د سوداګرۍ او صنایعو خونې سوداګریز مرستیال د کندهار ولایت د یو شمېر سوداګرو ستونزې واورېدې

الحاج محمد یونس مهمند د افغانستان د سوداګرۍ او صنایعو خونې سوداګریز مرستیال د کندهار ولایت له یو شمېر سوداګرو سره د چنګاښ د میاشتې په ۲۶مه نېټه ولیدل، د هغوي ستونزې یې واورېدلې او ډاډ یې ورکړ، چې د افغانستان د سوداګرۍ او صنایعو خونه او افغان ولسمشر په ګډه کار کوي، تر څو ستاسو د تولیداتو او کرنیزو محصولاتو د صادراتو لپاره بېلابېلې ځمکنۍ او هوایي لاري پیدا کړي.

ښاغلي مهمند د ولسمشر له وروستیو هڅو، په تېره د افغانستان-هندوستان هوایی دهلیز پرانېستې په اړه سوداګرو ته معلومات او ډاډ یې ورکړ، چې له دې وروسته به په منظم ډول د دوی توکي د یاد هوایی دهلیز او د ځمکي له لارې په منظمو او عصري یخچالي کانټینرونو کې نورو هېوادونو ته صادر شي.