د خوراکي توکو د غني کولو د پیاوړتیا په موخه د GAIN د ادارې له مسوولینو سره ناسته

د افغانستان د سوداګرۍ اوصنایعو خونې رهبري پلاوي د خوراکې توکو د پرمختیا نړیوال اتحاد (GAIN) له استازو سره د 1395 کال د مرغومي د میاشتي په لومړي نېته د چهار شنبي په ورځ د کابل سټار په هوټل کې چې د افغانستان د سوداګرۍ او صنایعو خونې له خوا بلل شوي ول، وکتل.

په دغه ناسته کې د افغانستان د سوداګرۍ او صنایعو خونې لومړی مرستیال ښاغلي الحاج خان جان الکوزي، د مدیره پلاوي غړي، ښاغلي الحاج محمد داود یوسفزي، ښاغلي الحاج نظام الدین تاجزاده، د خوني د مدیره پلاوی مشاور عبدالواسع حقیقي، د خونې د عامل پلاوی سرپرست او مرستیال ښاغلي الحاج محمد توفیق داوري او د خوراکي توکو د پرمختیا نړیوال اتحاد (GAIN) عمومي رئیس محب الله وحدتي او ددې ادارې ځانګړي استازی آغلي دورا پاناجیديس (Dora Panagides) ګډون درلود.

په پېل کې ښاغلي الکوزي د ښه راغلاست او مننې تر څنګ وویل: ( زموږ پرونۍ غونډه د افغانستان د ولسمشر ښاغلي محمد اشرف غني ډېر خوښ شوي، اوس په کار ده، چې د خوړو د غني کولو د عامولو او راتلوونکو اقداماتو په اړه پریکړه وکړو، چې حکومت باید کوم کارونه وکړي، مرسته کوونکي اداري باید څه وکړي او د افغانستان د سوداګرۍ او صنایعو خونې په چوکاټ کې جوړ شوي بورډ کوم کارونه پر مخ ویسي.)

ښاغلي الکوزي زیاته کړه: "موږ د خوړو د غني کولو په برخه کې ډېر جدي یو او غواړو، چې خلکو ته غني شوي خواړه تولید او وارد کړو، دا موضوع باید همدلته پای ته ونه رسیږي، بلکې نور هم عامه شي."

آغلي دورا د افغانستان د سوداګرۍ او صنایعو خونې له مشرتابه پلاوي او عامل پلاوي له هڅو او پرله پسی تعقیبولو څخه مننه وکړه او وویل: " موږ غواړو، چې په دغه برخه کې د افغان حکومت او خصوصي سکتور سره ډېر کار وکړو، زموږ پروژه د سپتمبر په میاشت کې پای ته رسیږي، ولی د تمدیدولو امکان یې هغه وخت به ډېر وي، چې حکومت د عامې روغتیا د وزارت له خوا وړاندې شوي مقرره چې اوس په وزارت عدلیه کې دی، ژر تر ژره تصویب او زموږ د راتلوونکو فعالیتونو لپاره اساس کیږدي. که دا مقرره تصویب نه شي، نو په دې برخه کې به بهرنۍ مرستي کمې شي."

ښاغلي الکوزي آغلي دورا ته ډاډ ورکړ، چې د افغانستان د سوداګرۍ او صنایعو خونه د حکومت په مهمو شورا ګانو او کمېټو لکه د قوانېنو کمیټه، د اقتصاد عالی شورا او نورو کې غړیتوب لري. دا موضوع موږ تعقیبوو او هڅه کوو، چې پر حکومت فشار راوړو، تر څو دا مقرره ژر تر ژره تصویب کړي.

د یادونې وړ ده، چې په هېواد کې د خوراکې توکو د غني کولو په موخه د عامه پوهاوي او ملاتړ ستره غونډه د "خوراکي توکو د غني کولو له لارې د افغانستان د راتلوونکي بدلول" تر سرلیک لاندې د سه شنبې په ورځ ترسره شوه.

باید یادونه وکړو، چې د نه تغذيې له امله د رامنځته شویو ناروغیو په وړاندې، د خوړو غني کول یو له اغیزناکو او ارزانو لارو څخه بلل کیږي او په اوږد مهال کې د خوارځواکي د ناروغۍ د کمولو او د نه تغذيي له امله د رامنځته کېدونکي ناروغیو دمخنیوي لپاره مهم ګڼل کیږي. په ویټامینونو او منرالونو د خوړو غني کول کولای شي د ویتامینونو د کمښت په وجه د ناروغیو د مخنیوي لامل شي او په پای کې که بدن ته ویتامینونه او منرالونه په منظم ډول ونه رسیږي، ډېره ناوړه پایله له ځانه سره لري آن تر دې چې د مرګ سبب کېږي.

د دې لپاره چې په هېواد کې کورني تولیدات او وارداتي خوراکي توکي لکه اوړه، مالګه او غوړي په غني شوي بڼه تولید او خلکو ته وړاندې شي، د غني کولو سکرتریت د افغانستان د سوداګرۍ او صنایعو خونې په چوکاټ کې رامنځته شوي او د غني کولو لپاره یې اړینې چارې پر مخ وړي.

د افغانستان د سوداګرۍ او صنایعو خونه د هغو تولیدونوکو او واردونکو څخه چې د غوړیو، اوړو او مالګي په برخه کې فعالیت کوي، غوښتنه کوي ترڅو غني شوي خواړه تولید او وارد کړي.