د کابل- بمبي، نوي هوایي دهلیز پرانستل شو

په هغه پرانست غونډه کې چې د ۱۳۹۶ کال د مرغومي د میاشتې په ۶مه نېټه د کابل او هندوستان هېواد د بمبي ښار تر منځ د نوي هواي دهلېز د افتتاح په اړه د کابل په حامد کرزي نړېوال هوایي ډګر کې جوړه شوې وه، د افغانستان د جمهوري ریاست د عالي مقام دوهم مرستیال جلالتمآب پوهاند محمد سرور دانش، د افغانستان د سوداګرۍ او صناېعو وزیر ښاغلي محمد همایون رساء، د کرنې، اوبه لګولو او مالدارۍ وزیر ښاغلي نصیر احمد دراني، د افغانستان د سوداګرۍ او صناېعو خونې د مشرتابه پلاوي لمړي مرستیال، ښاغلي الحاج خانجان الکوزي، د مشرتابه پلاوي سوداګریز مرستیال ښاغلي الحاج محمد یونس مومند، د مشرتابه پلاوي صنعتي مرستیال ښاغلي الحاج باز محمد افسرزي، د بهرنېو چارو وزارت د اقتصادي همکارېو معینې، آغلې عادله راز، په کابل کې د هندوستان د سفارت استازي او ګڼ شمېر سوداګرو ګډون کړې وو.

د هواېي دهلېزونو برنامه، چې د افغانستان د دولت یو د مهمو اقتصادي برنامو له جملې څخه ده، د لمړي ځل لپاره د ۱۳۹۶ کال د غبرګولي په میاشت کې په کار پېل وکړ، چې د افغانستان د جلالتمآب جمهور رئیس په لاس پرانستل شوه. د دغه دهلېز له لارې تر دې دمه په ټولیزه توګه ۵۴ الوتنې تر سره شوي چې جمعآ ۱۶۴۰ ټنه وچې او تازه مېوې، طبي بوټي، لاسي صناېع او قالینې له دغه لارې بهر ته استول شوي دي. د دغه لړۍ د پنځوسمې الوتنې د لمانځغونډې په ترڅ کې چې د دولت د رسنېو په دفتر کې تر سره شوه د هغه هوکړه لیک له مخې چې د مالي او بانکي چارو په برخه کې د جمهوري ریاست د عالي مقام د سلاکار د دفتر، سوداګرۍ او صناېعو خونې او کام ایر هوایي شرکت تر منځ لاسلیک شوه، چې د همدغه هوکړه لیک پر بنسټ نن ورځ د نوي هوایي دهلیز له لارې د کابل او بمبي تر منځ د لمړي پرواز پرانسته تر سره شو.  د دغه الوتنې له لارې د دوه افغان شرکتونو اړوند ۴۰ ټنه توکي د هندوستان هېواد بمبي ښار ته لیږدول کیږي چې په بېرته راتګ سره به یې ۴۰ ټنه سوداګریز توکي هېواد ته وارد کړي. بمبي د هندوستان د لویو او ګڼ میشته ښارونو له ډلې څخه دې، چې د افغاني توکو لپاره د خرڅلاو او بیې له نظره مناسب بازار دې.

په لمړۍ کې په اقتصادي چارو کې د بهرنېو چارو د وزارت معینې آغلې عادله راز د خپلو خبرو په ترڅ کې د دغه دهلېز د پرانستې له امله د افغانستان د حکومت او د هندوستان هېواد د هغه رول او علاقه مندۍ له امله چې د افغانستان په سوداګرۍ کې یې لري خپله خوښي څرګنده کړه او په ګڼو سترو پروژو لکه د ټاپي د ګازو نل لیکه، د چاه بهار بندر او هوایي دهلیز په برخو کې د مهم سوداګریز شریک په توګه یې د دغه هېواد څخه مننه وکړه.

ښاغلي خانجان الکوزي د غونډې ګډونوالو ته د ښه راغلاست په ترڅ کې د خصوصي سکټور په استازیتوب د خصوصي سکټور په برخه کې د حکومت له خوا د کړو ژمنو د عملي کېدو له امله مننه او درناوې وکړ او په دې اړه يې په خاصه توګه د جلالتمآب ولسمشر د خاصې پاملرنې له امله مننه وکړه. دغه راز ښاغلي الکوزي د ۲۱۸۰۰۰ ټنه تازه مېوو صادرات د هېواد په تاریخ کې یو ریکارډ او ستره لاسته راوړنه وبلله. هغه دغه راز پدې برخه کې د ولسمشرۍ د مقام د اقتصادي مشاور ښاغلي اجمل احمدي د هلو ځلو څخه هم مننه وکړه چې شپه او ورځ یې له دوې سره همکاري کړې ده.

ښاغلي الکوزي د خپلې وینا په ترڅ کې د بمبي ښار د ښه مارکیټ او هغلته د افغاني توکو  ښه بیېو ته هم اشاره وکړه. هغه دغه راز د چاه بهار په بندر کې د شته ستونزو څخه د یادونې په ترڅ کې هيله مندي وښوده تر څو دغه ستونزې د حکومتي چارواکو له خوا حل او زمونږ سوداګر په دې وتوانیږي د دغه لارې خپل توکي په خاص ډول خپلې تازه او وچې مېوې لکه مڼې او انار د هندوستان هېواد ته ولیږدوي. هغه دغه راز د هندوستان هېواد ته د تازه مېوو لېږدوونکو ته د افغانستان د حکومت له خوا د ۸۰ سلنه سبسېدې د ورکړې څخه خوښي څرګنده کړه. ښاغلي الکوزي یو لړ نورو ستونزو لکه د صنعتي چارو په موخه ځمکې ته اړتیا او د ګمرکي تعرفې او د هندوستان په هوایي ډګرونو کې د بارګیرۍ په برخه کې د هندوستان او افغانستان هېوادونو تر منځ د عربي هېوادونو او ایران په څېر یو هوکړه لیک لاسلیک کول اړین وبلل او دغه راز د هندوستان هېواد د نورو ښارونو، قزاقستان،  منځنۍ آسیاء او عربي هېوادونو تر منځ د نوو سوداګریزو هوایي دهلېزونو د رامنځ ته کېدو په اړه هیله مندي وښوده.

د دغه مراسمو په پاې کې د ولسمشرۍ د عالي مقام لمړي مرستیال جلالتمآب پوهاند محمد سرور دانش د خپلو هر اړخیزې وېنا په ترڅ کې د هندوستان هېواد د بمبي ښار او کابل تر منځ د هوایي دهلېز پرانسته د اقتصادي چارو د پرمختګ په لور یوه ستره لاسته راوړنه وبلله. ښاغلي دانش په دې اړه د دولت لخوا رامنځ ته شوو یو لړ پرمختګونو ته هم اشاره وکړه او د اقتصادي چارو د پرمختګ په برخه کې یې په منظمه او جدي توګه د دولت د عالي اقتصادي شورا د غونډو د تر سره کېدو لامل یې په دې اړه د حکومت ټینګه ژمنه وبلل. هغه دغه راز د هندوستان هېواد د مرستو څخه هم مننه وکړه.