د اتاق د عامل پلاوي رئیس د صادراتو په ملي استراتیژی کنفرانس کې ګډون وکړ

د افغانستان د صادراتو ملي استراتیژی کنفرانس د ۱۳۹۵ کال د دوشنې په ورځ د کب د میاشتې په ۲ مه نېټه د انټر کانتیننټال په هوټل کې، د افغانستان د سوداګرۍ او صنایعو وزیر، د کرنې، اوبو لګولو او مالدارۍ وزیر، د افغانستان د سوداګرۍ او صنایعو د خونې د عامل پلاوي رئيس او مرستیال، د نړیوالو ادارو استازو، د صادرکوونکي او د خصوصی سکتور د استازو په شتون ترسره شوه.

په دې غونډه کې د افغانستان د سوداګرۍ او صنایعو وزیر ښاغلي محمد همایون رسا میلمنو او ګډونوالو ته د ښه راغلاست ویلو ترڅنګ  د دې کنفرانس د دایرېدو پر اهمیت خبرې وکړې او زیاته يې کړه: " د افغانستان صادرات د 2012 کال نه راپدیخوا مثبت خواته روان دی، حکومت د صادراتو د پرمختګ لپاره خپل ژمنتیا ښودلې دی او د افغانستان د سوداګرۍ او صنایعو وزارت د صادراتو د پرمختګ لپاره هم اهم ګامونه ترسره کړې دی. "

ښاغلي رسا د نړیوالو سترو نندارتونونو په لاره اچول، د هوایی کارګو له لاری د صادراتي توکو د لیږدولو د پروسیجر لنډول، د نړیوالو معیاروی لابراتوارونو رامنځته کول او ISO سرتفکیت وېشل، د سودارګرۍ او صنایعو وزارت د لومړیتوبونو په توګه یاده کړه.

د کړنې، اوبو لګونې او مالدارۍ وزیر ښاغلي اسدالله ضمیر د افغان حکومت پر پنځه کلن پلان، چې د بروکسیل په کنفرانس کې وړاندې شوې و، خبرې وکړې او کړهنه يې د حکومت او د صادراتو د پرمختګ وسیله وبلله.

ښاغلي ضمیر زیاته کړه: " د نړیوال بانک لخوا ترسره شوې سروې ښیې، چې افغان ځوانان کرنې برخې ته لېواله دي. "

پدغه غونډه کې ښاغلي عتیق الله نصرت د صادراتو پر اهمیت خبرې وکړې او وویل:" صنایع او صادراتو د یو هېواد د پرمختګ دوې مهمې برخې جوړوي او د هر هېواد د ملی اقتصاد د پراختیا لپاره بنسټیز رول لری، د صنایع او صادراتو د پرمختګ لپاره د حکومت ملاتړ خورا اهم ګنل کیږي. په حقیقت کې د حکومت د ملاتړ نه پرته د صادرات او صنایعو پرمختګ ناشونی دی. نورو هېوادونه د خپلو محصولاتو او تولیداتو لپاره نړیوال بازارونه پیدا کړې دي، نړیوال اعتبار یې ترلاسه کړې دي؛ دا هرڅه يې پر محصولاتو د بیلانس د معیاری وضع کولو پر بنسټ لاسته راوړې دي، خو په ډير خواشینۍ سره باید وویل شی، سره له دې چې افغانستان ښه استراتیژیک جغرفیوی موقعیت لري او بر سېره پردې، چې د تېرو پنځلسو کلونو په اوږدو کې د نړیوالو لخوا میلیاردونه ډالر رابرسیره شوه، خو بیاهم د تادیاتی بیلانس په برخه کې په ډير خراب حالت کې ځای لری او مونږ اوس هم د صادراتو د بېساری کسر (کمښت) مخ یو. "

ښاغلي نصرت د صادراتو د نه پرمختګ مهم لاملونه یې په لاندې توګه روښانه کړه:

د صادراتو او تولیداتو د پرمختګ لپاره د دولت له لورې د اساسي او ضروری ملاتړ نه شتون، په تیره بیا د صادراتو د پراختیا د استراتیژی نشتون؛

د صادراتی توکو د پروسیس لپاره د ځانګړو اقتصادی زونونو (حوزو) نه شتون؛

د بیخ بنایی آسانتیاو په ځانګړۍ توګه د بریښنا نشتوالي؛

د کړهنیزو صادراتی توګو لپاره د سړو خونو نشتوالي؛

د صادراتو په برخه کې د نړیوالو معیارونو او سرتیفکتونو نشتوالی، چې دغه موضوع اکثرآ د اروپا څخه د افغانستان د صادراتی توګو د مسترد کیدو لامل ګرځیدلی ده؛

ښاغلي نصرت د صادراتو د پراختیا د استراتیژۍ  جوړیدو یو نیک ګام وباله او زیاته یې کړه : " دا استراتیژی ۱۴ کاله مخکې باید جوړ شوې وای، اوس مونږ به له دا ډول کسر بیلانس سره نه مخ کیدو. "

د خونې د عامل پلاوي رئیس له حکومت څخه غوښتنه وکړه څو د ګاونډیو هېوادونو او له هغه هېوادونو سره چې د افغانستان د سوداګریزو توکو لپاره بالقوه مارکیټ جوړوی سوداګریز او ترانزیتي هوکړه لیکونه لاسلیک او د هغه پر بنسټ د افغانستان د صادراتي توکو لپاره یو لړ معافیتونه په نظر کې ونیول شي.