د لیندۍ د میاشتې په اتمه نیټه د شنبه په ورځ د افغانستان د سوداګرۍ او پانګونې اتاق مشرتابه د جهان پوهنتون ۱۶ محصلین د یوې میاشتنۍ زده کړې دورې په کامیابې سره د پای ته رسولو په مناسبت؛ هغوی ته د تصدیق پاڼو په ورکولو سره ونازول.

د افغانستان د سوداګرۍ او پانګونې اتاق د تخنیک او پالیسۍ مرستیال ښاغلي شفیق الله عطايې وویل "د افغانستان د سوداګرۍ او پانګونې اتاق د هیواد ټولو محصلینو ته د فني او عملي زدکړو وړاندی کولو په چوپړ کې دی."

نوموړي محصلینو ته ددغې دورې د ګټورې ثابتیدو هیله وکړه او تر څنګ يې د یوې ټولنې په اقتصادي لوړتیا کې د خصوصي سکتور رول اړین وباله او زیاته يې کړه، چې د افغانستان د سوداګرۍ او پانګونې اتاق محترمه اداره د هیواد محصلینو د ظرفیت لوړونې لپاره یوه مناسبه مرجع ده.

د جهان پوهنتون مشرتابه او محصلینو د اتاق څخه د زدکړیالۍ دورې د برابرولو په مناسبت مننه وکړه او په دی اړه يې د لازیاتو همکاریو غوښتنه وکړه.

د جهان پوهنتون محصلینو د زدکړیالۍ دغه دوره د خپلو علمي او عملي زدکړو لپاره ډیره ګټوره او د علمي ظرفیت لوړونې په برخه کې يې ډیره اغیزمنه وبلله.