قزاقستان د افغانستان د تولیداتو لپاره ښه بازار لري

د افغانستان د سوداګرۍ او صنایعو خونې رئیس ښاغلي عتیق الله نصرت د افغانستان د اسلامي جمهوریت اجرائیه رئیس ښاغلي ډاکټر عبدالله عبدالله په مشرۍ او د کابینې د یو شمېر وزیرانو په حضور د قزاقستان په پلازمېنه استانه کې ددغه هیواد د سوداګرۍ خوني له مسؤلینو، سوداګرو او پانګه والو سره وکتل.


په دغه ناسته کې د افغانستان او قزاقستان ترمنځ د سوداګریزو، ټرانزیټي، کرنېزو او د صادراتو او وارداتو په برخه کې د اړیکو پر رامنځته کېدا او پیاوړتیا بحث وشو.

په پېل کې د قزاقستان د نړیوالې سوداګرۍ خونې مشر ایان ایرینوف د ښه راغلاست او کور ودانۍ تر څنګ د افغانستان پلاوي ته وویل، چې د دواړو هیوادونو ترمنځ د ۵۰ میلیونه ډالرو په اندازه سوداګریزي اړیکې وجود لري، خو په خبره ئې چې دا اندازه کافي نه ده او باید نوري هڅي هم وشي.

نوموړي زیاته کړه، چې د ټرانزیټ، مایع ګاز، کانونو، صنایعو او لوژستیکو په برخو کې قزاقستاني سوداګرو او پانګه والو ګډو همکاریو ته ژمن دي او په دې باور دي، چې باید صادرات او واردات ډېر شي.


د افغانستان د سوداګرۍ او صنایعو خوني عامل پلاوي رئیس ښاغلي عتیق الله نصرت د مننې تر څنګ وویل، چې قزاقستان د افغانستان د تولیداتو لپاره یو قوي مارکیټ‌ دی، خو په خبره یې چې دغه هېواد ته د افغان صاداراتو کچه ۵۰ فیصده کمه شوې ده.

ښاغلي نصرت زیاته کړه، چې د ۲۰۱۶ میلادي کال په لومړیو کې د قزاقستان د سوداګرۍ خونه په کابل کې جوړه شوه، چې د دوه اړخیزو سوداګریزو اړیکو لپاره مهم ګام و،‌ خو په خبره یې چې لا هم ګڼې ستونزي پرتې دي او حکومتونه یې په ګډه سره حل کړي.

د خونې عامل پلاوي رئیس په دوام کې وویل، چې د دواړو هېوادونو حکومتونه دې سوداګرو ته د اوږد مهالو وېزو د ورکړې، د ګمرکې تعرفې د کمښت او همداراز په دواړو هیوادونو کې د اړوندو سوداګرو لپاره د هماغه هېواد د بانکې څانګو په پرانېستلو کې مهم ګامونه پورته کړي، څو د پیسو لېږد چټک شي او سوداګري وده وکړي.

د افغانستان د سوداګرۍ او صنایعو وزیر ښاغلي همایون رسا وویل، چې دوی به ډېر ژر په استانه کې د افغان سفارت په چوکاټ کې تجارتي اتشه معرفي کړي او هیله لري، چې دا چاره به د عمومي تجارت د ودي ترڅنګ په قزاقستان کې د افغانستان د صادراتو د ډېروالي په برخه کې مرسته وکړي.

د هیواد اجرائیه رئیس د قزاقستان د سوداګرۍ خوني له مسؤلینو سره په لیدنه کې وویل، ‌چې افغان پلاوي په نندارتون کې د ګډون لپاره دلته راغلي دي، د قزاقستان له لومړي وزیر سره به لیدنه ولري او د دوه اړخیزو سوداګریزو او اقتصادي اړیکو پر پراختیا به عملي او مفصل بحثونه ولري.

اجرائیه رئیس وویل، چې د ازبکستان سره د ټرانزیټي تړون نه شتون د افغانستان او قزاقستان پر سوداګریزو اړیکو هم سیوری اچولی، خو په وینا یې امید شته، چې ازبکستان به د ولسمشر محمد اشرف غني په راتلوونکې سفر کې به ټرانزیتي تړون لاسلیک شي.