د اتاق سوداګریز مرستیال د زړو اوسپنو(داغمه جاتو) د اجرائیه کمیټي له غړو سره وکتل

د افغانستان د سوداګرۍ او صنایعو خونې د مدیره پلاوي سوداګریز مرستیال ښاغلي الحاج محمد یونس مومند، د افغانستان د داغمه جاتو د اجرائیوي کمېټې له پلاوي سره د سه شنبې په ورځ د مرغومي د میاشتي په ۲۱ مه نېټه د افغانستان د سوداګرۍ او صنایعو په خونه کې وکتل.

په دغه ناسته کې د اتاق د مدیره پلاوي غړی ښاغلي عصمت الله وردګ، د مالیې وزارت د تصدیو او شرکتونو عمومي رئیس ښاغلي محمد ابراهیم شمس، د افغانستان د سوداګرۍ او صنایعو خونې د عامل پلاوي د ډیپارټمنټونو استازي او د خصوصي سکتور ځیني غړي ګډون درلود.

په پېل کې ښاغلي الحاج محمد یونس مومند د ښه راغلاست او کورودانۍ ترڅنګ د زړو اوسپنو په برخه کې د فعالو فابریکو د فعالیتونو په هکله خبرې وکړې او وویل : " مونږ د هغو فابریکو د انتخاب په برخه کې چې د زړو اوسپنو په برخه کې فعالیت کوي، له تاسو سره مرسته کوو تر څو وړ فابریکي وټاکئ. او د دې کمیټي له غړو څخه مې غوښتنه دا ده، چې په دغه برخه کې ټولو فعالو فابریکو ته ونډه ورکړل شي."

ښاغلي مومند د حکومت څخه وغوښتل چې د زړو اوسپنو د قاچاق مخه دې ونیسي او د داخلي شرکتونو لپاره فرصتونه برابر کړي.

ښاغلی محمد ابراهیم شمس د افغانستان د سوداګرۍ او صنایعو خونې د مشرتابه پلاوي له همکاریو څخه مننه وکړه او وویل:"  موږ د کمیټي په تېره ناسته کې پریکړه وکړل، چې د افغانستان د سوداګرۍ او صنایعو خونې چې د خصوصي سکتور نمایندګي کوي او د اوسپنو د ذوب فابریکو له استازو سره یو ځای مجلس وکړو. تر څو په دغه برخه کې پرتې ستونزې معلومي او لازم حل لارې ورته ولټول شي. "

ښاغلي شمس د داغمه جاتو د فابریکو په ظرفیتونو، ځانکړنې، د زړو اوسپنو د ذوب پر اندازه او ارزښت هم خبرې وکړې او ټینګار یې وکړ، چې د زړو اوسپنو په برخه کې د فعالو فابریکو د تشخیص څخه وروسته، دا فابریکي به ددې جوګه شي، چې په لویه کچه فعالیت وکړي او ورسره خلکو ته د کار زمیني هم برابرې شي. "

ښاغلي عصمت وردګ د داغمه جاتو په برخه کې د ولسمشر له ځانکړي پاملرنې څخه مننه وکړه او د خپلو تجربو او د فابریکو د تاسیس کلونو په اړه معلومات وړاندې کړل او ورسره زیاته کړه، چې حکومت باید د فابریکو په ټاکلو کې د یو سلسله معیارونو څخه کار واخلي تر څو حق حقدار ته وسپارل شي او له بلې خوا هغه رښتیني پانګوال چې د هېواد په داخل کې فابریکي لري او عملاً کار کوي، نور هم پیاوړی شي.

ښاغلي وردګ د اوسپنو د قاچاق په اړه هم خبرې وکړې چې په مختلفو نومونو اوسپنه د هېواد څخه بهر ته صادریږي. حکومت یې باید مخه ونیسي او عاملین یې مجازات کړي تر څو نورو ته پند وګرځي.