د افغانستان د سوداګرۍ او پانګونې اتاق ژمن دی، چې د تشبثاتو، سوداګرۍ او پانګه اچونې لپاره د وړ چاپیریال په رامنځته کولو، د پراختیايې پالیسي ګانو جوړولو، د اقتصادي او پراختیايې برنامو تطبیق په موخه د چارو انسجام او د تشبثاتي او سوداګریزو فعالیتونو د ملاتړ او خوندیتوب په برخه کې تل د افغانستان دولت سره همکاري کوي.

د افغانستان د سوداګرۍ او پانګونې اتاق شاوخوا ۷۰۰۰۰ انفرادي او ۲۸۱ څخه زیات انجمنونه، اتحاديې او کوپراتیفونه د خپلو سازماني غړو په توګه لري چې په دی اساس د خصوصي سکتور د یوې سترې کتلې مشروع او قانوني استازیتوب کوي. خصوصي سکتور ته د نورو فعالیتونو برسیره اتاق په ۱۳۹۴ لمریز کال د سوداګریزو شخړو حل مرکز رامنځته کړ. دغه مرکز تر دی مهاله د ۲۰۰ څخه ډیرې سوداګریزې شخړې حل و فصل کړي او تیار دی چې د خصوصي سکتور فعالیتونو د لا ښه والي، سوداګریزو او تشبثاتي فعالیتونو معیاري جوړونې او د پانګه اچوونې خوندیتوب په برخه کې حقوقي مشورې وړاندی کړي.

د افغانستان د سوداګرۍ او پانګونې اتاق مصمم دی، چې دولتي ادارو، نړیوالې ټولنې او پراختیايې شریکانو سره د افغانستان د اقتصادي پراختیا، پانګه اچونې او کورنیو تولیداتو په زیاتوالي، په نړیوالې او سیمه ایزې سوداګرۍ کې ګډون او د نافذه قوانینو په نظر کې نیولو سره د تشبثاتو او سوداګرۍ د پراختیا او خوندیتوب په برخو کې همکاري وکړي.  

د افغانستان د سوداګرۍ او پانګونې اتاق په لاندې برخو کې خپلو بنسټیزو فعالیتونو ته دوام ورکوي:

• د شرکتونو د حقوقي اشخاصو او انفرادي سوداګرو تثبیتول
• د پانګه اچوونو اغیزمنتیا
• په صنعتي پارکونو کې د ځمکې ویش،
• جواز ورکونې پروسه
• د پالیسي ګانو په طرحه او تطبیقولو کې د لازمې همغږۍ او انسجام رامنځته کول
• د پانګه ایزو او تشبثاتي فعالیتونو معیاري جوړونه
• د شتو ستونزو له منځه وړل او ننګونو ته د پای ټکې کیښودل
• او په راتلونکي کې هم د ستونزو مخه نیول

غوښتنه کیږي چې د دولتي ادارو له خوا د افغانستان د سوداګرۍ او پانګونې اتاق رول او ارزښت تر اغیز او نفوذ لاندی ونه نیول شي او دی اتاق ته فرصت ورکړل شي ترڅو په یادو برخو کې د خصوصي سکتور اوچت غږ، سلا مشورې ورکونې او پراختیايې موخو ته د رسیدو په لاره کې د دولت همکار اوسي.

توکل احمدیار

د افغانستان د سوداګرۍ او پانګونې اتاق عمومي رئیس