چې د دلوې میاشتې تر دویمې نېټې پورې نه د قرنطین اداره موجوده وه او نه یې کوم استازی موجود وه.

۳: افغانستان د کال ۱۵۰ زره ټنه تازه میوه او ۱۵۰ زره ټنه تازه سبزیجات پاکستان ته صادروي او په همدې اساس پرته د ټرانزیټ څخه پاکستان د کال تقریبآ یومیلیون ټنه تازه میوه او سبزیجات افغانستان ته واردوي، چې دغه مالونه داسې کوم سرټیفیکټ او یا د قرنطین سند نه لري، نو د پاکستان د دولت لخوا په مختلفو بهانو د دا ډول خنډونو (قرنطین) جوړول به نه یوازې د دواړو هیوادونو اقتصادي اړیکې زیانمنې کړي بلکې افغانستان به هم مجبوره کړي ترڅو متقابل عمل ترسره کړي او پاکستاني مالونه ودروي، چې په پاۍ کې به یې اقتصادي ضربه نه یوازې د دواړو خواوو سوداګرو ته ورسیږي بلکې د دواړو خواوو خلک او دولتونه به هم زیانمن شي.

بنآ د دواړو هیوادونو د اقتصادي او سیاسي اړیکو د ښه کولو او د اقتصادي همکاریو پراختیا په موخه د افغانستان د سوداګرۍ او صنایعو خونه د افغانستان د دولت څخه غوښتنه کوي تر څو د پاکستان اړخ سره زر ترزره په یاده ستونزه بحث وکړي او د حل لارې ورته پیدا کړي.